Eviction:✒️হোজাই জিলাৰ ডবকাৰ যমুনা-মৌডংগা সংৰক্ষিত বনাঞ্চলৰ ছহেজাৰ বিঘা ভূমিত কালি পুৱাৰে পৰা চলিল প্রশাসনৰ বুলড’জাৰ। বন বিভাগৰ শীর্ষ বিষয়াই কয় যে ৮০ দশকৰ এখন অটব্য অৰণ্য যমুনা-মৌডংগা সংৰক্ষিত বনাঞ্চলৰ হেজাৰ হেজাৰ বিঘা ভূমি বেদখল কৰি কে’বাখনো গাঁও গঢ় লৈ উঠিছিল।
পুৱাৰে পৰা জিলা আযুক্ত, আৰক্ষী অধীক্ষক আৰু বন বিভাগৰ শীর্ষ বিষয়াৰ উপস্থিতিত আৰক্ষী-চিআৰপিএফৰ বৃহৎ দলসহ প্রশাসনে এক্সকেভেটৰ ব্যৱহাৰ কৰি বন বিভাগৰ ছহেজাৰ ভূমিত উচ্ছেদ অভিযান আৰম্ভ কৰে। প্ৰশাসনৰ তথ্য অনুসৰি, ডবকাৰ যমুনা-মৌডংগা সংৰক্ষিত বনাঞ্চলৰ ছহেজাৰ বিঘা ভূমিত প্রায় ১২৫০টা পৰিয়ালে বেদখল কৰিছিল।
এই গাঁওসমূহত স্কুল, মছজিদৰ লগতে পানী যোগান আঁচনি, অংগনৱাড়ী কেন্দ্র, বিদ্যুৎ যোগান ধৰা হৈছিল। আজি উচ্ছেদ কালত অসংখ্য ঘৰ-বাৰী, খেতিপথাৰৰ লগতে ১২টা মছজিদ গৃহও ভাঙি পেলায় প্রশাসনে। ইপিনে, বনাঞ্চলৰ ১৫২টা পৰিয়ালে আদালতত গোচৰ তৰাত আৰু এই গোচৰ অমীমাংসিত হৈ থকাত তেওঁলোকৰ ঘৰবোৰত উচ্ছেদ চলোৱা নাই প্রশাসনে। বাকী ১০৯৮টা পৰিয়ালক উচ্ছেদ কৰা হয়।
ইপিনে, উচ্ছেদ চলি থকাৰ মাজতে বিন্নাকান্দি সমষ্টিৰ বিধায়ক চিৰাজুদ্দিন আজমলৰ প্রতিনিধি তথা এআইইউডিএফ নেতা বিলালউদ্দিন বৰভূঞাৰ নেতৃত্বত যোৱা এটা দলে উচ্ছেদত বাধা প্ৰদানৰ চেষ্টা কৰে। তেওঁলোকে অভিযোগ কৰি কয়, ‘প্রশাসনে চলোৱা উচ্ছেদৰ সময়ত গছ কাটি খাস্তাং কৰিছে।’
অৱশ্যে প্রশাসনে তেওঁলোকৰ বিৰোধক গুৰুত্ব নিদি চলাই যায় উচ্ছেদ। আনহাতে, ভুক্তভোগী ৰাইজে ইউডিএফ নেতা বিলালউদ্দিনে ৰাজনৈতিক মুনাফা লুটাৰ চেষ্টা কৰা বুলি অভিযোগ কৰে। উচ্চতম ন্যায়ালয়ত গোচৰ তৰা গুচৰীয়া পক্ষৰ মতে, আজমল উচ্চতম ন্যায়ালয়ৰ কাষেই চপা নাছিল। উচ্ছেদৰ ফলত ঘৰ-বাৰী হেৰুওৱা লোকসকলৰ মাজত হাহাকাৰ অৱস্থাৰ সৃষ্টি হৈছে। যুগ যুগ ধৰি থাকি অহা ঘৰখন নিমিষতে থানবান হোৱাত অসহায় লোকসকলে এই প্রচণ্ড শীতত মুকলি পথাৰৰ মাজত তম্বু সাজি আশ্রয় ল’বলগীয়া হৈছে।
