অসমীয়াই মাঘ বিহু উদযাপন কৰাৰ সময়ত অন্ধ্রপ্রদেশত পেড্ডা পাণ্ডুগা নামৰ সংক্রান্তি উৎসৱ পালন কৰা হয়। মাঘ বিহুৰ দৰে পেড্ডা পাণ্ডুগাও উৎসৱো শস্য চপোৱাৰ উৎসৱ। এই উৎসৱৰ সময়তে ৰাজ্যখনৰ গুণ্টৰ জিলাৰ এজন লোকে জীয়েক-জোঁৱায়েকক ১৫৮ বিধ খাদ্য উপাচাৰেৰে আপ্যায়ন কৰি চর্চালৈ আহিছে।
জীয়েক-জোঁৱায়েকক আদৰিবলৈ এনে ব্যয়বহুল খাদ্য সম্ভাৰ যোগাৰ কৰা এই লোকজনৰ নাম বন্দনাপু মুৰালিকৃষ্ণ। তেওঁ আৰু তেওঁৰ পত্নীয়ে জীয়েক-জোঁৱায়েকক ৰাজকীয় খাদ্য-সম্ভাৰেৰে আদৰণি জনায়। মুৰালিকৃষ্ণ দম্পতীৰ কন্যা মৌনিকাৰ স’তে বিবাহপাশত আবদ্ধ হৈছে গোদাবৰী জিলাৰ ৰাজাহমুণ্ডীৰ শ্রীদও। যোৱা বছৰ দুয়োৰে বিবাহ সম্পন্ন হয়। গতিকে এইবাৰৰ সংক্রান্তি উৎসৱ নৱ দম্পতীৰ যুগ্ম জীৱনৰ ক্ষেত্রত প্রথম আছিল।
উল্লেখ্য যে সংক্রান্তি উৎসৱৰ জৰিয়েত পৰিয়ালৰ মৰম-চেনেহ, সম্মান আৰু আতিথ্যৰ আন্তৰিক প্ৰতিফলন ঘটোৱা হয়। এই উৎসৱ উদযাপন কৰোতে জোঁৱায়েকসকললৈ ৰজাৰ দৰে সন্মান প্ৰদৰ্শনৰ পৰম্পৰা আছে।
শহুৰেকৰ পৰিয়ালে জোঁৱায়েকসকলৰ সম্মানার্থে ভোজ-ভাতৰ আয়োজন কৰে, উপহাৰ আগবঢ়ায় আৰু উষ্ম আদৰণি জনায়। মুৰালিকৃষ্ণ দম্পতীয়ে তেওঁলোকৰ জোঁৱায়েক শ্রীদত্তৰ বাবেও এইবাৰ ১৫৮ বিধ খাদ্য উপাচাৰৰ আয়োজন কৰে।
সেইসমূহৰ মাজত মিঠাই, বিস্কুট, পৰম্পৰাগত আমিষ-নিৰামিষ খাদ্যও থাকে। চাৰিদিন ধৰি পালন কৰা পেড্ডা সময়ত এই দম্পতীয়ে মুৰুকুল, চেকালু, পাণ্ডুগা উৎসৱত জোঁৱায়েকক আদৰাৰ গাৰেলুকে ধৰি গুড়যুক্ত মিঠাইৰেও আপ্যায়ন কৰে।
এই দম্পতী হৈছে গুন্টুৰ জিলাৰ প্রখ্যাত সাংস্কৃতিক স্থান টেনালিৰ। টেনালি অঞ্চল কলা, নাটক, সাহিত্য আদিৰ চহকী পৰম্পৰাৰ বাবে বিখ্যাত। প্রাচীন বিজয়নগৰ ৰাজ্যৰ সময়ৰ বিখ্যাত কবি টেনালিৰাম আছিল এই অঞ্চলৰে। তেওঁ বিজয়নগৰ ৰাজদৰবাৰৰ বুদ্ধিদীপ্ত কবি আছিল।
টেনালি চহৰ মিঠাই বিশেষকৈ বেল্লাম জেলেপিৰ বাবেও বিখ্যাত। এই জেলেপি স্থানীয়ভাবে উপলব্ধ গুড়ৰ স’তে তৈয়াৰ কৰা হয়। এইবাৰ পেড্ডা পাণ্ডুগা উৎসৱৰ মূল পর্ব বৃহস্পতিবাৰে আছিল। এই উৎসব উপলক্ষে যোৱা ১০ জানুৱাৰীৰ পৰা চৰকাৰী বন্ধ চলি আছে। অহা ১৮ জানুৱাৰীতহে চৰকাৰী কার্যালয় আদি মুকলি হ’ব।
এই উৎসৱৰ সময়ত সূর্য দেৱতাক প্রার্থনা জনোৱা হয়। ৰবি খেতি ভাল হোৱাৰ বাবে কৃতজ্ঞতা প্ৰকাশ কৰি উৎসৱৰ কেইদিনত সূর্যক প্রার্থনা জনোৱা হয়। পেড্ডা পাণ্ডুগা উৎসৱৰ প্রথম দিনা ভোগিমান্টাল জ্বলোৱা হয়। এই ভোগিমান্টালো এক ধৰণৰ মেজি। মেজি জ্বলোৱা কাৰ্যই পুনৰুজ্জীৱিতকৰণক সূচায়। উৎসৱৰ দ্বিতীয় দিনা সূৰ্যই মকৰ সংক্ৰান্তিত প্ৰৱেশ কৰাক বুজায়। উক্ত দিনা মহিলাসকলে ঘৰৰ আগফাল সজাই-পৰাই দৃষ্টিনন্দন কৰে।
আনহাতে, উৎসৱৰ তৃতীয় দিনটোক গৰু-ম’হৰ প্ৰতি উৎসৰ্গা কৰা হয়। উক্ত দিনা পোহনীয়া প্রাণীক গা ধুওৱা হয়, সজাই-পৰাই তোলা হয় আৰু কৃষি ক্ষেত্ৰলৈ আগবঢ়োৱা অৱদানৰ বাবে এই প্রাণীসমূহক পূজা কৰা হয়। আনহাতে, উৎসৱৰ চতুৰ্থ দিনা সামূহিক ভোজ-ভাতৰ আয়োজন কৰা হয়। এই ভোজ-ভাতত আমিষ-নিৰামিষ দুয়োবিধ খাদ্যই থাকে। অৱশ্যে গুন্টুৰ জিলাকে ধৰি ৰাজ্যখনৰ বহু অঞ্চলৰ লোকৰ বাবে এই সংক্রান্তি উৎসৱ কেৱল এক শস্য চপোৱাৰ উৎসৱেই নহয়, এই উৎসৱ তেওঁলোকৰ বাবে এক গভীৰ পাৰিবাৰিক বান্ধোনৰ প্রতীকো।