AAASA:
কোকৰাঝাৰৰ কাৰিগাঁৱৰ গৌৰীনগৰ অঞ্চলত যোৱা নিশা সংঘটিত ভয়াৱহ ঘটনাক কেন্দ্র কৰি ৰাজ্যজুৰি প্ৰতিক্ৰিয়াৰ সৃষ্টি হৈছে। সদৌ অসম আদিবাসী ছাত্ৰ সন্থা (আছা)ৰ সভাপতি ৰেজান হৰো আৰু সাধাৰণ সম্পাদক দেবেন ওৰাঙে এই হিংসাত্মক ঘটনাক তীব্ৰ গৰিহণা দি কয় যে যোৱা নিশা প্রায় আঠ বজাত চাৰিজন বড়ো যুৱকে এখন স্ক’ৰপিঅ’ বাহনৰে কোকৰাবাৰৰ গৌৰীগাঁৱত প্ৰৱেশ কৰোতে গাঁওবাসীয়ে সোধপোছ কৰে। তেতিয়া স্কৰ’পিঅ’ বাহনত থকা যুৱক চাৰিজনে পলাবলৈ চেষ্ট কৰে আৰু মানসিং ৰোডত কে’বাজনো যুৱকক মহটিয়াই স্ক’ৰপিঅ’ বাহনখন দুর্ঘটনাত পতিত হয়। সেই সময়ত গাঁওখনৰ ৰাইজে যুৱক চাৰিজনক মাৰধৰ কৰাত চিকনা জীহালীও বিসমিট নামৰ যুৱকজনে মৃত্যুক সাবটি লয়। আছাৰ নেতাদ্বয়ে কয়, ‘যুৱকজনৰ মৃত্যুত আছাই দুখ প্রকাশ কৰে। ইয়াৰ পাছত মঙলবাৰে এই ঘটনাক একাংশই হিংসাত্মক ৰূপ দি কোকৰাঝাৰৰ বিভিন্ন অঞ্চলত দোকান-পোহাৰ ভাঙি দিয়াৰ লগতে কাৰিগাঁৱৰ আছাৰ আঞ্চলিক কার্যালয় আৰু অঞ্চলটোৰ ২৬টা গৃহত অগ্নিসংযোগ কৰা ঘটনাক তীব্র গৰিহণা দিছো। বিবৃতিটোত দুষ্কৃতিকাৰীসকলক ১২ ঘণ্টাৰ ভিতৰত কৰায়ত্ত কৰি কঠোৰ শাস্তি প্রদানৰ দাবী জনায় আছাৰ নেতাদ্বয়ে। অন্যথা ২৪ ঘণ্টা অসম বন্ধ ঘোষণা কৰিবলৈ বাধ্য হ’ব বুলি সকীয়াই দিয়ে।
বিবৃতিত তেওঁলোকে কয়, ‘দুষ্কৃতিকাৰীসকলে নির্দোষী লোকসকলক হাৰাশাস্তি কৰাটো আছাই কেতিয়াও সহ্য নকৰে। প্ৰশাসন আৰু আৰক্ষী-সেনাৰ চকুৰ সন্মুখতে কিদৰে আজি ২৬টাকৈ গৃহত অগ্নিসংযোগ কৰা হ’ল। যদি এই ঘটনা শীঘ্ৰে ৰোধৰ বাবে প্রশাসনে কাৰ্যকৰী ব্যৱস্থা গ্রহণ নকৰে তেন্তে সংগঠনটোৱে বুধবাৰৰ পৰা ৰাজ্যজুৰি ৰাজপথত ওলাবলৈ বাধ্য হ’ব আৰু ইয়াৰ পৰা উদ্ভৱ হ’ব পৰা যিকোনো পৰিস্থিতিৰ বাবে প্রশাসন জগৰীয়া হ’ব।’ লগতে বিবৃতিত স্ক’ৰপিত’ বাহনৰ খুন্দাত গুৰুতৰভাৱে আহত সুনীল মুর্মুৰ মৃত্যুত আছাই দুখ প্ৰকাশ কৰাৰ লগতে উচ্চ তদন্ত দাবী কৰে। তদুপৰি কয়, ‘কি কাৰণত বাহনখন নিশা আঠ বজাত গৌৰীনগৰ প্ৰৱেশ কৰিছিল এই সম্পূর্ণ ঘটনা শীঘ্ৰে তদন্ত কৰিবলৈ আমি দাবী জনাইছো আৰু সকলো পক্ষকে শান্তি-শৃংখলা বজাই ৰাখিবলৈ আহ্বান জনাইছো।