এই লোকসকলৰ বিকল্প সংস্থাপনৰ কোনো ব্যৱস্থা নকৰাৰ অভিযোগ উঠিছে প্রশাসনৰ বিৰুদ্ধে। উল্লেখ্য যে কালিৰ পৰা আৰম্ভ হোৱা উচ্ছেদিত গাঁওবোৰত বন বিভাগ আৰু ৰাজহ বিভাগে যৌথ জৰীপ চলাই বেদখলকৃত ভূমি চিনাক্ত কৰি বেদখলকাৰীলৈ জাননী জাৰি কৰিছিল। অসম বন আইনৰ নিয়মাৱলী, ১৮৯১(১৯৯২ত সংশোধিত)ৰ ২৪ আৰু ২৫ নম্বৰ ধাৰাৰ অধীনত বেআইনী বুলি বিবেচিত কৰা হয়।
আনহাতে, গুৱাহাটী উচ্চ ন্যায়ালয়ে নিজাববীয়াকৈ গ্ৰহণ কৰা ৰাজহুৱা স্বার্থজড়িত আবেদন (পিআইএল১ (২০২২)ৰ বীট আবেদন নম্বৰ ২৫১/২০২৫) আৰু (২৫২/২০২৫) (১৮/০৮/২০২৫ তাৰিখৰ আদেশ) মর্মে বন বিভাগৰ সংৰক্ষিত বনাঞ্চলৰ পৰা অবৈধ বেদখল আঁতৰাবলৈ নির্দেশ দিয়ে আৰু বেদখলকাৰীক যুক্তিসংগতভাবে তেওঁলোকৰ উপস্থিতি বুজাবলৈ ১৫ দিনৰ সময়সীমা বান্ধি দিয়াৰ লগতে অতিৰিক্তভাৱে বনাঞ্চলৰ ভিতৰৰ মাটি খালী কৰিবলৈ আৰু ১৫ দিনৰ সুযোগ দি নির্দেশ দিছিল।
বেদখলকাৰীয়ে কোনো বৈধ নথিপত্র প্রদর্শন কৰিব নোৱৰাত আজিৰ পৰা এই উচ্ছেদ আৰম্ভহয়। অহা দুই-তিনি দিনৰ ভিতৰত সম্পূৰ্ণৰূপে উচ্ছেদ হ’ব যমুনা মৌডংগা সংৰক্ষিত বনাঞ্চলৰ অবৈধ বেদখল।
আমছুৰ প্ৰতিক্রিয়া
আমছুৰ হোজাই জিলাৰ সভাপতি কবিৰ আহমেদ লস্কৰে প্রতিক্রিয়া প্রকাশ কৰি কয় যে উচ্ছেদিত তথা ভূমিহীন লোকসকলক লৈ চৰকাৰ তথা বিৰোধী পক্ষয়ে ৰাজনীতি কৰি আহিছে। তেওঁ কয় আমছু উচ্ছেদৰ বিৰোধী নহয়; কিন্তু চৰকাৰ তথা প্রশাসনে অবৈধ পন্থাৰে যি উচ্ছেদ চলাই আহিছে আমি ইয়াৰ বিৰোধী। চৰকাৰে উচ্ছেদৰ জৰিয়তে ধর্মীয় সংখ্যালঘু লোকসকলক নিঃশেষ কৰাৰ ষড়যন্ত্র চলোৱাৰ অভিযোগ কৰে। উচ্ছেদিতক সংস্থাপনৰ নেতাজনে দাবী জনায়।
নিশা অতিবাহিত মুকলি পথাৰতে
উচ্ছেদিতসকলৰ একাংশই টম্বু পাতি এই কুঁৱলীত কালি নিশাটো পাৰ কৰিলে। এই দুৰ্ভগীয়া লোকসকলে সংস্থাপনৰ দাবী জনায়। উল্লেখ্য যে দল-সংগঠনৰ লগতে ভূমিহীন লোকসকলে ভূমিৰ পট্টা প্ৰদানৰ দাবী জনায়। ইপিনে, বহুসংখ্যকে অন্য স্থানত থকা নিজৰ ভূমি অথবা আত্মীয়ৰ ঘৰত আশ্ৰয় লৈছে যদিও আন একাংশই খেতি পথাৰত তিৰপাল আঁৰি প্ৰচণ্ড শীতত কণ কণ সন্তানক লৈ হাহাকাৰ কৰিছে। তেওঁলোকে কয়, ‘আমাৰ কোনো নাই, নাই এডোখৰ ভূমি, কি কৰিম, ক’ত যাম, আমাৰ সন্তান শিক্ষাৰ পৰা বঞ্চিত হৈ গ’ল, সমাগত বছৰেকীয়া পৰীক্ষা। স্থানীয় বিধায়ক তথা প্রশাসনে আমাক এডোখৰকৈ ভূমি দি জীয়াই থকাৰ ব্যৱস্থা কৰি দিয়ক।