Himalaya:✒️সেই দিন আৰু নাই! জলবায়ু পৰিৱৰ্তনৰ ধ্বংসাত্মক প্ৰভাৱত শীতৰ দিনতে শুকুলা বৰফ গলি উন্মুক্ত হৈছে হিমালয় পর্বত। একালত বৰফৰ স্বৰ্গৰূপে খ্যাত এই পর্বতে উদ্বেগজনকভাৱে বৰফৰ শুভ্ৰ আৱৰণী হেৰুৱাব ধৰিছে।
কৃত্রিম উপগ্ৰহই প্ৰেৰণ কৰা তথ্য আৰু পটভূমি পৰ্যবেক্ষণৰ জৰিয়তে বিশেষজ্ঞসকলে পোহৰলৈ অনা তথ্য অনুসৰি চলিত শীতৰ দিনতে পৰ্বতৰ চূড়া উন্মুক্ত হৈছে। অথচ শীতকালত হিমালয় পৰ্বতক বৰফৰ ডাঠ আৱৰণীয়ে ঢাকি থয়। পৃথিৱীখনক বিশেষকৈ দক্ষিণ এছিয়াক জীৱৰ বাসোপযোগী কৰি ৰখাত অন্যতম মূল ভূমিকা পালন কৰি অহা হিমালয়ৰ এই উদ্বেগজনক ৰূপান্তৰৰ কাৰণ ঋতুগত আসোঁৱাহ নহয় বুলি বিশেষজ্ঞসকলে আখ্যা দিছে।
তাৰ পৰিৱৰ্তে জলবায়ু পৰিৱৰ্তনেহে হিমালয়ত এই উদ্বেগজনক পৰিস্থিতিৰ সৃষ্টি কৰিছে। উল্লেখ্য যে গৰমৰ দিনত এক মাত্ৰাত হিমালয়ৰ হিমবাহ গলি দক্ষিণ এছিয়াৰ বহু নদ-নদীক পানীৰে পৰিপূৰ্ণ কৰে। এই নদ-নদীসমূহ অঞ্চলটোৰ জীৱকুলৰ জীৱনৰেখা স্বৰূপ।
সহস্ৰ বছৰ ধৰি হিমালয়ৰ বৰফ আৰু গ্লেচিয়াৰ সমূহে দক্ষিণ এছিয়াৰ প্ৰাকৃতিক জলধাৰৰূপে কাম কৰি আহিছে। শীতৰ দিনত এই পৰ্বতত বৰফ জমা হয় আৰু বসন্ত কালৰ পৰা গ্ৰীষ্ম কাললৈ ক্ৰমে বৰফৰ গলন আৰম্ভ হৈ নদ-নদীসমূহ পানীৰে পৰিপূৰ্ণ হয়। এই নদ-নদীসমূহে কৃষিকর্মত সহায় কৰে।
বৰষুণৰ পৰিমাণ হ্রাস পাবলৈ ধৰাৰ সময়ত এই নদ-নদীসমূহে কৃষিকৰ্মৰ বাবে জল উৎসত পৰিণত হয়। আনহাতে, হিমবাহসমূহে জাৰৰ দিনত অঞ্চলটোৰ নৈসমূহক পানীৰ যোগান ধৰি থাকে। যিহেতু জাৰৰ দিনতে হিমালয়ৰ বৰফ গলি শেষ হ’বলৈ ধৰিছে, গতিকে আগন্তুক সময়ত দক্ষিণ এছিয়া ভয়াৱহ পৰিস্থিতিৰ সন্মুখীন হোৱাৰ আশংকা প্রবল হৈছে।
এই সম্পৰ্কত আন্তঃচৰকাৰী আঞ্চলিক বৈজ্ঞানিক সংস্থা সংহত পর্বত উন্নয়নৰ আন্তর্জাতিক কেন্দ্র (আইচিআইএমঅ’ডি)ৰ বিগত ২০২৫ৰ তথ্য উল্লেখনীয়। উক্ত বৈজ্ঞানিক সংস্থাৰ মতে, বিগত বছৰত সমগ্র হিন্দুকুশ-হিমালয়ত বৰফৰ পৰিমাণ বিগত ২৩ বছৰৰ সৰ্বনিম্ন হয়।
বৰফৰ স্থায়িত্বও স্বাভাবিকতকৈ ২৩.৬ শতাংশ কম হয়। ২০২৫ৰ শীতকালত হিমালয় পর্বতত বৰফৰ আৱৰণী পাঁচটা শীতকালৰ ভিতৰত সর্বনিম্ন হয়। এই পৰিস্থিতিক বিজ্ঞানীসকলে বৰফৰ খৰাং আখ্যা দিছে। ইয়াৰ মূল কাৰণ হৈছে তুষাৰপাতৰ পৰিমাণ স্বাভাৱিকতকৈ হ্রাস পোৱা মধ্য আৰু পশ্চিম হিমালয়ৰ বহুত স্থানত শেহতীয়া কে’বাটাও শীতকালত তুষাৰপাত ১৯৮০-২০২০ৰ গড়তকৈ কম হয়।
ফলত শীতৰ দিনতে পৰ্বতৰ টিং আৰু খাঁজসমূহ উন্মুক্ত হৈছে। অথচ শীতকালত এই সমূহ বৰফৰে ঢাকি ৰাখিব লাগে। হিমালয়ৰ এই পৰিৱৰ্তনৰ কাৰণ তাপমাত্রা বৃদ্ধি, বৰষুণৰ গাঁথনি সলনি আৰু ধুমুহাৰ দুর্বল হোৱাটো বুলি ব্যাখ্যা কৰিছে বতৰ বিজ্ঞানী আৰু জলবায়ু বিজ্ঞানীসকলে।
উল্লেখ্য যে ভূমধ্য সাগৰীয় নিম্ন চাপৰ ফলত হিমালয়ত তুষাৰপাত ঘটে। শেহতীয়াভাৱে এই নিম্নচাপত ত্রুটি-বিচ্যুতি দেখা গৈছে। ইয়াৰ কাৰণ জলবায়ু পৰিৱৰ্তন বুলি বিজ্ঞানীসকলে ব্যাখ্যা কৰিছে। শীতকালতে হিমালয়ৰ বৰফৰ আৱৰণী হাসে দক্ষিণ এছিয়াত জটিল বতৰজনিত সমস্যা সৃষ্টি কৰাৰ আশংকা প্ৰবল হৈছে।
এনে সমস্যাৰ অন্যতম হৈছে খৰাং, বনজুই আৰু পৰিৱেশতন্ত্রগত চাপ। এনে পৰিস্থিতিৰ উদ্ভৱ হ’লে খাদ্য শস্যৰ উৎপাদন হাস হোৱাটো নিশ্চিত। গতিকে হিমালয়ৰ এই অস্বাভাৱিক পৰিৱৰ্তনক লৈ উদ্বিগ্ন হৈছে জলবায়ু পৰিৱৰ্তন সম্পৰ্কীয় অধ্যয়নৰ স’তে জড়িত আন্তর্জাতিক সংস্থা আইপিচিচি। সংস্থাটোৱে আঙুলিয়াই দিছে যে তাপমাত্রা বৃদ্ধিয়ে হিমালয়ৰ এই অস্বাভাৱিক পৰিৱৰ্তনৰ কাৰণ। এই পৰিৱৰ্তনৰ গভীৰ পৰিণতি আছে বুলিও সংস্থাটোৱে সতর্ক কৰি দিছে।