Nagaon:
নগাঁও জিলাৰ বুলি ঠিকনা দিয়া মহিলাসহ ১৫ জন লোকক আগন্তুক ২৪ ঘণ্টাৰ ভিতৰত ভাৰত ত্যাগৰ নিৰ্দেশ জাৰি কৰিছে জিলা আযুক্তই নগাঁও বিদেশী ন্যায়াধিকৰণে এই লোকসকলক বিদেশী নাগৰিক বুলি চিনাক্ত কৰে। সেই সন্দৰ্ভত নগাঁৱৰ জ্যেষ্ঠ আৰক্ষী অধীক্ষকৰ পৰা তথ্য লাভৰ পাছতে জিলা আয়ুক্তই এই নির্দেশ জাৰি কৰে। এই লোকসকল হ’ল জিলাখনৰ ধিং আৰক্ষী থানাৰ অন্তৰ্গত কান্ধলীমাৰীৰ জহুৰা খাতুন (৪৮), বহা আৰক্ষী থানাৰ অন্তর্গত দীঘলীআটিৰ হুছেইন আলী (৩৬), বুৰেক আলী (৬০) আৰু ৰহিম শেখ (৪৬), চাপৰমুখৰ নজৰুল ইছলাম (৫৫), ৰহা নগৰৰ ইদ্রিছ আলী (৪২), চামগুৰি আৰক্ষী থানাৰ অন্তৰ্গত লেংটেঙৰ আনুৰা বেগম (৫৫), শালবাৰীৰ আশা খাতুন (৫৯) , কলিয়াবৰ আৰক্ষী থানাৰ অন্তৰ্গত হাতীগাঁও বাগানৰ ৰুস্তম আলী (৬০), জাজৰি আৰক্ষী থানাৰ অন্তৰ্গত হাতীযুঁজুৱাৰ ফজিলা খাতুন (৫৫), জুৰীয়া আৰক্ষী থানাৰ অন্তৰ্গত বগৰীগুৰিৰ আবেদা খাতুন (৪৬), নগাঁও সদৰ আৰক্ষী থানাৰ অন্তৰ্গত হেদায়ৎ নগৰৰ আব্দুল আজিজ (৪৫), জখলাবন্ধা আৰক্ষী থানাৰ অন্তৰ্গত গৰুবন্ধাৰ আনোৱাৰ খান (৭৩), উলুৱনী আৰক্ষী থানাৰ অন্তৰ্গত গৰৈমাৰীৰ তাহেৰ আলী (৫৮) আৰু ৰূপহী আৰক্ষী থানাৰ অন্তৰ্গত গড়েমাটিখোৱাৰ আজুফা খাতুন (৪৫)। এই লোকসকলে ঠিকনাবোৰ ভুৱাকৈ দিয়ে। আটাইকেইজন লোক বাংলাদেশৰ বুলিও উল্লেখ কৰা হৈছে। জিলা আয়ুক্তই বিদেশী ঘোষিত লোকসকললৈ পৃথকে পৃথকে জাননী জাৰি কৰিছে। নির্দেশনাটোত এই লোকসকলক ধুবুৰী, শ্রীভূমি, মানকাচৰ আৰু দক্ষিণ শালমাৰা সীমান্তৰে অসম এৰি বাংলাদেশলৈ যোৱাৰ নিৰ্দেশ দিয়া হৈছে। অন্যথা তেওঁলোকক ‘ইমিগ্রেন্টছ (এক্সপালছন ফ্রম আছাম) এক্ট, ১৯৫০’ অনুসৰি বলপূর্বক বহিষ্কাৰ কৰা হ’ব বুলিও নির্দেশনাটোত উল্লেখ কৰা হৈছে।
উল্লেখ্য যে ২৪ ঘন্টা সময়সীমা নিৰ্ধাৰণ কৰি দিয়া নিৰ্দেশ অনুসৰি আজিয়ে অসম তথা ভাৰত এৰি বাংলাদেশলৈ বিতাড়ন হ’ব লাগিব ১৫ বাংলাদেশী !