Supreme Court:
বিৰোধী শিবিৰৰ লগতে বিভিন্ন পক্ষৰ প্ৰবল বিৰোধিতাৰ মাজতো নৰেন্দ্ৰ মোদী চৰকাৰে গৃহীত কৰা নাগৰিকত্ব সংশোধনী আইন (কা), ২০১৯ৰ আইনী বৈধতাক লৈ অহা পাঁচ মে’ৰ পৰা উচ্চতম ন্যায়ালয়ে ধাৰাবাহিকভাৱে শুনানি গ্রহণ কৰিব। এই বিতর্কিত আইনৰ আইনী বৈধতাক প্রত্যাহ্বান জনাই সদৌ অসম ছাত্র সন্থা (আছু), অসম জাতীয়তাবাদী যুৱ-ছাত্ৰ পৰিষদ, কংগ্ৰেছ নেতা দেৱব্ৰত শইকীয়া, অসম সম্মিলিত মহাসংঘৰ মতিউৰ ৰহমান, অসম এডভ’কেট এছ’চিয়েছন, ইণ্ডিয়ান ইউনিয়ন মুছলিম লীগ, জ্যেষ্ঠকংগ্রেছ নেতা জয়ৰাম ৰমেশ, তৃণমূল কংগ্ৰেছৰ সাংসদ মহুৱা মৈত্র, এআইএমআইএমৰ আছাদউদ্দিন ওৱেইছি আদি উচ্চতম ন্যায়ালয়ৰ দ্বাৰস্থ হৈছে।
মুঠতে ২৪৮ টি বিভিন্ন দল-সংগঠনে বিতর্কিত আইনখনৰ আইনী বৈধতাক প্রত্যাহ্বান জনাই ২০১৯তে সর্বোচ্চ ন্যায়ালয়ত গোচৰ ৰুজু কৰে। অৱশেষত এইসকলৰ আবেদনৰ ভিত্তিত আজি দেশৰ মুখ্য ন্যায়াধীশ সূর্য কান্ত, ন্যায়াধীশ জয়মাল্য বাগচী আৰু ন্যায়াধীশ বিপুল এম পাঞ্চ’লীৰ এখন বিচাৰপীঠে শুনানি গ্রহণ কৰে। শুনানি গ্ৰহণৰ অন্তত তিনিজনীয়া বিচাৰপীঠে নির্দেশনা জাৰি কৰি কয় যে শুনানিৰ সময় দুভাগত বিভক্ত হ’ব। অসম আৰু ত্ৰিপুৰাৰ বিষয়বোৰৰ বাবে শুনানি কালত সুকীয়া সময় ধার্য কৰা হ’ব। একেদৰে দেশৰ আন অংশৰ বিষয়বোৰৰ বাবে সামগ্রিকভাবে সুকীয়া সময় নির্ধাৰণ কৰা হ’ব বুলি ন্যায়ালয়ে নির্দেশনা জাৰি কৰে। এই শুনানি অহা পাঁচ মে’ৰ পৰা ধৰাবাহিকভাবে গ্রহণৰো সিদ্ধান্ত লয় ন্যায়ালয়ে। আজিৰ শুনানিত ন্যায়ালয়ত আছুৰ সভাপতি উৎপল শর্মা, সাধাৰণ সম্পাদক সমীৰণ ফুকন আৰু আছু-নেছ’ৰ উপদেষ্ট সমুজ্জ্বল ভট্টাচার্য উপস্থিত থাকে। এই কথা এক বিবৃতিযোগে সংগঠনটোৱে জনাইছে। আছুৰ হৈ ন্যায়ালয়ত অসম আৰু উত্তৰ-পূৰ্বাঞ্চলৰ বাস্তৱ পৰিস্থিতি সন্দৰ্ভত যুক্তি প্রদর্শন কৰে জ্যেষ্ঠ অধিবক্তা মালবিকা ত্রিবেদীয়ে। আছুৱে কয় যে নাগৰিকত্ব সংশোধনী আইনে অসম তথা উত্তৰ-পূবৰ বিস্তৰ ক্ষতিসাধন কৰিছে।
আনহাতে, কা’ ৰ আইনী বৈধতাক লৈ ন্যায়ালয়ে অহা পাঁচ মে’ৰ পৰা গ্ৰহণ কৰিবলগীয়া শুনানিক লৈ উৎফুল্লিত হ’ব লগা একো নাই বুলি মন্তব্য কৰিছে অসম সম্মিলিত মহাসংঘৰ কাৰ্যকৰী সভাপতি তথা অন্যতম গুচৰীয়া মতিউৰ ৰহমানে। অতি কৌশলেৰে অসমৰ আগন্তুক বিধানসভা নিৰ্বাচনৰ পাছলৈ কা-ৰ শুনানিৰ দিন ধার্য কৰা হ’ল বুলি ক্ষোভ প্রকাশ কৰি ৰহমানে কয় যে এয়া হৈছে ন্যায় ব্যৱস্থাৰ এক প্রহসন। এই সম্পর্কত তেওঁ আৰু কয়, ‘কা-ৰ দ্বাৰা ইতিমধ্যে নাগৰিকত্ব লাভ কৰা বিদেশী নাগৰিকসকলে বিজেপিকে ভোট দিব। সেয়েহে কা-ৰ শুনানি অসমৰ বিধানসভা নির্বাচন হৈ নতুন চৰকাৰ গঠন হোৱাৰ পাছত পাঁচ মে’ৰ পৰা অনুষ্ঠিত কৰিব বুলি ঘোষণা কৰিছে। ইয়াত উৎফুল্লিত হোৱাৰ তিলমানো কথা নাই। বৰঞ্চ চৰকাৰৰ ষড়যন্ত্র মর্মেই বর্তমানে ভান্তৰ ন্যায় ব্যবস্থা যে পৰিচালিত হৈ আছে সেয়াহে আকৌ এবাৰ প্রমাণিত হ’ল।’
ইপিনে, এই গোচৰৰ অন্যতম গুচৰীয়া জাতীয়তাবাদী যুৱ-ছাত্ৰ পৰিষদৰ সভাপতি পলাশ চাংমাই আৰু সাধাৰণ সম্পাদক বীজন বায়নে কয় যে দেশৰ সংবিধান বিৰোধী, অসম চুক্তি বিৰোধ আৰু অসমীয়া জাতি বিদ্বেষী নাগৰিকত্ব সংশোধনী আইনৰ বিৰোধিতাৰে পৰিষদে ধাৰাবাহিকভাবে প্রতিবাদী কার্যসূচী ৰূপায়ণ কৰি অহাৰ সমান্তৰালভারে ন্যায়িক খুঁজো অব্যাহত ৰাখিছে। ১৯৭১ৰ পাছত অহা ধর্ম-বর্ণ নির্বিশেষে সকলো বিদেশীয়ে অসম ত্যাগ কৰিবই লাগিব বুলি পৰিষদে স্পষ্ট কৰি দিছে।