Village Rockstars:✒️অন্ত পৰিব অসমৰ সকলো চলচ্চিত্র ৰসিকৰ এক দীর্ঘদিনীয়া প্রতীক্ষাৰ। ছয় মাৰ্চত ৰাজ্যজুৰি মুক্তি পাব আন্তঃৰাষ্ট্ৰীয় খ্যাতি সম্পন্ন প্রসিদ্ধ চিত্রনির্মাতা ৰীমা দাসৰ বহু প্রশংসিত ছবি ‘ভিলেজ ৰকষ্টাৰ্ছ ২’।
অস্কাৰৰ মঞ্চত প্ৰৱেশ কৰা প্ৰথমখন অসমীয়া ছবি ‘ভিলেজ ৰকষ্টাৰ্ছ’ৰ চিকুৱেল ‘ভিলেজ ৰকষ্টাৰ্ছ ২’। ইতিমধ্যে বিশ্বৰ বহুকেইখন অগ্রণী চলচ্চিত্র মহোৎসৱত ছবিখন প্রদর্শিত, পুৰস্কৃত আৰু প্রশংসিত হৈছে।
২০২৫ত বার্লিন আন্তঃৰাষ্ট্ৰীয় চলচ্চিত্র মহোৎসৱত ইউৰোপীয়ান প্রিমিয়াৰ হৈছিল ‘ভিলেজ ৰকষ্টাৰ্ছ ২’ৰ। বুছান আন্তঃৰাষ্ট্ৰীয় চলচ্চিত্র মহোৎসৱত ছবিখনে লাভকৰিছিল Kim Jeseok Award। ‘ভিলেজ ৰকষ্টাৰ্ছ ২’ৰ পৰিচালনাৰ বাবে ৰীমা দাসে লাভ কৰিছিল ‘নিউৱৰ্ক রমেন ইন ফিল্ম এণ্ড টেলিভিছন এবার্ড’।
উল্লেখ্য যে পৰিৱৰ্তিত সময়ে ক্ষিপ্ৰতাৰে কাঢ়ি নিয়া অসমৰ গাঁৱৰ নিভাঁজ ছবি আৰু জীৱন সংগ্রামক অকৃত্ৰিম আৰু প্ৰাণস্পর্শী ৰূপত চিত্রিত কৰা ‘ভিলেজ ৰকষ্টাৰ্ছ’ ছবিখনে দেশে-বিদেশে সৃষ্টি কৰিছিল আলোড়নৰ। ৰীমা দাসৰ এই ছবিখনে প্রথমবাৰলৈ অসমলৈ কঢ়িয়াই আনিছিল শ্রেষ্ঠ ছবিৰ স্বর্ণকমল বঁটা। ভাৰত চৰকাৰে অস্কাৰৰ মনোনয়নৰ বাবে প্রেৰণ কৰা ছবিখনে বিশ্বজুৰি সমাদৃত আৰু প্রশংসিত হৈছিল। মুক্তিৰ লগে লগে অসমৰ চিত্ৰগৃহত অভূতপূর্ব সঁহাৰি লাভ কৰিছিল ছবিখনে।
এতিয়া মুক্তিৰ বাবে সাজু হৈছে ভাৰতৰ হৈ অস্কাৰলৈ আনুষ্ঠানিক প্রৱেশ ঘটা বহুচৰ্চিত ছবিখনৰ চিকুৱেল ‘ভিলেজ ৰকষ্টাৰ্ছ ২’। ‘ভিলেজ ৰকষ্টাৰ্ছ’ৰ প্ৰ’টাগনিষ্ট ধুনুক এইবাৰ ডাঙৰ আৰু নতুন ৰূপত দেখা যাব। নতুন ছবিখন সন্দৰ্ভত পৰিচালক বীমা দাসে কয়, ‘ভিলেজ ৰকষ্টাৰ্ছ ২’ কেৱল এখন চিনেমা নহয়, ১০ বছৰ ধৰি হৃদয়ত অবগাহন কৰি থকা এটা প্রিয় সপোন, সংগীত আৰু আৱেগৰ নাম। তাহানিৰ ধুনুজনী এতিয়া ডাঙৰ হ’ল, সাহসী হ’ল। কিন্তু এতিয়াও তাই হৃদয়ত বান্ধি থৈছে তাইৰ প্ৰিয় গাঁওখনক। আহক, এই ছবিখন, ইয়াৰ ১০ বছৰীয়া যাত্রা আৰু উত্তৰাধিকাৰক উদযাপন কৰোঁ।’ ছয় মাৰ্চত ৰাজ্যজুৰি মুক্তি পাবলগীয়া ছবিখনে অসমৰ সকলো চিত্রানুৰাগীৰ দীর্ঘদিনীয়া অপেক্ষা আৰু উৎকণ্ঠাৰ অৱসান ঘটাব। আশা কৰা হৈছে যে অসমৰ ৰাইজৰ এক আবেগ আৰু সম্মোহনৰ নাম হৈ পৰিব ‘ভিলেজ ৰকষ্টাৰ্ছ ২’।