Union Budget 2026:✒️ৰীতি অনুসৰি ২০২৬–২৭ আৰ্থিক বৰ্ষৰ কেন্দ্ৰীয় বাজেট অহা এক ফেব্ৰুৱাৰীত উত্থাপন কৰিব কেন্দ্ৰীয় অৰ্থমন্ত্রী নিৰ্মলা সীতাৰমণে। এইবাৰ এক ফেব্ৰুৱাৰী দেওবাৰে পৰাত, বাজেট উত্থাপন হ’ব নে নাই তাক লৈ কিছু জল্পনা চলিছিল। যদিও অৱশেষত সেই সন্দেহ দূৰ কৰিলে কেন্দ্ৰীয় সংসদীয় বিষয়ক মন্ত্ৰী কিৰেণ ৰিজিজুৱে।
তেওঁ জানিবলৈ দিয়ে যে কেন্দ্ৰীয় চৰকাৰৰ পৰামৰ্শ অনুসৰি ৰাষ্ট্ৰপতি দ্ৰৌপদী মুৰ্মুৱে বাজেট অধিবেশনৰ বাবে সংসদৰ দুয়োখন সদনৰ অধিবেশন আহ্বান কৰিছে। এই অধিবেশন ২৮ জানুৱাৰীৰ পৰা আৰম্ভ হ’ব আৰু দুই এপ্ৰিলত সমাপ্ত হ’ব।
ৰিজিজুৱে কয়, ২৮ জানুৱাৰীত ৰাষ্ট্ৰপতিয়ে সংসদৰ যৌথ অধিবেশনত ভাষণ দিব। তাৰ পিছদিনা অৰ্থাৎ ২৯ জানুৱাৰীত উত্থাপন কৰা হ’ব আৰ্থিক সমীক্ষা। বাজেট অধিবেশনৰ প্ৰথম পৰ্ব ২৮ জানুৱাৰীৰ পৰা ১৩ ফেব্ৰুৱাৰীলৈ চলিব। দ্বিতীয় পৰ্ব আৰম্ভ হ’ব ন মাৰ্চৰ পৰা আৰু দুই এপ্ৰিললৈ চলিব।
সাধাৰণতে দেওবাৰে সংসদৰ অধিবেশন নোহোৱা যদিও, অতীততো এনে ঘটনা ঘটিছে। ১৯৯৯ চনত অটল বিহাৰী বাজপেয়ী চৰকাৰৰ সময়ত অৰ্থমন্ত্রী যশৱন্ত সিন্হাই দেওবাৰে বাজেট উত্থাপন কৰিছিল।
উল্লেখযোগ্য যে ২০১৭ চনৰ আগলৈকে ফেব্ৰুৱাৰীৰ শেষ দিনত বাজেট উত্থাপন কৰাৰ নিয়ম আছিল। কিন্তু প্ৰধানমন্ত্ৰী নৰেন্দ্ৰ মোদীৰ চৰকাৰে সেই নিয়ম সলনি কৰি ফেব্ৰুৱাৰীৰ প্ৰথম দিনতেই বাজেট উত্থাপন কৰাৰ প্ৰথা আৰম্ভ কৰে।