Prasanta Phukan :
নিৰ্বাচনৰ প্ৰাক্ষণত অসমৰ ৰাজনীতিত পুনৰ তীব্র আলোড়নৰ সৃষ্টি হৈছে। বহুবল্কী ৰাইজৰ দলৰ সভাপতি তথা বিধায়ক অখিল গগৈৰ বিৰুদ্ধে উত্থাপিত হৈছে। অতি গুৰুতৰ ধনদাবীৰ অভিযোগ । এই ঘটনাই ৰাজ্যৰ ৰাজনৈতিক মহল উত্তাল কৰি তুলিছে। এই অভিযোগক কেন্দ্র কৰি মন্ত্ৰী তথা বিজেপিৰ শীর্ষ নেতা প্রশান্ত ফুকনে সামাজিক মাধ্যমত কটাক্ষ কৰি কয়, ‘সামাজিক মাধ্যমত ভাইৰেল হোৱা এই কথোপকথনৰ বিষয়ে গগৈয়ে নিজৰ স্থিতি স্পষ্ট কৰা উচিত। আপোনাৰ দাবী মানি ল’বলৈ কোনো ইচ্ছুক নহয়।’
সামাজিক মাধ্যমত ভাইৰেল হোৱা এটা বিশেষ ফোনকল ৰেকডিঙে এই বিতর্কক অধিক জটিল ৰূপ দিছে। সামাজিক মাধ্যমত ভাইৰেল হোৱা ফোনকলটো হ’ল ৰাইজৰ দলৰ সদস্য পদত্যাগী এজন নেতা আৰু এগৰাকী কৰ্মীৰ মাজত হোৱা কথোপকথন। উক্ত কথোপকথনত গগৈয়ে বিজেপি চৰকাৰৰ এজন মন্ত্ৰীৰ ওচৰত ২০ কোটি টকা দাবী কৰাৰ অভিযোগ উত্থাপিত হৈছে। লগতে ধন পৰিশোধ হ’লে বিজেপিৰ বিৰুদ্ধে ৰাজহুৱাভাৱে নিশ্চুপ থাকিব বুলিও কথোপকথনত উল্লেখ আছে। ইয়াৰ উপৰি কংগ্ৰেছ দলৰ ওচৰতো একে পৰিমাণৰ ধন দাবী কৰাৰ কথাও উত্থাপিত হৈছে ফোনকলটোত। যদিও ভাইৰেল ফোনকলটোত কোনো মন্ত্ৰীৰ নাম স্পষ্টভাৱে প্রকাশ পোৱা নাই, তথাপি ইয়াৰ বিষয়বস্তু ৰাজনৈতিক মহলত গভীৰ প্ৰতিক্ৰিয়াৰ সৃষ্টি কৰিছে।
এই প্রসংগত মন্ত্রী প্রশান্ত ফুকনে ফোনকলটো সামাজিক মাধ্যমত আপলোড কৰি স্পষ্টভাৱে গগৈৰ স্থিতি জানিবলৈ আহ্বান জনায়। তেওঁৰ মতে, ৰাজনীতিত স্বচ্ছতা আৰু জবাবদিহিতা অতি প্রয়োজনীয় আৰু এনে গুৰুতৰ অভিযোগৰ ক্ষেত্ৰত নীৰৱতা গ্রহণযোগ্য নহয়।
এই ঘটনাৰ মাজতে ৰাইজৰ দলৰ একাধিক নেতাৰ পদত্যাগে দলটোৰ ভিতৰৰ অসন্তুষ্টি আৰু আভ্যন্তৰীণ সংকটকো পোহৰলৈ আনিছে। ৰাজনৈতিক বিশ্লেষকসকলৰ মতে, ভাইৰেল ফোনকল আৰু পদত্যাগসমূহে দলটোৰ সংগঠনগত স্থিৰতা সম্পৰ্কে গুৰুতৰ প্ৰশ্ন উত্থাপন কৰিছে।
উল্লেখ্য যে এই পর্যন্ত গগৈয়ে ভাইৰেল ফোনকল অথবা ধনদাবীৰ অভিযোগ সন্দর্ভত কোনো আনুষ্ঠানিক প্রতিক্রিয়া দিয়া নাই। এনে অৱস্থাত মন্ত্রী ফুকনৰ মন্তব্যক কেন্দ্ৰ কৰি বিষয়টো অধিক তীব্র ৰূপ লৈছে আৰু আগন্তুক দিনসমূহত অসমৰ ৰাজনীতিত এই বিতর্ক কি ৰূপ ল’ব, সেয়া লক্ষ্যণীয় হৈ পৰিছে ৷
