Five States Assembly Election :
অসমসহ দেশৰ পাঁচখন ৰাজ্যত অনুষ্ঠিত হ’বলগীয়া বিধানসভা নিৰ্বাচনৰ দিন অহা মার্চত ঘোষণাৰ সম্ভাৱনা আছে। এই নিৰ্বাচনৰ বাবে উক্ত ৰাজ্য কেইখনত নিয়োগ
কৰিবলগীয়া কেন্দ্ৰীয় পৰ্যবেক্ষকসকলৰ লগত অনুষ্ঠিত এখন বৈঠকত এই কথা সদৰী কৰে দেশৰ মুখ্য নির্বাচন আয়ুক্ত জ্ঞানেশ কুমাৰে।
উল্লেখ্য যে অসমৰ লগতে কেৰালা, পুডুচেৰী, তামিলনাডু আৰু পশ্চিমবংগত নির্বাচন – অনুষ্ঠিত হ’ব। কেন্দ্রীয় পর্যবেক্ষকসকলক সম্বোধন কৰি কুমাৰে নিৰ্বাচন স্বচ্ছ-নিকাভাবে অনুষ্ঠিত কৰাটো নিশ্চিত কৰিবলৈ সকলোকে দায়িত্ব অর্পণ কৰে। শী নির্বাচন অনুষ্ঠিত হ’বলগীয়া ৮২৪টা সমষ্টিৰ দায়িত্বত থাকিবলগীয়া প্রতিজন কেন্দ্রীয় পর্যবেক্ষকক ইয়াৰ বাবে সক্ৰিয়তাৰে কাম কৰিবলৈ আহ্বান জনায়।
এই সভাতে নির্বাচন আয়ুক্ত ড: বিবেক যোশীয়ে ‘ভোটাৰ ইনফর্মেছন শ্লিপ’ (ভিআইএছ) নিৰ্ধাৰিত সময়ৰ ভিতৰত বিতৰণ নিশ্চিত কৰিবলৈ পর্যবেক্ষকসকলক পৰামৰ্শ দিয়ে। ভোটদানৰ দিনটোত ভোটাৰসকল কোনো ধৰণৰ অসুবিধাত যাতে পৰিব নোৱাৰে, সেই দায়িত্বও পর্যবেক্ষকসকলে সুচাৰুৰূপে পালন কৰিব লাগিব বুলি তেওঁ কয়। সর্বোপৰি পৰ্যবেক্ষকসকলক নিৰ্বাচনৰ সকলো ধৰণৰ খুঁটি-নাটি মাৰি আইন অনুসৰি কাম কৰিব পৰাকৈ সাজু হোৱাৰ পৰামৰ্শও এই বৈঠকত দিয়া হয়। ভোটাৰৰ অভিযোগ, ৰাজনৈতিক দলবোৰৰ ওজৰ-আপত্তিক সমান গুৰুত্বৰে লৈ কাম কৰিবলৈয়ো দুয়োজনে আহ্বান জনায়।
উল্লেখ্য যে নির্বাচন আয়োগে পাঁচখন ৰাজ্যত ১,৪৪৪ গৰাকী বিষয়াক কেন্দ্রীয় পর্যবেক্ষকৰূপে নিযুক্তি দিছে। ইয়াৰে ৭১৪ গৰাকী সাধাৰণ পর্যবেক্ষক, ২৩৩ গৰাকী আৰক্ষী পর্যবেক্ষক আৰু ৪৯৭ গৰাকী ব্যয় পর্যবেক্ষক।