Iran Israel Conflict:✒️ইৰান আৰু মার্কিন-ইজৰাইলৰ যুদ্ধৰ কালি দ্বাদশ দিনতো পৰিস্থিতি ভয়াৱহ হৈয়ে আছে। তেহবানৰ কর্তৃপক্ষই প্রকাশ কৰা মতে, আক্ৰমণৰ ফলত ভয়াৱহ বিস্ফোৰণৰ সৃষ্টি হৈছে ঠায়ে ঠায়ে।
ৰাষ্ট্ৰখনৰ প্রায় ১০ হেজাৰ বাসিন্দা থকা অঞ্চলত মার্কিন-ইজৰাইলী বাহিনীয়ে বোমাবর্ষণ কৰা বুলি কয় ইৰানে। একে সময়তে ইজৰাইলে লেবাননত ধাৰাবাহিক বোমা আক্রমণ অব্যাহত ৰাখিছে।
লেবাননৰ ৰাজধানী বেইকট আৰু অন্যান্য আবাসিক অঞ্চলত ইজৰাইলে বোমা আক্রমণ অব্যাহত ৰাখিছে। ইপিনে, ইৰানে মধ্যপ্রাচ্যৰ উপ-সাগৰীয় দেশসমূহ কুৱেইট, কাটাৰ, ছৌদি আৰব, সংযুক্ত আৰব আমিৰশ্বাহীত ক্ষেপণাস্ত্র-ড্রোণেৰে আক্ৰমণ কৰি আছে।
লেবাননৰ সন্ত্রাসবাদী সংগঠন হিজবুল্লাই দাবী কৰে যে ইজৰাইললৈ কে’বাটাও ৰকেট নিক্ষেপ কৰা হৈছে। ইজৰাইলৰ সংবাদ মাধ্যমে এই সন্দর্ভত কয় যে কমেও এশটা ৰকেট আক্ৰমণৰ সন্মুখীন হৈছে তথা ইজৰাইলী সেনাই নাগৰিকক নিৰাপদ আশ্রয় গ্রহণ কৰিবলৈ সতর্কবাণী প্ৰেৰণ কৰিছে।
ইপিনে, উপ-সাগৰীয় সমন্বয় পৰিষদ (জিচিচি)-এ ইৰানক আক্রমণ বন্ধ কৰিবৰ বাবে ৰাষ্ট্ৰসংঘত দাখিল কৰিবলৈ এক খচৰা প্ৰস্তাৱ দাখিল কৰিছে। এই প্ৰস্তাৱত উপ-সাগৰীয় দেশত আক্ৰমণৰ বাবে ইৰানক গৰিহণা দিয়া হৈছে আৰু আক্ৰমণ বন্ধ কৰিবলৈ কোৱা হৈছে।
উপ-সাগৰীয় দেশৰ আৱাসিক অঞ্চলসমূহত ইৰানৰ আক্ৰমণক গৰিহণাও দিয়া হৈছে প্ৰস্তাৱত। কমেও ১০৫ খন সদস্য ৰাষ্ট্ৰই এই প্রস্তাৱত সমর্থন জনোৱা বুলি তথ্য প্রকাশিত হৈছে।
ইপিনে, ৰাছিয়াই ইজৰাইল আৰু আমেৰিকাৰ ইৰানৰ ওপৰত আক্ৰমণৰ ক্ষেত্ৰত এক খচৰা প্ৰস্তাৱ প্ৰস্তুত কৰিছে বুলি বাতৰি প্ৰকাশ হৈছে।
ৰাষ্ট্ৰসংঘৰ কাটাৰৰ ৰাষ্ট্ৰদূত শ্বেইখা আলিয়া আহমেদ বিন ছাঈফ অল খানীয়ে কয় যে ৰাষ্ট্ৰসংঘৰ নিৰাপত্তা পৰিষদে আক্রমণ বন্ধ কৰিব নোৱাৰাটোৱে ভয়াৱহ ইংগিত দিছে। মধ্যপ্রাচ্য যুদ্ধত জৰ্জৰিত ঘটনা বন্ধ কৰিবলৈ তেওঁ আহ্বান জনায়।
তেওঁ কয়, ‘ইৰানে আমাৰ ভূমি বাৰম্বাৰ আক্ৰমণ কৰি দুই দেশৰ মাজত থকা দ্বিপাক্ষিক বুজাবুজিত গভীৰ আঘাত হানিছে। ৰাষ্ট্ৰসংঘৰ নিৰাপত্তা পৰিষদে ব্যৱস্থা গ্রহণ কৰি দায়িত্ব পালন কৰিব লাগে। এই ক্ষেত্রত ব্যর্থতাই ভয়াৱহ ইংগিত প্ৰেৰণ কৰিব যে যুদ্ধত জড়িত নোহোৱা চুবুৰীয়া ৰাষ্ট্ৰসমূহত আক্ৰমণৰ ফলতো কোনো ব্যৱস্থা গ্ৰহণ কৰা নহ’ল।’
