WB :
দৈনিক অগ্ৰদূত ডিজিটেল ডেক্স:পূব ভাৰতৰ এই গুৰুত্বপূৰ্ণ দুৰ্গটোত নিজক প্ৰতিষ্ঠা কৰি সোমবাৰে পশ্চিম বংগত ভাৰতীয় জনতা পাৰ্টিয়ে দিদি’ক ধৰাসায়ী কৰি দুশতাধিক আসন লাভেৰে গেৰুৱা পতাকা উৰুৱাবলৈ সক্ষম হয় ৷
এই ৰাজকীয় বিজয়ৰ পিছতে বিজেপিয়ে নতুন চৰকাৰৰ শপতগ্ৰহণৰ বাবে ৯ মে’ৰ দিনটো ধাৰ্য্য কৰিছে। বিজেপিয়ে কিয় এই তাৰিখ বাছি লৈছিল সেই কথা জানিবলৈ ৰাইজৰ কৌতুহল জাগিছিল। খবৰ অনুসৰি বুধবাৰে প্ৰতিৰক্ষা মন্ত্ৰী ৰাজনাথ সিং কলকাতা ভ্ৰমণৰ কথা। তেওঁ বিজেপিৰ নিৰ্বাচিত বিধায়কৰ সৈতে আলোচনাত মিলিত হ’ব৷ তাৰ পিছতে বিধায়িনী দলৰ নেতা আৰু বংগৰ নতুন মুখ্যমন্ত্ৰীৰ সন্দৰ্ভত সিদ্ধান্ত ল’ব। মুখ্যমন্ত্ৰী হিচাপে ইতিমধ্যে নাম উচ্চাৰিত হৈছে বংগ বিজেপিৰ বলিষ্ঠ নেতা ভবানীপুৰত মমতা বেনাৰ্জীক পৰাভূত কৰা শুভেন্দু অধিকাৰী ৷ অধিকাৰী নন্দিগ্ৰাম সমষ্টিটো জয়ী হয় ৷ একেদৰে মুখ্যমন্ত্ৰীৰ ৰেছত আছে পশ্চিমবংগৰ ৰাজ্যিক বিজেপিৰ সভাপতি সমিক ভট্টাচাৰ্য ৷ অৱশ্যে মুখ্যমন্ত্ৰী সন্দৰ্ভত বিজেপিৰ সংসদীয় বোর্ডে ল’ব চুড়ান্ত সিদ্ধান্ত ৷সংসদীয় বোর্ডৰ সভাত প্ৰধানমন্ত্ৰী নৰেন্দ্ৰ মোদী, গৃহমন্ত্ৰীঅমিত শ্বাহ, বিজেপিৰ ৰাষ্ট্ৰীয় সভাপত নীতিন নবীন ,পশ্চিমবংগৰ ৰাজ্যিক বিজেপিৰ সভাপতি সমিক ভট্টাচাৰ্য আৰু বংগ বিজেপিৰ জ্যেষ্ঠ নেতা শুভেন্দু অধিকাৰীয়ে।
উল্লেখ্য যে ৯ মে’ তাৰিখটো বিশ্বগুৰু ৰবীন্দ্ৰনাথ ঠাকুৰৰ জন্ম বাৰ্ষিকী। বংগৰ সংস্কৃতিৰ প্ৰতি ৰবীন্দ্ৰনাথ ঠাকুৰৰ সংগীত আৰু সাহিত্যৰ গুৰুত্ব কোৱা বাহুল্য। গোটেই নিৰ্বাচনী প্ৰচাৰত তৃণমূল কংগ্ৰেছ আৰু মমতা বেনাৰ্জীয়ে বাৰে বাৰে অভিযোগ উত্থাপন কৰিছিল যে বিজেপিয়ে ক্ষমতালৈ অহাৰ লগে লগে বংগৰ সংস্কৃতিক ধ্বংস কৰিব । বিজেপিয়ে বংগৰ সভ্যতা আৰু সংস্কৃতিৰ প্ৰতি কিমান কম গুৰুত্ব দিয়ে সেই সম্পৰ্কে টিএমচিৰ অভিযোগ প্ৰতিহত কৰাৰ আশাত নতুন চৰকাৰ গঠনৰ বাবে ৰবীন্দ্ৰনাথ ঠাকুৰৰ জন্ম বাৰ্ষিকী দিনটো বাছি লৈছে। মঙলবাৰে ককলকাতাত ৰবীন্দ্ৰ জয়ন্তীৰ দিনাই ৯ মে’ত পশ্চিমবংগত নতুন চৰকাৰৰ শপতগ্রহণ কৰা হ’ব ঘোষণা কৰে বংগ বিজেপিৰ ৰাজ্যিক সভাপতি সমিক ভট্টাচাৰ্যই ৷
