Nagaon:
নগাঁও জিলাৰ বঢ়মপুৰত ক্ৰীড়া বিষয়ৰ এক কুইজ প্ৰতিযোগিতা সম্পন্ন হয় । বঢ়মপুৰ ক্ৰীড়া সংস্থাৰ অধীনত স্থাপন হোৱা বঢ়মপুৰ ফুটবল একাডেমীৰ আৱাসিক প্ৰশিক্ষাৰ্থী সকলৰ মাজত দেওবাৰে সন্ধিয়া এই বিশেষ কুইজ প্ৰতিযোগিতা অনুষ্ঠিত হয় । অসমৰ অন্যতম জনপ্ৰিয় কুইজ পৰিচালক চন্দ্ৰজিৎ দাসে পৰিচালনা কৰা এই মুকলি কুইজ প্ৰতিযোগিতাত নমাটিৰ কৌস্তভজ্যোতি হাজৰিকাই প্ৰথম, অৰুণাচলৰ টাটুং জেকচনে দ্বিতীয় আৰু ৰহাৰ সৌৰভ দেউৰীয়ে তৃতীয় স্থান লাভ কৰে । বঢ়মপুৰ ফুটবল একাডেমীৰ প্ৰশিক্ষাৰ্থীসকলৰ মানসিক উৎকৰ্ষ সাধনৰ প্ৰয়াসেৰেই বঢ়মপুৰ ক্ৰীড়া সংস্থাৰ পৰিকল্পনা অনুসৰি এই বিশেষ ফুটবল তথা ক্ৰীড়াকেন্দ্ৰিক কুইজ প্ৰতিযোগিতাখন অনুষ্ঠিত কৰা হয় ।
পৰিচালকৰ বাকপটুতাৰে জ্যোতিস্মান হৈ পৰা এই কুইজ প্ৰতিযোগিতাখনত প্ৰতিযোগী সকলৰ উপৰিও বিশিষ্ট ক্ৰীড়া সংগঠক তথা বঢ়মপুৰ ক্ৰীড়া সংস্থাৰ সম্পাদক প্লাৱন বৰুৱা, নগাঁৱৰ বিশিষ্ট শল্য চিকিৎসক ডাঃ মুকুট গোস্বামী, সক্ৰিয় ৰাজহুৱা কৰ্মী জ্যোতি ভূঞা, দিলীপ শইকীয়া, সমন্বয়ক তথা উদ্যোক্তা পৰমানন্দ নাথ, ফুটবল একাডেমীৰ প্ৰশিক্ষক ৰিতুপৰ্ণ বড়ো, পাৰ্থ পাটৰ, ৰাষ্ট্ৰীয় সংবাদ প্ৰতিষ্ঠান এ এন আইৰ সংবাদকৰ্মী জ্যোতিপ্ৰসাদ বৰা আদিকে ধৰি বিভিন্নজন উপস্থিত থাকে ।
উল্লেখ্য যে, বঢ়মপুৰ ক্ৰীড়া সংস্থাৰ অধীনত ঠগী সুত ক্ৰীড়া প্ৰকল্পত স্থানীয় বিধায়ক জিতু গোস্বামীৰ তৎপৰতাত গ্ৰামাঞ্চলটোত শেহতীয়াকৈ গঠন হৈছে এখন ফুটবল একাডেমী । সবল আৰু আধুনিক আন্তঃগাঁঠনিসমৃদ্ধ এই ফুটবল একাডেমীত এতিয়া আৱাসিক প্ৰশিক্ষণ গ্ৰহণ আছে অসমৰ লগতে উত্তৰ-পূৰ্বাঞ্চলৰ কুৰি গৰাকীকৈ চেমনীয়া প্ৰশিক্ষাৰ্থীয়ে । যিটো ৰাজ্যৰ ক্ৰীড়া জগতৰ বাবে এক আশাব্যঞ্জক খবৰ ।