ৰাজ্যৰ ৰাজধানী চহৰ গুৱাহাটীৰ হাঁওফাঁও স্বৰূপ আমচাং বন্যপ্রাণী অভয়াৰণ্যৰ গছ আঁতৰাই ৰিং ৰোড নিৰ্মাণৰ বাবে ভূমি মোকলোৱা তথা ৰূপান্তৰৰ এক হঠকাৰী আঁচনি ৰাজ্য চৰকাৰে গ্ৰহণ কৰাৰ তথ্য পোহৰলৈ আহিছে।
অথচ একেখন চৰকাৰে প্ৰধানমন্ত্ৰী নৰেন্দ্ৰ মোদীৰ জন্মদিনত গছ ৰোপণৰ নামত বিগত সময়ত ৰাজকোষৰ বিপুল ধন ব্যয় কৰিছে। তদুপৰি গোলকীয় উষ্ণতা বৃদ্ধি, জলবায়ু পৰিৱৰ্তনৰ অশুভ প্ৰভাৱ পৰাৰ আশংকাও বৃদ্ধি পোৱাৰ সময়তে ৰাজ্য চৰকাৰে বনাঞ্চলখন ধ্বংস কৰাৰ আঁচনি কাৰ্যকৰী কৰিবলৈ লৈছে।
এই ধ্বংস কাৰ্য সম্পাদনৰ বাবে গুৱাহাটীৰ বন্য প্ৰাণী সংমণ্ডলৰ বশিষ্ঠস্থিত মাণ্ডলিক বন বিষয়া (ডিএফঅ’)সম্প্ৰতি বনাঞ্চলখনৰ গছ আঁতৰোৱাৰ বাবে ঠিকা দিবলৈ বন বিভাগৰ ঠিকাদাৰৰ পৰা ই-নিবিদা বিচাৰি বিজ্ঞাপন প্রকাশ কৰিছে।
এই নিবিদাৰ প্রাক্কলন মূল্য হৈছে ৬৫,১৫,১৬৫ টকা। এই নিবিদা জাননীত ৰিং ৰোড নিৰ্মাণৰ স্বাৰ্থত বন্যপ্রাণী অভয়াৰণ্যখনৰ গছ-বন আঁতৰ কৰিবলৈ ঠিকা দিয়া হ’ব বুলি স্পষ্টভাবে উল্লেখ আছে। জাননীখনত এই কথাও উল্লেখ আছে যে গছ আঁতৰোৱাৰ কাম আবণ্টনৰ পৰা ৯০ দিনৰ ভিতৰত কাম সম্পূৰ্ণ কৰিব লাগিব।
গতিকে অভয়াৰণ্যখনৰ লাখ লাখ গছ কাটি পেলোৱাটো একপ্ৰকাৰ নিশ্চিত হৈছে।আনহাতে, চৰকাৰৰ হঠকাৰী কাৰ্যক লৈ তীব্র প্রতিক্রিয়া প্রকাশ কৰিছে কৃষক মুক্তি সংগ্রাম সমিতিয়ে। এক বিবৃতিত কৃষক মুক্তিৰ সাধাৰণ সম্পাদক বিদ্যুৎ শইকীয়াই অভিযোগ উত্থাপন কৰে যে ৰাজ্যিক বন বিভাগে আমচাং অভয়াৰণ্যৰ প্ৰায় ৭.১২ হেক্টৰ অৰ্থাৎ প্রায় ৫৩ বিঘা ভূমি অৰণ্য দখল কৰিবলৈ নিবিদা আহ্বান কৰিছে।
বিষয়টো সন্দর্ভত কৃষক মুক্তি সংগ্ৰামৰ নেতাজনে লগতে কয়, ‘ৰিং ৰোড নিৰ্মাণৰ নামত ধ্বংস কৰিবলৈ ওলোৱা এই অভয়াৰণ্য হাতী, বাঘৰ লগতে বহু আপুৰুগীয়া জীৱ-জন্তুৰ বাসস্থান। ধ্বংস কৰিলেহে উন্নয়ন সাধন কৰিব পাৰি বুলি চৰকাৰে প্ৰদান কৰিবলৈ বিচৰা ধাৰণা আমি মানিব নোৱাৰো। বান-গৰাখহনীয়াত ভূমিহীন হোৱা বহু খিলঞ্জীয়া পৰিয়ালে ২০১৭-১৮ বৰ্ষৰ সময়ছোৱাত এই অভয়াৰণ্যৰ কাষে কাষে নিজৰ ঘৰ সাজিছিল। অভয়াৰণ্যৰ ভূমি দখলৰ নাম দি উচ্ছেদৰ নামত এইসকল খিলঞ্জীয়া পৰিয়ালৰ ঘৰ-দুৱাৰ ভাঙি মুকলি আকাশৰ তলত থাকিবলৈ বাধ্য কৰোৱা হ’ল। সেই একেখন চৰকাৰে এতিয়া ৰিং ৰোড নিৰ্মাণৰ বাবে আমচাং অভয়াৰণ্যৰ শ শ জোপা গছ ধ্বংস কৰিবলৈ নিবিদা আহ্বান কৰিছে।’