উল্লেখযোগ্য বিভিন্ন বিতৰ্কৰ মাজেৰে নির্বাচন অনুষ্ঠিত পশ্চিমবংগ বিধানসভাৰ মুঠ ২৯৪ খন আসনত একক সংখ্যাগৰিষ্ঠতা অর্জন কৰিবলৈ সক্ষম হৈছে বিজেপি। পশ্চিমবংগৰ মুঠ আসন ২৯৪ ৰ ভিতৰত বিজেপিয়ে ২০৬ খন আসনত জয়লাভ কৰিছে। ৰাজ্যখনত চৰকাৰ গঠনৰ বাবে এটা দল বা মৰ্চাক ১৪৮ খন আসনৰ প্ৰয়োজন। লক্ষ্যণীয়ভাবে এই নির্বাচনত স্বয়ং তৃণমূল কংগ্ৰেছৰ মুৰব্বী মমতা বেনাৰ্জীয়ো পৰান্ত হৈছে। তেওঁ ভবানীপুৰ সমষ্টিত বিজেপিৰ শুভেন্দু অধিকাৰীৰ হাতত ধৰাশায়ী হৈছে। বিজেপি প্রার্থী অধিকাৰীয়ে মমতাক ১৫,১০৫ টা ভোটৰ ব্যৱধানত পৰাস্ত কৰে। ইয়াৰ বিপৰীতে যোৱাবাৰৰ বিধানসভা নির্বাচনত্র আসন দখল কৰা তৃণমূল কংগেছ জয়ৰ সম্ভাৱনা থকা সমষ্টিৰ সংখ্যা ৮১টালৈ হ্রাস পাইছে। নিশালৈকে ভোটগণনা চলি আছে। শেহতীয়া তথ্য অনুসৰি দলে কথমপি ৮১ টাত জয়লাভ কৰিবলৈ সক্ষম হয় ।
উল্লেখ্য যে ফলতা সমষ্টিৰ পুনৰ ভোটগ্রহণ হ’ব। যোৱা ২৯ এপ্রিলত অনুষ্ঠিত ভোটগ্রহণত সমষ্টিটোৰ ব্যাপক অনিয়ম সংঘটিত হোৱাৰ অভিযোগ উত্থাপন হয়। সেই অনুসৰি অহা ২১ মে’ত সমষ্টিটোৰ পুনৰ ভোটগ্রহণৰ ব্যৱস্থা কৰিছে নির্বাচন আয়োগে। গতিকে সোমবাৰে ২৯৩ টা সমষ্টিৰহে ভোটগণনা হয়। শেহতীয়া খবৰ অনুসৰি এই সমষ্টিসমূহৰ ২০৮ টাত বিজেপিৰ জয়ৰ সম্ভাৱনা আছে। আনহাতে একাংশ বিশ্লেষকে মন্তব্য কৰা অনুসৰি মোদী-শ্বাহৰ ‘বংগ দখল’ অভিযান সফল হোৱাৰ লগে লগে ২০২৯ৰ লোকসভা নির্বাচনলৈ বিজেপিৰ পথ একপ্রকাৰ মসৃণ হৈ পৰিল। কিয়নো বংগত লোকসভা আসনৰ সংখ্যা হ’ল ৪৫ ৷ এই আটাইকেইখন আসন নিজৰ দখললৈ অনাৰ ক্ষেত্ৰত একপ্ৰকাৰ সহজলভ্য হৈ পৰিল।