Eviction:✒️বিভিন্ন আইন উলংঘনৰ অভিযোগৰ মাজতে কালি ক্রমাগত দ্বিতীয় দিনৰ বাবে প্রশাসনে নগাঁৱৰ লুটুমাৰী সংৰক্ষিত বনাঞ্চলত উচ্ছেদ অভিযান চলাই বেদখলকাৰীসকলৰ কে’বাশ বাসগৃহ আৰু প্রকাণ্ড প্রকাণ্ড তামোলৰ বাগিচা ভাঙি চুৰমাৰ কৰে। এই দুদিনীয়া উচ্ছেদ অভিযানত মুঠ ৪৩০ টা পকীঘৰ আৰু ৯৯৮ টা কেঁচাঘৰ উচ্ছেদ কৰা হয় বুলি জিলা প্রশাসনে এক বিবৃতিত প্রকাশ কৰিছে। জিলা প্ৰশাসনৰ সূত্ৰৰ মতে, গুৱাহাটী উচ্চ ন্যায়ালয়ৰ এক নির্দেশৰ ভিত্তিত প্রশাসনে সংৰক্ষিত বনাঞ্চলখনৰ বেদখলীকৃত ভূমিত এই উচ্ছেদ অভিযান চলায়। শনিবাৰৰ দৰে কালিও পুৱা সাত বজাৰ পৰা উচ্ছেদ অভিযান আৰম্ভ হয়। উচ্ছেদিতসকলৰ কান্দোনৰ মাজতে চলা এই উচ্ছেদ অভিযানৰ কালি সামৰণি পৰে। দুয়োদিনৰ উচ্ছেদ অভিযান শান্তিপূর্ণভাবে সম্পন্ন হয়।
আনহাতে, উচ্ছেদ অভিযান চলি থকাৰ সময়তে ভাঙি পৰা এজোপা তামোল গছ পৰি উচ্ছেদস্থলীত এজন যুৱক গুৰুতৰভাৱে আহত হয়। আহত যুৱকজনক ৰছিদুল ইছলাম (২৬) বুলি চিনাক্ত কৰা হৈছে। ঘটনাটোত তেওঁৰ মূৰ ফটাত প্ৰচুৰ ৰক্তক্ষৰণ ঘটে। পাছত যুৱকজনক সংকটজনক অৱস্থাত নগাঁও চিকিৎসালয়ত ভর্তি কৰা হয়। কটকটীয়া নিৰাপত্তা ব্যৱস্থাৰ মাজেৰে প্ৰশাসনৰ বৃহৎ বাহিনীয়ে বনাঞ্চলখনৰ কান্দাপাৰা, চানখোলা, মাজগাঁও, পদুমণি, বেদেৰীপাৰ, জুৰিৰপাৰ, নিম বাগান আদি অঞ্চলত উচ্ছেদ চলাই বেদখলীকৃত বনভূমি উদ্ধাৰ কৰে। উল্লেখ্য যে সংৰক্ষিত বনাঞ্চলখনৰ ৫,৯৬২ বিঘা ভূমি বেদখলৰ কৱলত থকা বুলি নিৰ্ধাৰণ কৰি প্রশাসনে কালিৰ পৰা উচ্ছেদ অভিযান আৰম্ভ কৰে।
অৱশ্যে উচ্ছেদৰ জাননী পায়ে বেদখলকাৰীসকলৰ ৭০ শতাংশতকৈ অধিকে উচ্ছেদৰ পূৰ্বেই স্বেচ্ছাই নিজৰ ঘৰ-দুৱাৰ ভাঙি আঁতৰি গৈছে। বাকী থকা ৩০ শতাংশ বেদখলকাৰীৰ বাসগৃহত শনিবাৰে জিলা আয়ুক্ত দেৱাশীষ শৰ্মাৰ তদাৰকীত উচ্ছেদ অভিযান আৰম্ভ হয়। উচ্ছেদস্থলীত বন বিভাগৰ বিশেষ মুখ্য সচিব এম কে যাদরো উপস্থিত থাকে। স্বেচ্ছাই ঘৰ ভাঙি আঁতৰি যোৱা আৰু উচ্ছেদ কাৰ্যৰ প্ৰতি শান্তিপূর্ণভাৱে সঁহাৰি জনোৱা বেদখলকাৰীসকললৈ জিলা আযুক্ত শর্মাই ধন্যবাদ জনায়। আনহাতে, এই উচ্ছেদ অভিযান সম্পৰ্কত বন বিভাগৰ বিশেষ মুখ্য সচিব যাদবে কয়, ‘এই বনাঞ্চল হাতী-মানুহৰ সংঘাতৰ অঞ্চলৰূপে পৰিচিত। এই অঞ্চল পুনৰ বনাঞ্চলৰূপে গঢ়ি তোলা হ’ব।’
অৱশ্যে বেদখলকাৰীসকলে স্থাপন কৰা তামোলৰ বাগিচা প্ৰশাসনৰ বাহিনীয়ে ধ্বংস কৰাটো বহুতে সহজভাবে ল’ব পৰা নাই। ইপিনে, স্থানীয় এক সূত্রই জনোৱা মতে বান-খহনীয়াত সর্বস্বান্ত হৈ উচ্ছেদিত লোকসকলে এই সংৰক্ষিত বনাঞ্চলৰ ভূমিত বাস কৰি আছিল। তেওঁলোকৰ পুনৰ সংস্থাপনৰ বাবে পূৰ্বৰ কংগ্ৰেছ চৰকাৰে কোনো ব্যৱস্থা গ্রহণ নকৰিলে বুলি উচ্ছেদিতসকলে অভিযোগ উত্থাপন কৰিছে। ফলত তেওঁলোকে সম্প্রতি এই দুর্যোগ ভোগ কৰিবলগীয়া হৈছে। আনহাতে, ন্যায়ালয়ৰ নিৰ্দেশৰ বাবে শতাধিক বেদখলকাৰী পৰিয়ালক বর্তমানেও প্রশাসনে উচ্ছেদ কৰিব পৰা নাই। অৱশ্যে এই বেদখলকাৰী পৰিয়ালসমূহক শীঘ্ৰে উচ্ছেদ কৰা হ’ব বুলি বন বিভাগে সদৰী কৰিছে।
