Barpeta Satra Doul Mohotsav:
মহাপুৰুষ শ্রীশ্রী মাধৱদেৱ স্থাপিত ঐতিহ্যমণ্ডিত বৰপেটা সত্ৰত সোমবাৰৰ পৰা মহা আড়ম্বৰপূৰ্ণভাৱে সত্ৰীয়া পৰা আৰু ৰীতি-নীতিৰে আৰম্ভ হৈছে শ্রীশ্রী কৃষ্ণৰ দৌলযাত্রা মহোৎসব। সত্ৰনগৰী বৰপেটাবাসীয়ে কৃষ্ণ প্রেমত আপ্লুত হৈ পালন কৰা এই দৌলযাত্রা মহোৎসৱ এইবাৰ পাঁচদিনীয়াকৈ পালন কৰা হয় ৷ মঙলবাৰে আছিল বহৃৎসৱ অর্থাৎ গন্ধযাত্রা। নক্ষত্র ফল গণনা মতে ফাগুনৰ পূৰ্ণিমা তিথিত অনুষ্ঠিত দৌলযাত্রা মহোৎসৱৰ গন্ধযাত্ৰাৰ দিনা বিয়লি সত্ৰৰ ভিতৰত থকা মণিকূট গৃহৰ পৰা দৌল গোবিন্দ গোসাঁইক কীৰ্তনঘৰৰ পূৱ দুৱাৰেদি উলিয়াই আনি আইসকলৰ দুৱাৰডলিৰে লৈ গৈ টুপৰ চোতালৰে ঘূৰাই মঠৰ চোতালত ৰখা হয়।
আনপিনে কলীয়াঠাকুৰ (শ্রীকৃষ্ণ) গোসাঁই কীর্তনঘৰৰ পশ্চিম ফালে থকা ঘাই দুৱাৰেদি উলিয়াই আনি দুয়ো গেসাইক মঠৰ চোতালত এখন বৰ শৰাইৰ ওপৰত ৰখা হয়। তাতেই গোসাঁইদ্বয়ক অধিবাস সম্পন্ন কৰি সন্ধিয়াৰ আগে আগে ভক্তিপ্রাণ ৰাইজে ঢুলীয়া আৰু গায়ন-বায়ন সমন্বিতে টুপৰ চোতাললৈ মেজি পুওৱাবলৈ আনে। ৰাইজৰ সহযোগত ইকৰা খাগৰিবে টুপৰ চোতালত সাজি উলিওৱা মেজিৰ জুইৰ চাৰিওফালে দৌল গোবিন্দ আৰু কলীয়া ঠাকুৰ গোসাঁইক সাতপাক ঘূৰাই প্ৰথমতে যোগমোহন গৃহত ৰাখে আৰু নির্দিষ্ট ক্ষণ অনুসাৰে নিশা দৌল গৃহৰ সাতটা চিৰিৰে সাত পাক ঘূৰাই দৌল গোবিন্দ আৰু কলীয়া ঠাকুৰৰ গোসাঁইক দৌল গৃহত আৰোহণ কৰায়।
গোসাঁইক মেজিৰ ওচৰলৈ অনাৰ সময়তে সমান্তৰালভাৱে অনুষ্ঠিত হয় বৰপেটাৰ থলুৱা উদ্যোগসমূহৰ দ্বাৰা নিৰ্মিত ৰং-বিৰঙৰ আতচবাজী প্রদর্শন। কাইলৈ ভৰদৌল। পূর্ব প্রচলিত প্রথা অনুসাৰে ভৰদৌলৰ দিনা পুৱা কীৰ্তনঘৰত নৃত্য প্ৰসংগ সমাপনৰ পাছত যোগমোহন গৃহত ভকত আইসফল আৰু বাপুসকলে নাম-প্ৰসংগ কৰিব আৰু বংশৰাসকলৰ বাৰা গায়ন-বায়ন, কৃষ্ণ নৃত্য, ভোজন ব্যৱহাৰ, ঘোষা কীর্তন আৰু ব্যাস কীর্তন অনুষ্ঠিত হ’ব।
আনহাতে বুধবাৰে দৌল মহোৎসৱৰ তৃতীয় দিনটোত বৰপেটা সত্ৰত উপস্থিত হয় মুখ্যমন্ত্ৰী ড:হিমন্ত বিশ্বশৰ্মা ৷ দৌল মহোৎসৱত মুখ্যমন্ত্ৰীৰ সৈতে ধূতি পিন্ধি প্ৰৱেশ কৰে নিৰাপত্তাৰক্ষীয়ে ৷ কীৰ্তনঘৰত সেৱা জনাই প্ৰদক্ষিণ কৰে সত্ৰৰ চৌদিশ ৷
উল্লেখ্য যে মঙলবাৰে পুৱা তাল কোবোৱা প্ৰসংগ আৰু মঞ্জিৰা নাম, আইসকলৰ নাম, খোল প্রসংগ আৰু ভকতৰ নাম-প্রসংগ অনুষ্ঠিত হয় ৷ ইয়াৰ মাজতে মুখ্যমন্ত্ৰী ড:হিমন্ত বিশ্ব শৰ্মা উপস্থিত হয় শ্ৰী শ্ৰী বটদ্ৰৱা থানত ৷ চুৰিয়া ধূতি পৰিহিত মুখ্যমন্ত্ৰী গৰাকীয়ে কীৰ্তন ঘৰত প্ৰৱেশ কৰি সিংহাসনৰ ওচৰত সেৱা লয় আৰু থান চৌহদ পৰিভ্ৰমণ কৰাৰ লগতে আৰ্বিভাৱ ক্ষেত্ৰ দৰ্শন কৰিছিল ৷
