চত্তীশগড়ত দুটা পৃথক এনকাউণ্টাৰত নিহত হৈছে ১৪জন মাওবাদী। ৰাজ্যৰ সুকমা আৰু বিজাপুৰ জিলাত নিৰাপত্তা বাহিনী আৰু মাওবাদীৰ মাজত সংঘৰ্ষ হয়।সুকমাত ১২জন মাওবাদী নিহত হোৱাৰ বিপৰীতে বিজাপুৰত দুজনৰ মৃত্যু হয়।
পুলিচ সূত্ৰই জানিবলৈ দিয়া মতে, শুকুৰবাৰে সন্ধিয়া সুকমা জিলাৰ কিস্তাৱাম অঞ্চলৰ পামলুৰ গাঁৱত মাওবাদীসকল সমৱেত হোৱা বুলি খবৰ পোৱা যায়।
সেই খবৰৰ ভিত্তিত নিশাই ডিষ্ট্ৰিক্ট ৰিজাৰ্ভ গাৰ্ড (ডিআৰজি)-এ অভিযান আৰম্ভ কৰে। পালোৰি আৰু পোটাকপল্লি অঞ্চলত তল্লাশি চলোৱাৰ সময়তে কিস্তাৱামৰ পামলুৰ গাঁৱৰ ওচৰত মাওবাদীসকলৰ স’তে বাহিনীৰ বন্দুক যুদ্ধ আৰম্ভ হয়।
গভীৰ নিশালৈ দু’পক্ষৰ মাজত এই যুদ্ধ চলি থাকে। শনিবাৰে পুৱা আৰক্ষীয়ে জনায় যে এই সংঘর্ষত ১২ জন মাওবাদী নিহত হৈছে। নিহতসকলৰ ভিতৰত কোন্টা এৰিয়া কমিটীৰ সম্পাদক সচিন মাংড়ুও আছে।
আন নিহতসকলৰ পৰিচয় চিনাক্ত কৰাৰ কাম চলি আছে। সমগ্ৰ এলেকাজুৰি মাওবাদীৰ সন্ধানত তল্লাশি অভিযান অব্যাহত আছে।
সুকমা জিলাৰ পুলিচ অধীক্ষক কিৰণ চহ্বণে জনায় যে সংঘর্ষস্থলীৰ পৰা একে-৪৭, ইনসাছ ৰাইফেলসহ বৃহৎ পৰিমাণৰ কাৰ্তুজ উদ্ধাৰ কৰা হৈছে। একাংশ সূত্ৰৰ মতে, এই সংঘর্ষত মাওবাদীসকলৰ এজন কমাণ্ডাৰো নিহত হৈছে।
সূত্ৰই আৰু জনায় যে কিস্তাৰামত কেবাজনো মাওবাদী ডিভিশনাল কমিটি সদস্য (ডিভিচিএম) সমৱেত হৈছিল। উচ্চপৰ্যায়ৰ কোনো বৈঠক অনুষ্ঠিত হোৱাৰ সম্ভাৱনাও নুই কৰা হোৱা নাই।
ইফালে, বিজাপুৰ জিলাত শনিবাৰে পুৱা প্ৰায় পাঁচ বজাত নিৰাপত্তা বাহিনীৰ স’তে হোৱা গুলিৰ যুদ্ধত দু’জন মাওবাদী নিহত হয়। ঘটনাস্থলীৰ পৰা দুয়োৰে মৃতদেহ উদ্ধাৰ কৰা হৈছে বুলি পুলিচ সূত্ৰই নিশ্চিত কৰিছে।
উল্লেখযোগ্য যে, যোৱা বছৰত চত্তীসগঢ়ত নিৰাপত্তা বাহিনীৰ স’তে সংঘর্ষত মুঠ ২৮৫ জন মাওবাদী নিহত হৈছিল। ইয়াৰ ভিতৰত ২৫৭ জনৰ মৃত্যু হৈছিল বস্তাৰ অঞ্চলত। বাকী ২৭ জনৰ মৃত্যু গৰিয়াবন্দ জিলা আৰু ৰায়পুৰ ডিভিশনত সংঘটিত হৈছিল।