Bangladesh:
বিশ্বকাপৰ পৰা বাহিৰ হোৱাৰ পাছত প্রথম প্রতিক্রিয়া জনালে বাংলাদেশ ক্রিকেট ব’র্ড (বিচিবি)-এ। তেওঁলোকে জনাইছে যে ভাৰতলৈ টি-২০ বিশ্বকাপ খেলিবলৈ নোযোৱাৰ সিদ্ধান্ত ব’ৰ্ডৰ নহয়, বৰঞ্চ বাংলাদেশ চৰকাৰৰহে। বিচিবিয়ে হেনো বিশ্বকাপত খেলিবলৈকে বিচাৰিছিল। বিচিবিয়ে লগত স্পষ্ট কৰি দিছে যে আইচিচিৰ সিদ্ধান্ত তেওঁলোকে মানি লৈছে। নতুনকৈ আৰু আবেদন কৰা নহয়।
ইয়াৰ পাছতে বহুতে ধাৰণা কৰিছে যে নিজক দায়মুক্ত কৰি তথা চৰকাৰৰ ওপৰত দায় জাপি দি বিচিবিয়ে নিজক কিছু নিৰাপদ স্থানত ৰাখিব বিচাৰিছে। এটা কথা প্রায় পৰিষ্কাৰ যে বিশ্বকাপ নেখেলাৰ বাবে আইচিচিয়ে বাংলাদেশক কঠোৰ শাস্তি দিব। অনুদান বন্ধৰ পৰা আৰম্ভ কৰি নিৰ্বাসন পর্যন্ত হ’ব পাৰে; কিন্তু বিচিবিয়ে যদি প্রতিষ্ঠা কৰিব পাৰে যে ভাৰতত খেলিবলৈ নোযোৱাৰ সিদ্ধান্ত মহম্মদ ইউনুছ চৰকাৰৰহে, তেতিয়াহ’লে শাস্তিৰ পৰা ৰেহাই পোৱাৰ এটা পথ খোলা থাকিব।
বিচিবিৰ কৰ্মকর্তা আমজাদ হুছেইনে সংবাদ মাধ্যমৰ আগত কয় যে ভাৰতত খেলাটো খেলুৱৈৰ বাবে নিৰাপদ নহয় বুলি তেওঁলোকক বাংলাদেশ চৰকাৰে জনাইছিল। তেওঁ কয়, ‘আমাৰ চৰকাৰৰ তৰফৰ পৰা জনাইছিল যে ভাৰতত বিশ্বকাপ খেলাটো আমাৰ বাবে নিৰাপদ নহ’ব। আমি আমাৰ মেচসমূহ শ্রীলংকাত আয়োজন কৰাৰ অনুৰোধ জনাইছিলো; কিন্তু আইচিচি সম্মত নহ’ল। এই বিষয়ত আমাৰ একো কৰিবলগীয়া নাই। এয়া নিৰাপত্তাৰ কাৰণে চৰকাৰো লোৱা এক সিদ্ধান্ত।’