মনকৰিবলগীয়া যে গুৰুজনাৰ জন্মস্থান বটদ্ৰৱা থানাত সোমবাৰৰ পাঁচদিনীয়াকৈ আয়োজন কৰা দৌলযাত্ৰা মহোৎসৱত মঙলবাৰে পুৱাই উপস্থিত হয় ৰাজ্যৰ মুখ্যমন্ত্ৰী ড:হিমন্ত বিশ্ব শৰ্মা। জাতীয় সাজপাৰ পৰিধান কৰি থান চৌহদত প্ৰৱেশ কৰাৰ সময়ত দেহৰক্ষীৰ বিৰুদ্ধে জাঙুৰ খাই উঠে ৷ জাতীয় সাজপাৰৰ পৰিৱৰ্তে পেণ্ট ছাৰ্ট পৰিধান কৰি বটদ্ৰৱা থানত প্ৰৱেশ কৰাৰ লগে লগে মুখ্যমন্ত্ৰী গৰাকীয়ে নিজেই দেহৰক্ষীক হাতত ধৰি বাহিৰত থৈ আহে ৷
আনহাতে, বৰপেটা সত্ৰৰ দৌলত থকা গোসাঁইক পূজাৰীয়ে নিত্য কর্মাদি সম্পন্ন কৰাৰ পাছত সত্ৰৰ বুঢ়াসত্রীয়াই ফাকুগুড়ি প্রদান কৰি ভক্তপ্ৰাণ ৰাইজৰ বাবেও গোসাঁইক ফাকু দি সেৱা কৰা পৰ্ব আৰম্ভ কৰিব। ভৰদৌল তিনিদিন হোৱা বাবে পঞ্চম দিনা অর্থাৎ ছয় মার্চ শুকুৰবাৰে অনুষ্ঠিত হ’ব ফাকুৱা।
ৰঙৰে ৰাঙলী হৈ আনন্দত আত্মহাৰা হৈ পৰা বৰপেটাৰ বিখ্যাত সুৱেৰী উৎসৱ। ইফালে, তৃতীয় ভৰদৌলৰ নিশাই গোসাঁইক দৌল গৃহৰ পৰা নমাই আনি কিছু সময় যোগমোহন গৃহত ৰাখি পাছত কর্তনঘৰৰ ঘাই দুৱাৰমুখৰ বাৰাণ্ডাত ৰখা হ’ব। ফাকুৱাৰ দিনা বিয়লি গোসাইক পুনৰ মঠৰ চোতাললৈ উলিয়াই আনি বস্ত্র-অলংকাৰ আদি পিন্ধাই দুয়ো গোসাঁইক দুখন চোডালত সুকীয়া সুকীয়াকৈ তুলি লৈ গায়ন-বায়ন সমন্বিতে ঢোল-খোল বজাই হেজাৰ-বিজাৰ ৰাইজে হোলী গীতৰে চৌদিশ মুখৰিত কৰি বৰপেটা সত্ৰৰ দক্ষিণফালে থকা কলবাৰী (গণককুছি) সত্ৰলৈ হেকেটা খুৱাবলৈ নিব। হেকেটা খোৱা পৰ্ব সামৰণিৰ পাছত গোসাইক পুনৰ বৰপেটা সত্ৰ অভিমুখে ওভতাই অনা হ’ব।
গোসাঁই আহি বৰপেটা সত্ৰৰ মুখ্য প্ৰৱেশদ্বাৰ-দালানৰ সন্মুখ পোৱাৰ লগে লগে টুপৰ চোতালত বাঁহ ভঙা কাৰ্য আৰম্ভ হয়। গেসাইক প্রৱেশত বাধা প্ৰদান কৰা এই বাঁহ ভঙা কার্যত বৰপেটা সত্ৰৰ অন্তৰ্গত ২২খন হাটীৰ ভকতসকলে অংশগ্রহণ কৰে। এডাল এডালকৈ চাৰিওডাল বাঁহ ভঙাৰ পাছত হেঙাৰমুক্ত হোৱাত গোসাঁইক মঠৰ চোতাললৈ নি কীৰ্তনঘৰৰ চাৰিওফালে সাত পাক প্রদক্ষিণ কৰোৱা হয় ৷ গোসাঁইক ঘৰৰ চাৰিওফালে সাতপাক ঘূৰাই থকাৰ সময়ত মঠৰ চোতালত লক্ষ্মী আৰু কৃষ্ণৰ বাদানুবাদ অর্ধনাটকীয় অনুষ্ঠান বোলবোলনি অনুষ্ঠিত হয়।
তাৰ পাছত গোসাঁইক পুনৰ মণিকূট গৃহত প্ৰৱেশ কৰাব। ইয়াৰ লগে লগে সামৰণি পৰিব বৰপেটা সত্ৰৰ পাঁচদিনীয়া শ্রীশ্রী কৃষ্ণৰ দৌলযাত্রা মহোৎসৱৰ। দৌল মহোৎসৱ উপলক্ষে সোমবাৰে সত্ৰৰ স্থায়ী ৰংগ মঞ্চত অনুষ্ঠিত হয় সত্রীয়া সাংস্কৃতিক অনুষ্ঠান। সত্রীয়া সাংস্কৃতিক অনুষ্ঠান মুকলি কৰে বৰপেটা সত্ৰৰ বুঢ়া সত্রীয়া ড:বাবুল চন্দ্র দাসে। দৌল মহোৎসৱ উপভোগ কৰাৰ লগতে কৃষ্ণক দৰ্শন কৰিবলৈ দূৰ-দূৰণিৰ বহু তীর্থযাত্রী আহি বৰপেটা সত্ৰত সমৱেত হৈছে। সত্ৰৰ তৰফৰ পৰা তীর্থযাত্রীসকলক সিধা প্ৰদান কৰা হৈছে।