ICC Tough Decision:
অগ্রাহ্য হ’ল বাংলাদেশৰ দাবী। আন্তর্জাতিক ক্রিকেট পৰিষদ (আইচিচি) ব তৰফৰ পৰা আনুষ্ঠানিকভাৱে জনাই দিলে যে পূৰ্বৰ সূচী অনুসৰি বাংলাদেশে ভাৰততে আগন্তুক টি-২০ বিশ্বকাপ খেলিব লাগিব। এইবাৰ বিশ্বকাপত খেলা-নেখেলাৰ সিদ্ধান্ত বাংলাদেশে কাইলৈৰ ভিতৰত জনাব লাগিব। আইচিচিৰ বৈঠকত এই সিদ্ধান্ত গ্রহণ কৰা হয়।
মুস্তাফিজুৰ ৰহমানক আইপিএলৰ পৰা বাদ দিয়াৰ পাছৰে পৰা বাংলাদেশ ক্রিকেট ব’র্ডে ভাৰতত টি-২০ বিশ্বকাপ নেখেলে বুলি হুংকাৰ দি আহিছিল। আনকি গ্রুপ পৰিৱৰ্তন কৰি শ্রীলংকাত খেলাৰ ইচ্ছা ব্যক্ত কৰিছিল। আইচিচিয়ে দাবী নামানিলে বিশ্বকাপ বৰ্জন কৰিব বুলিও বিচিবিয়ে ভাবুকি দিছিল। তাৰ পাছতো নিজৰ সিদ্ধান্তত অটল হৈ ৰ’ল আইচিচি। ক্রীড়াসূচীত কোনো পৰিৱৰ্তন নহ’ব বুলি স্পষ্ট কৰি দি আইচিচিয়ে জনায় যে বাংলাদেশে নেখেলিলে আন কোনো দলক বিশ্বকাপত সুযোগ দিয়া হ’ব।
উল্লেখ্য যে আচিচি বৈঠকতো ভাৰতত নেখেলাৰ সিদ্ধান্তত অটল আছিল বাংলাদেশ ক্রিকেট ব’ৰ্ডৰ সভাপতি আমিনুল ইছলাম। ফলত বৈঠকত অংশ লোৱা ১৬দেশৰ প্রতিনিধিৰ মাজত এই বিষয়ত ভোটৰ ব্যৱস্থা হয়। ১৪ খন প্রতিনিধিয়েই বাংলাদেশৰ বিপক্ষে ভোটদান কৰাৰ বিপৰীতে বাংলাদেশ আৰু পাকিস্তানে বাংলাদেশৰ সপক্ষে অৱস্থান লোৱাত বিচিবিৰ খেলৰ স্থান সলনিৰ দাবী খাৰিজ হয়।
উল্লেখ্য যে বাংলাদেশে যদি টি-২০ বিশ্বকাপত নেখেলে, তেন্তে দেশখনৰ ক্রিকেট ব’র্ড বিপুল আর্থিক ক্ষতিৰ সম্মুখীন হ’ব। হ’ব পাৰে বিপুল ধনৰ জৰিমনা। আনকি নির্বাসন পর্যন্ত হ’ব পাৰে। এনে পৰিস্থিতিত আগন্তুক বর্ষত অনুষ্ঠিত হ’বলগীয়া এদিনীয়া বিশ্বকাপত খেলাৰ বাংলাদেশৰ বাবে প্রায় অসম্ভৱ হৈ পৰিব।
