Rajya sabha Election:
ৰাজ্যসভাৰ ৩৭খন আসনৰ নিৰ্বাচনৰ দিন ঘোষণা ৷ ১৬ মার্চত অনুষ্ঠিত হ’ব নির্বাচন ৷ অসমৰো তিনিখন আসনৰ বাবে হ’ব নির্বাচন। অহা ৯ এপ্ৰিলত অন্ত পৰিব অসমৰ তিনি সাংসদ ক্ৰমে ভূৱনেশ্বৰ কলিতা, অজিত কুমাৰ ভূঞা আৰু ৰামেশ্বৰ তেলীৰ কাৰ্যকাল । এই তিনিখন আসনৰ দুখন বৰ্তমান বিজেপিৰ দখলত থকাৰ বিপৰীতে এখন আসন আছে বিৰোধীৰ দখলত ।
উল্লেখ্য যে এইবাৰ তিনিওখন আসনে বিজেপি নেতৃত্বাধীন মিত্ৰজোঁটে দখল কৰাৰ পূৰ্ণ সম্ভাৱনা আছে। এখনো আসন দখল কৰিবলৈ বৰ্তমান সময়ত প্ৰয়োজনীয় বিধায়কৰ সংখ্যা নাই বিৰোধী দল সমূহৰ । ইতিমধ্যে সমাগত বিধানসভা নিৰ্বাচনৰ পূৰ্বেই বিজেপি-অগপমুখী বৰ্তমানৰ ৭ জনকৈ বিৰোধী বিধায়কে শাসকীয় পক্ষৰ প্ৰাৰ্থীক ৰাজ্যসভা নিৰ্বাচনত ভোট দিয়াৰ প্ৰৱল সম্ভাৱনা আছে । এনে প্ৰেক্ষাপটত
পূৰ্বতকৈও ৰাজ্যসভা নিৰ্বাচনত এইবাৰ সংখ্যা হ্ৰাস পাব বিৰোধীৰ বিধায়কৰ সংখ্যা । যাৰ পৰিপ্ৰেক্ষিতত হয়তো শেষ মুহূৰ্তত বিৰোধী দলে ৰাজ্যসভাত প্ৰাৰ্থী দিয়াৰ সম্ভাৱনা কম । আটাইকেইখন আসনতে শাসকীয় দলৰ প্ৰাৰ্থীয়ে বিনা প্ৰতিদ্বন্দিতাৰে বিজয়ী হোৱাৰ সম্ভাৱনাই অধিক ।
উল্লেখযোগ্য ৯ মাৰ্চতে সামৰণি পৰিব পাৰে ৰাজ্যসভা নিৰ্বাচনৰ প্ৰক্ৰিয়া । মনোনয়ন পত্ৰ প্ৰত্যাহাৰৰ অন্তিম দিনাই স্পষ্ট হৈ পৰিব ১৬ মাৰ্চত ভোটগ্ৰহণৰ প্ৰয়োজনীয়তা থাকিব নে নাই । যদি নাথাকে তেতিয়া ভোটদানৰ পূৰ্বেই ঘোষণা হব বিজয়ী প্ৰাৰ্থীৰ নাম ।
মনকৰিবলগীয়া যে ৯ মাৰ্চত ৰাজ্যসভা নিৰ্বাচনৰ প্ৰক্ৰিয়াৰ সমাপ্তি ঘটিলে ১০ মাৰ্চত ঘোষণা হব পাৰে অসমৰ বিধানসভাৰ নিৰ্বাচনৰ দিন I