ইপিনে, এই ঘটনাক লৈ প্রতিক্রিয়া প্রকাশ কৰি সদৌ চাওতাল ছাত্ৰ সন্থাৰ উপ-সভাপতি দুর্গা ছোৰেনে কয়, ‘সোমবাৰৰ ঘটনাটো এক দুর্ঘটনাক কেন্দ্ৰ কৰি সংঘটিত হোৱা ঘটনা। যিসকলে আইন হাতত তুলি লৈছিল তাৰ ব্যৱস্থা আইনে ল’ব।’ আৰক্ষী সষ্টম হৈ আছে বুলি উল্লেখ কৰি ছোৰেনে কয় যে নিশাই ১৯জন লোকক গ্ৰেপ্তাৰ কৰা হৈছে। ছোৰেনে কয়, ‘দুর্ঘটনাত গুৰুতৰভাৱে আহত হোৱা সুনীল মুর্মুৰ মৃত্যু হৈছে। ইয়াৰ মাজতে কোকৰাঝাৰৰ বিধায়ক লৰেন্স ইছলাৰীৰ সাম্প্রদায়িক তথা উচটনিমূলক বক্তব্যৰ পাছতে পৰিস্থিতি উত্তপ্ত হয়।’ কোকৰাঝাৰৰ সাংবাদিকসকলে পক্ষপাতমূলক বাতৰি পৰিবেশন কৰাৰ বাবে পৰিস্থিতি বেয়া হোৱা বুলি ছোৰেনে দাবী কৰি সংবাদ মাধ্যমক সংযম ৰক্ষা কৰি বাতৰি পৰিৱেশন কৰিবলৈ আহ্বান জনায়। তেওঁ লগতে কয়, ‘মঙলবাৰে কোকৰাঝাৰত য’তে-ত’তে আদিবাসী লোকক আক্রমণ কৰিছে, আদিবাসীৰ ঘৰ জ্বলোৱা, দোকান জ্বলোৱা, অনুষ্ঠান ধ্বংস কৰা ঘটনা সংঘটিত হ’ল। এজন লোকক ন্যায় দিবলৈ এই অপ্রীতিকৰ পৰিস্থিতিৰ সৃষ্টি কৰিছে। আৰক্ষীৰ ওপৰত বিশ্বাস নকৰি নিজে হাতত আইন তুলি লৈছে। ইয়াৰ ওপৰত আৰক্ষীয়ে কঠোৰ ব্যৱস্থা ল’ব লাগিব। আমি এই দাবী জনাইছো।’
সকলো পক্ষকে শান্তি-শৃংখলা বক্ষা কৰিবলৈ আহ্বান জনাই তেওঁ লগতে কয়, ‘চিৰাঙৰ গৰুভাষাত চাওতাল লোক এজনক খুকুৰিৰে আঘাত কৰা ঘটনাৰ ন্যায় বিচাৰি চাওতালসকলেও আন্দোলন কৰিছিল। কিন্তু কাকো আক্রমণ কৰা নাছিল, কোনো ঘৰ জ্বলোৱা নাছিল।’ চাওতাল ছাত্র সন্থাৰ উপ-সভাপতি ছোৰেনে কয় যে চাওতাল ছাত্র সন্থাই প্রশাসনক সহযোগিতা কৰাৰ বাবে বদ্ধপৰিকৰ। বড়ো জনগোষ্ঠীৰ নেতৃত্বক এই ঘটনা নিয়ন্ত্রণ কৰিবলৈ আহ্বান জনাই ছোৰেনে কয়, ‘আদিবাসী লোকসকল এতিয়াও শান্ত হৈ আছে। আমি সকলোৱে মিলি পৰিস্থিতি নিয়ন্ত্রণ কৰিব লাগিব। আইন হাতত তুলি লৈ কাৰোবাৰ ঘৰ জ্বলোৱা বা মাৰপিট কৰাৰ ঘটনা কোনোপধ্যে গ্রহণযোগ্য নহয়। বিদ্যালয় ছুটৰ পাছত আদিবাসী ছাত্র-ছাত্রী ঘৰলৈ যাব পৰা নাই। বিদ্যালয়ত আবদ্ধ হ’বলগীয়া হৈছে।’
