T20 Semi Final:
সঞ্জু ছেমছনৰ আন এক অসাধাৰণ বেটিং প্রদর্শন আৰু অক্ষৰ পেটেলৰ দুর্দান্ত ফিল্ডিঙৰ সুবাদত টি-২০ বিশ্বকাপৰ ফাইনেলত প্রৱেশ কৰিলে ভাৰতে। বৃহস্পতিবাৰে নিশা ছেমি ফাইনেলত ইংলণ্ডৰ বিপক্ষে আঢ়ৈশৰো অধিক ৰাণ কৰিও ভাৰতে খেলখনত মাত্র সাত ৰাণৰ ব্যবধানতহে জয়ী হয়। খেলখন ৰোমান্সকৰ কৰি তোলাৰ মূলতে আছিল ইংলণ্ডৰ তৰণ বেটাৰ জেকব বেথেলৰ স্মৰণীয় শতৰাণ। অৱশ্যে অন্তিম ক্ষণত ইংলণ্ড দল ৰণত পৰে। ভাৰতে প্রথমে বেটিং কৰি সাত উইকেটৰ বিনিময়ত ২৫৩ ৰাণ সংগ্ৰহ কৰে। প্রত্যুত্তৰত ইংলণ্ডে সাত উইকেট হেৰুৱাই ২৪৬ ৰাণ কৰে।
অধিনায়ক হেৰী ব্রুক (৭) সোনকালে আউট হোৱাৰ পাছতো বেথেলৰ ইনিংস্থত কোনো সময়তে বৃহৎ স্ক’ৰৰ চাপ দেখা নগ’ল। তেওঁ জ’ছ বাটলাৰ (২৫), টম বেন্টন (১৭), উইল জেকছ (৩৫), ছেম কুৰান (১৮)ক সংগীৰূপে লৈ ৰাণৰ গতি বৃদ্ধি কৰি ৰাখি জয়ৰ সম্ভাৱনা উজ্জ্বল কৰি ৰাখিছিল। ইয়াৰ পাছতো ভাৰতৰ জয়ৰ অন্যতম কৃতিত্ব অক্ষৰৰ ফিল্ডিং আৰু যশপ্রীত বুমৰাহে কৰা ইনিংছৰ ১৮ সংখ্যক অভাৰটো। অক্ষৰে দুটা দুর্দান্ত কেচ ধৰাৰ উপৰি ক্ৰমাৎ ভয়ানক ৰূপ ধাৰণ কৰাৰ জেকছৰ এটা প্রায় নিশ্চিত ছিক্সাৰ ৰক্ষা কৰি শিৱম ডুবেক কেচ ধৰাত সহায় কৰে। অক্ষৰৰ সেই প্রচেষ্টাই দলৰ জয়ৰ সম্ভাৱনা উজ্জ্বল কৰি তোলাৰ পাছত বুমৰাহে ১৮সংখ্যক অভাৰত ইংৰাজ বেটাৰক বান্ধি ৰাখিবলৈ সক্ষম হোৱাত ইংলণ্ড চাপত পৰি যায়। বেথেলে মাত্র ৪৮টা বলত আঠটা বাউণ্ডেৰি আৰু সাতটা ছিক্সাৰৰ সহায়ত ১০৫ ৰাণ কৰি অন্তিম অভাৰত ৰাণ আউট হয়।
ইয়াৰ পূৰ্বে ভাৰতৰ বেটিঙত পুনৰ নায়কত পৰিণত হৈ ৮৯ বাণ কৰে ছেমছনে। অভিষেক শর্মা (৯) পুনৰ ব্যৰ্থ হ’লেও ছেমছনে ঈশান কিষাণ (৩৯) আৰু শিৱম (৪৩)ৰ স’তে দলব বৃহৎ স্ক’ৰৰ ভেটি স্থাপন কৰে। উপর্যুপৰি দ্বিতীয়খন খেলত শতৰাণৰ পৰা বঞ্চিত হোৱা ছেমছনে ৪২টা বলত আঠটা বাউণ্ডেৰী আৰু সাতটা ছিক্সাৰ মাৰে। শেষৰ ফালে দলৰ ৰাণ সংখ্যা ২৫০ পাৰ কৰাত উল্লেখনীয় ভূমিকা পালন কৰি হার্দিক পাণ্ডিয়াই ১২টা বলত ২৭আৰু তিলক বার্মাই সাতটা বলত ২১ ৰাণ কৰে। আজিৰ জয়নে প্রথম দলৰূপে টি-২০ বিশ্বকাপৰ খিতাপ অক্ষুণ্ণ ৰখাব সুযোগ পালে ভাৰতে।
এতিয়া দেওবাৰে ভাৰতে নিউজিলেণ্ডৰ বিৰুদ্ধে ফাইনেলত অৱতীৰ্ণ হ’ব ৷