লংজাপ-মাজগাঁৱত সংজ্ঞাহীন হৈ পৰিল দম্পতী
শনিবাৰে লুটুমাৰী সংৰক্ষিত বনাঞ্চলৰ লংজাপ-মাজগাঁৱতো উচ্ছেদ চলে। উচ্ছেদকাৰী বাহিনীয়ে নিজৰ ঘৰখন চকুৰ সম্মুখতে ভাঙি পেলোৱাৰ পাছত নিজৰ ঘৰখনৰ মায়া এৰিব নোৱাৰি ওৰে নিশা অনাহাৰে-অনিদ্রাৰে থকা এক দম্পতী সংজ্ঞাহীন হৈ পৰে। তদুপৰি কালিৰ উচ্ছেদৰ ফলত গৃহহীন হোৱা শ শ উচ্ছেদিত পৰিয়ালে পানী কেঁচুৱাসহ গছৰ তলতে সময় অতিবাহিত কৰিছে। অন্ন-পানী অবিহনে যোৱা নিশাটোও এই পৰিয়ালসমূহে গছৰ তলতে বাস কৰে। লক্ষ্যণীয়ভাবে উচ্ছেদস্থলীত এজনো মানুহ থাকিব নোৱাৰিব বুলি নগাঁও বন সংমণ্ডলে মাইকযোগে নির্দেশ জাৰি কৰিছে যদিও ভূমিহীন উচ্ছেদিত লোকসকলে গছৰ তলে তলে টালি-টোপোলা লৈ আশ্রয় লৈছে। তদুপৰি একাংশ উচ্ছেদিত লোকে নিজাববীয়াকৈ কে’বাটাও আশ্রয় শিবিৰ স্থাপন কৰিছে। কিন্তু আশ্রয় শিবিৰত এটুপি পানীৰ বাবে এইসকলে হাহাকাৰ কৰিবলগীয়া হৈছে।
লাখপতিৰ চেক, অৰুণোদয়, ৰেছন কার্ড দিয়াৰ পাছতো আমাক উচ্ছেদ!
লুটুমাৰী বনাঞ্চলৰ বেদখলকাৰীসকলৰ মাজত চৰকাৰী আঁচনি হিতাধিকাৰীও আছে বুলি কালিৰ পৰা একাংশ সংগঠন সৰৱ হৈ আছে। কোনে, কেনেদৰে এই বেদখলকাৰীসকললৈ চৰকাৰী আঁচনিৰ সুবিধা আগবঢ়ালে বুলি বিভিন্ন সংগঠনে প্রশ্ন উত্থাপন কৰাৰ সময়তে একাংশ বেদখলকাৰীয়েও এনে প্রশ্ন উত্থাপন কৰিছে। দেওবাৰে উচ্ছেদস্থলীত একাংশ উচ্ছেদিত লোকে কান্দি কান্দি সংবাদ মাধ্যমৰ আগত কয়, ‘আমাক চৰকাৰী ঘৰো দিছে, ঘৰত বিদ্যুৎ সংযোগো দিছে। লাখপতিৰ চেকো দিছে। অৰুণোদয় দিছে, বেছন কার্ডো দিছে। তাৰ পাছতো আমাক নির্দয়ভারে উচ্ছেদ কৰা হ’ল। এতিয়া আমি ক’লৈ যাম? কি খাম?’ গতিকে চৰকাৰ-প্রশাসনে উচ্ছেদৰ পূৰ্বে এনেবোৰ দিশৰ তদন্ত কৰি দোষীৰ বিৰুদ্ধে কিয় ব্যৱস্থা গ্রহণ নকৰিলে বুলিও প্রশ্ন উত্থাপন হৈছে। উচ্ছেদিতসকলে লগতে কয়, ‘জাতি-মাটি-ভেটি ৰক্ষাৰ কথা কৈ মামাই আমাৰ ঘৰসমূহ ভাঙি আমাক গৃহহীন কৰিছে। আমাৰ মাটি নাই। ল’ৰা-ছোৱালীৰ পৰীক্ষাৰ সময়। কিতাপ-বহীসমূহ ধ্বংস কৰিলে।’
কৰ্তব্যৰত বিষয়া-কৰ্মচাৰীলৈ নিম্নমানৰ খাদ্য যোগান
লুটুমাৰী সংৰক্ষিত বনাঞ্চলৰ উচ্ছেদ অভিযানৰ উদ্দেশ্যে যোৱা ২৭ নবেম্বৰৰ পৰা উচ্ছেদস্থলীত নিয়োজিত কৰা বন বিভাগৰ কৰ্মচাৰী, আৰক্ষী বাহিনী, অর্ধ-সামৰিক বাহিনী আৰু স্বাস্থ্য কর্মীৰ বাবে তেনেই নিম্নমানৰ খাদ্য সামগ্রী যোগান ধৰাৰ অভিযোগ উত্থাপন হৈছে। অথচ এনে অৱস্থাতে এইসকল চৰকাৰী লোকে বিগত চাৰিদিন অহর্নিশে কর্তব্য পালন কৰিবলগীয়া হয়।