ইপিনে, সোমবাৰৰ সংঘটিত হিংসাত্মক ঘটনা আৰু তাৰ পাছত সৃষ্টি হোৱা পৰিস্থিতিৰ গৰিহণা দিয়ে আদিবাসী কল্যাণ পৰিষদৰ অধ্যক্ষ অসীম হাছদাই। তেওঁ কয় যে এটা উৰা বাতৰিক কেন্দ্ৰ কৰি হঠাতে সংঘটিত হোৱা দুর্ভাগ্যজনক ঘটনাৰ আলম লৈ সাম্প্রদায়িক সংঘাতৰ পৰিৱেশ সৃষ্টিৰ অপচেষ্ট কৰা সকলৰ বিৰুদ্ধে প্রশাসনে কঠোৰ ব্যৱস্থা গ্রহণ কৰিব লাগে। শ্ৰীৰামপুৰৰ নিজ বাসভৱনত এক সংবাদমেলত তেওঁ কয়, ‘ ঘটনটো সংঘটিত হৈছে এটা উৰা বাতৰিক কেন্দ্ৰ কৰি। উৰা বাতৰিৰ ওপৰত ভিত্তি কৰি এখন স্ব’বপিতা’ বাহনত চুৰি কৰি অনা গৰু থকা বুলি সন্দেহ কৰি স্ক’ৰপিঅ’ বাহনখন আটক কৰিবলৈ যাওতে গাড়ীৰ খুন্দাত সুনীল মুর্মু নামৰ এজন যুৱক গুৰুতৰভাৱে আহত হয়। ইয়াৰ পাছত একাংশ উত্তেজিত ৰাইজ গাড়ীখনক আটক কৰিবলৈ গাড়ীৰ পিছে পিছে দৌৰি যায় আৰু গাড়ীখনক লক্ষ্য কৰি শিল দলিয়ায়। স্ক’ৰপিঅ’ৰ চালকজনে নিয়ন্ত্রণ হেৰুওৱাত গাড়ীখন দুর্ঘটনাগ্রস্ত হয়। উত্তেজিত ৰাইজে গাড়ীৰ আৰোহীক আক্ৰমণ কৰাত ৰাজা বিসমুটি নামৰ এজন লোকৰ মৃত্যু হয়। ইয়াৰ পাছতে তীব্র উত্তেজনাৰ সৃষ্টি হয়।’ তেওঁ পুনৰ কয়, ‘আদিবাসীৰ আক্রমণত এজন বড়ো জনগোষ্ঠীৰ লোকৰ মৃত্যু হোৱাৰ ঘটনাক লৈ সৃষ্টি হোৱা উত্তেজনাপূর্ণ পৰিৱেশত মঙলবাৰে পুৱাৰ পৰা কাৰিগাঁৱত বাছি বাছি নিৰীহ আদিবাসীৰ ওপৰত চলোৱা হয় তীব্র আক্রমণ। আদিবাসীৰ দোকান-পোহাৰ ভাঙি লণ্ডভণ্ড বৰাৰ উপৰি আদিবাসী গাঁৱত ভয়-ভীতি প্রদর্শন কৰি এক সাম্প্রদায়িক সংঘাতৰ পৰিৱেশ সৃষ্টি হোৱাটো কোনোপধ্যেই কাম্য নহয়। ঘটনাৰ লগত জড়িত উভয়পক্ষক চিনাক্ত কৰি প্ৰশাসনে আইনগত ব্যৱস্থা গ্রহণ কৰাৰ বাবে আমি দাবী জনাইছো আৰু উক্ত বিষয়টোৰ ওপৰত সাম্প্রদায়িক ৰঙ দিব বিচৰা সকলকো কঠোৰ হাতে দমন কৰাৰ বাবে প্রশাসনক দাবী জনাইছো।’ একাংশই সামাজিক মাধ্যমত এই ঘটনাক কেন্দ্ৰ কৰি উত্তেজনাপূর্ণ বাতৰি পৰিৱেশন কৰি পৰিস্থিতি উত্তেজিত কৰিব বিচাৰিছে বুলি উল্লেখ কৰি হাছদাই ইয়াক নিয়ন্ত্রণ কৰিবলৈ প্ৰশাসনক দাবী জনায়।
আদিবাসী দল-সংগঠন আৰু বড়ো জনগোষ্ঠীয় দল-সংগঠনক ধৈর্য সহকাৰে পৰিস্থিতি মোকাবিলা কৰি শান্তিৰ পৰিৱেশ অটুট ৰাখিবলৈ আহ্বান জনায়। সংবাদমেলত আদিবাসী কল্যাণ আৰু উন্নয়ন পৰিষদৰ কাৰ্যবাহী সদস্য চিনেশ হেমব্রমে দুয়োপক্ষক সংযমী হ’বলৈ আহ্বান জনায় কয় যে কোনো তৃতীয় পক্ষই যাতে বড়ো আৰু আদিবাসীৰ মাজত সংঘাতৰ পৰিৱেশ সৃষ্টি কৰিব নোৱাৰে তাৰ প্ৰতি দুয়োপক্ষই সষ্টম হ’ব লাগিব।
