Brahmaputra :
বুধবাৰে খাৰখুলিত ব্ৰহ্মপুত্ৰত ব্ৰহ্মপুত্ৰত গা ধুবলৈ গৈ সন্ধানহীন হোৱা ইস্কনৰ পাঁচ ভক্তৰ সন্ধানত পুনৰ আজি পুৱাৰে পৰা অভিযান আৰম্ভ কৰিছে SRDF-NDRF -এ। খাৰঘুলিৰ ভক্তি কুটীৰ মন্দিৰলৈ গৈছিল লোককেইজন ৷ পূজা-অৰ্চনাৰ পূৰ্বে গা ধুবলৈ ব্রহ্মপুত্রত নামিছিল মুঠ নজন ভক্ত ৷ কিন্ত পাঁচজন ব্ৰহ্মপুত্ৰৰ বুকত নিখোজ হোৱাৰ বিপৰীতে চাৰিজনক স্থানীয় লোকে পানীত ককবকাই থকা অৱস্থাত উদ্ধাৰ কৰি ততাতৈয়াকৈ ভৰ্তি কৰে চিকিৎসালয়ত ৷ বৰ্তমান আটাইয়ে সংকটমুক্ত বুলি জানিব পৰা গৈছে। নিৰুদ্দেশ হৈ থকাসকল হৈছে ক্রমে বিশ্বনাথ চাৰিআলিৰ হৰেকৃষ্ণ মিছনৰ উপেশ কুমাৰ (৪০), এনচিআৰৰ গুৰগ্ৰামৰ সাগৰ গৌতম (২৮), বঙাইগাঁৱৰ ৰৌনক চাদ্দাক (১৭), বিশ্বনাথ চাৰিআলিৰ প্ৰতাপ (২৮) আৰু গুৱাহাটীৰ উজানবজাৰৰ অভিজিৎ বুলি আৰক্ষীয়ে প্রাথমিক অনুসন্ধানৰ ভিত্তিত চিনাক্ত কৰিছে।
আনহাতে, প্রাণ ৰক্ষা পৰা সকল হৈছে ক্রমে প্রণৱ নায়াৰ, জেকৱ, কেশৱ বার্মা আৰু এজন স্থানীয় লোক। উল্লেখ্য যে এই নজনীয়া দলটোৰ মাজত অষ্ট্ৰেলিয়াৰ নাগৰিকত্ব থকা দুজন ভাৰতীয় মূলৰ লোক, এজন আমেৰিকান আৰু এজন দিল্লীব লোক আছিল। তেওঁলোক ইস্কন মন্দিৰৰ ভক্ত।
ইফালে, প্রাথমিক অনুসন্ধানত আৰক্ষীয়ে লাভ কৰা তথ্য অনুসৰি তথা প্রাণক্ষা পৰা ভক্তকেইজনে আৰক্ষীৰ আগত দিয়া স্বীকাৰোক্তি অনুসৰি, দিনৰ ভাগত ১০ জনীয়া ভক্তৰ এটা দল খাৰঘূলিৰ জয়পুৰ ঘাটৰ সমীপত থকা ভক্তিকূটিৰত উপস্থিত হয়। ইয়াৰে নজনে গা ধুবলৈ বুলি ব্রহ্মপুত্রত নামিছিল। ইজনে-সিজনৰ হাতত ধৰ-ধৰিকৈ দুটা গোটত ভাগ হৈ তেওঁলোকে পানীত নামে। ইয়াৰে ছজনীয়া ভক্তন দলটোৱে ব্ৰহ্মপুত্ৰৰ কিছু দূৰলৈ আগুৱাই গৈ থাকোতে হঠাৎ পানীব কোবাল সোঁতে তেওঁলোকক উটুৱাই লৈ যায়।
অৱশ্যে গোটটোৰ শেষত থকা প্ৰণৱে সাঁতুৰি প্ৰাণ ৰক্ষা কৰিবলৈ সক্ষম হয়। আনহাতে, আন তিনিজনেও সাঁতুৰি পাৰত উপস্থিত হোৱাৰ পাচতে চিঞৰিবলৈ ধৰে আৰু স্থানীয় লোকে ঘটনা প্রত্যক্ষ কৰি আৰক্ষীক খবৰ দিয়ে। হয়ৰ কিছু সময়ৰ পাছতে ঘটনাস্থলীত আৰক্ষী আৰু এনডিআৰএফৰ দল উপস্থিত হয়; কিন্তু প্রত্যক্ষদর্শীৰ অভাৱত বহু পলমকৈছে তেওঁলোকে অভিযান চলায়। শেষত সন্ধিয়া হোয়াত কালি অভিযান বন্ধ কৰিবলগীয়া হয় আৰু নিৰুদ্দেশ হৈ থকা পাঁচজন লোকক উদ্ধাৰৰ বাবে বৃহস্পতিবাৰে পুৱাৰে পৰা পুনৰ অভিযান আৰম্ভ কৰে এনডিআৰএফে।
