Telangana:✒️গণহত্যা—মানুহ নহয়, পথকুকুৰৰ। তেলেংগানাত যোৱা এসপ্তাহত অন্তত ৫০০টা পথকুকুৰক বিষ দি হত্যা কৰা হৈছে বুলি গুৰুতৰ অভিযোগ উঠিছে। ৰাজ্যখনৰ একাধিক গাঁৱত এই নৃশংস ঘটনা সংঘটিত হৈছে।
সূত্ৰ অনুসৰি, শেহতীয়া গাঁও পঞ্চায়ত নিৰ্বাচনৰ সময়ত স্থানীয় বাসিন্দাসকলক পথকুকুৰৰ সংখ্যা নিয়ন্ত্ৰণৰ প্ৰতিশ্ৰুতি দিয়া হৈছিল। সেই প্ৰতিশ্ৰুতি পূৰণ কৰাৰ নামতে এই বৃহৎ পৰিসৰৰ কুকুৰ হত্যা সংঘটিত হৈছে নেকি বুলিও এতিয়া প্ৰশ্ন উত্থাপন হৈছে।
বিগত ১২ জানুৱাৰী, আদুলাপুৰম গৌতম (৩৫) নামৰ এজন পশুপ্ৰেমীয়ে থানাত অভিযোগ দাখিল কৰে। তেওঁৰ অভিযোগ অনুসৰি, পূৰ্বপৰিকল্পিতভাৱে পথকুকুৰ হত্যা কৰা হৈছে। কামাৰেড্ডি জিলাৰ ভবানীপেট, পালৱাঞ্চা, ফৰিদপেট, ৱাদি আৰু বন্দৰামেশ্বৰম গাঁৱত যোৱা দুই-তিনিদিনত অন্তত ২০০টা পথকুকুৰক বিষ দিয়া হৈছে। অভিযোগ অনুসৰি, এই ঘটনাত সংশ্লিষ্ট গাঁওসমূহৰ মুৰব্বীসকলে জড়িত।
আৰক্ষীয়ে জনোৱা মতে, পাঁচজন মুৰব্বী একেলগে কিশোৰ পান্ডে নামৰ এজন লোকক কুকুৰবোৰক বিষ দিবলৈ ভাড়াত নিযুক্ত কৰিছিল। কুকুৰবোৰক বিষৰ ইঞ্জেকচন দিয়া হৈছিল বুলি পুলিচে সন্দেহ প্ৰকাশ কৰিছে।
এটা মন্দিৰৰ কাষৰ পৰা একাধিক কুকুৰৰ মৃতদেহ উদ্ধাৰ কৰা হৈছে। লগতে, গাঁৱৰ বাহিৰত কুকুৰ হত্যা কৰি পুতি থোৱা মৃতদেহসমূহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰা হৈছে। বিষৰ প্ৰকাৰ জানিবলৈ ভিছাৰা নমুনা ফৰেনছিক লেব’ৰেটৰীলৈ পঠোৱা হৈছে।
উল্লেখযোগ্য যে যোৱা ডিচেম্বৰত নিৰ্বাচনৰ পূৰ্বে কেবাজনো প্ৰাৰ্থীয়ে ঘোষণা কৰিছিল—ভোটত জয়ী হ’লে পথকুকুৰ আৰু বান্দৰৰ উৎপাত দমন কৰা হ’ব। চলিত মাহত ইতিমধ্যে দুজনী মহিলা গাঁওৰ প্ৰধানসহ মুঠ নজনৰ বিৰুদ্ধে গোচৰ ৰুজু কৰা হৈছে, প্ৰায় ৩০০টা পথকুকুৰক বিষ দি হত্যা কৰাৰ অভিযোগত।
ইফালে, মঙলবাৰে এই পথকুকুৰৰ গণহত্যাৰ বিষয়টো সৰ্বোচ্চ ন্যায়ালয়ত উত্থাপিত হয়। শীৰ্ষ আদালতে যোৱা পাঁচ বছৰত পথকুকুৰৰ সংখ্যা নিয়ন্ত্ৰণৰ বিষয়ত গভীৰ উদ্বেগ প্ৰকাশ কৰি কয়—পথকুকুৰে কামুৰিলে, তেওঁলোকক খাদ্য যোগান ধৰা লোককো প্ৰয়োজন হ’লে দায়ী কৰা হ’ব পাৰে।
প্ৰয়োজন অনুসাৰে ৰাজ্যসমূহৰ ওপৰত কঠোৰ অৰ্থদণ্ড আৰোপৰ নিৰ্দেশো দিয়া হ’ব পাৰে বুলি আদালতে উল্লেখ কৰে।