আনহাতে, কথমপি প্ৰাণৰক্ষা পৰা বৃন্দাবনৰ পৰা অহা অস্ট্রেলয়াৰ নাগৰিক প্ৰণৰ নায়ানে সংবাদ মাধ্যমৰ আগত কয়, ‘আমি নজন লোক আছিলো। পানীত নামিছিলো গা ধুবলৈ। পাঁচজন অলপ আগবাঢ়ি গৈছিল আৰু তেওঁলোক উভতি আহিব নোৱাৰিলে। চাৰিজনে সাঁতুৰি প্রাণ ৰক্ষা কৰিলে।’ তেওঁ লগতে কয়, ‘মই বৃন্দাবনৰ পৰা আহিছিলো। দিল্লী আৰু আমেৰিকাৰ লোকো আছিল। নিৰুদ্দেশ হৈ থকাসকলৰ ভিতৰত চাৰিজন স্থানীয় আৰু এজন দিল্লীৰ।’ একেদৰে অভিযানকাৰী এনডিআৰএফৰ এজন শীর্ষ বিষয়াই সংবাদ মাধ্যমৰ আগত কয় যে তেওঁলোক আটাইকেইজন ইস্কন মন্দিৰৰ ভক্ত আছিল। ইয়াৰে এজন আমেৰিকান, দুজনৰ ভাৰতীয় মূলৰ অস্ট্রেলিয়াৰ নাগৰিক আৰু এজন দিল্লীৰ। বাকীসকল অসমৰ আছিল। ইয়াৰে চাৰিজন বর্তমান সুস্থ আৰু বাকী নিৰুদ্দেশ হৈ থকা পাঁচজনৰ সন্ধানত অভিযান অব্যাহত আছে।
আনহাতে, বিষয়াজনে অভিযোগ কৰে যে যেতিয়া তেওঁলোক ঘটনাস্থলীত উপস্থিত হৈছিল, তেতিয়া সেই স্থানত কাকো লগ পোৱা নাছিল। বহু পলমকৈ সেই স্থানত আৰক্ষী উপস্থিত হৈছিল। ফলত বহু পলমকৈ অভিযান আৰম্ভ কৰিবলগীয়া হৈছিল। উল্লেখ্য যে ঘটনাস্থলীৰ পৰা তথা ব্রহ্মপুত্রৰ পাৰৰ পৰা আৰক্ষীয়ে নিৰুদ্দেশ হৈ থকা লোককেইজনৰ কাপোৰকে ধৰি বিভিন্ন নথিপত্র উদ্ধাৰ কৰিছে।
আনহাতে ঘটনাৰ সন্দৰ্ভত স্থানীয় লোকে সদৰী কৰা অনুসৰি, মুঠ নজন লোক ব্রহ্মপুত্ৰত নামছিল আৰু ইয়াৰে তিনিজন আন দিশে সাঁতুৰি গৈছিল। আনজনে সাঁতুৰি থকা অবস্থাত ব্রহ্মপুত্রত ডুব যায়। এজন স্থানীয় লোকে এই ঘটনা প্রত্যক্ষ কৰি এজনক জীৱস্তে উদ্ধাৰ কৰিবলৈ সক্ষম হয় যদিও আন পাঁচজনক উটুৱাই লৈ যায় আৰু সন্ধানহীন হৈ পৰে। ইয়াৰ পাছতে লোককেইজনৰ বন্ধুৱে আৰক্ষীক অৱগত কৰে আৰু ঘটনাস্থলীত এছডিআৰএফ, এনডিআৰএফ আৰু আৰক্ষী উপস্থিত হৈ ব্রহ্মপুত্রত অভিযান অব্যাহত ৰাখিছে যদিও লোককেইজনৰ সন্ধান লাভ কৰা নাই।
আনহাতে, বিশ্বনাথ চাৰিআলিৰ এজন লোক থকা বুলি অৱগত হোৱাত পৰিয়ালৰ মাজত এক শোকাকুল পৰিবেশে বিৰাজ কৰিছে।
