সাধাৰণ জনতাৰ মূৰত মাধমাৰ শোধাই অহা পহিলা এপ্ৰিলৰ পৰা ৰাজ্যৰ সাতখন টোলগেটত বৃদ্ধি হ’ব কৰৰ পৰিমাণ। নীতি-নিয়ম ভৰিৰে মোহাৰি অসমত স্থাপন কৰা টোলগেটসমূহ দিন ডকাইত সদৃশ হৈ আহিছে। তাৰ মাজতে আকৌ টোলকৰ বৃদ্ধিৰ সিদ্ধান্তই সাধাৰণ ৰাইজৰ মাজত তীব্র প্ৰতিক্ৰিয়াৰ সৃষ্টি কৰিছে।
অৱশ্যে সাধাৰণ জনতাৰ প্রতিক্রিয়ালৈ গুৰুত্ব দিয়াৰ প্ৰয়োজনবোধ চৰকাৰ বাহাদুৰে কেতিয়াও কৰা নাই। শেহতীয়াকৈ ভাৰতৰ ৰাষ্ট্ৰীয় ঘাইপথ প্ৰাধিকৰণে জাৰি কৰা জাননী অনুসৰি পহিলা এপ্রিলৰ পৰা অসমৰ সাতখন টোলগেটত টোলকৰৰ পৰিমাণ ন্যূনতম পাঁচ টকাৰ পৰা সৰ্বাধিক ৫০ টকালৈ বৃদ্ধি হ’ব।
টোলকৰ বৃদ্ধি হ’বলগীয়া গেটকেইখন হ’ল- কামৰূপৰ মদনপুৰ, কামৰূপ মহানগৰৰ নাজিৰাখাত, নগাঁৱৰ বহা, নগাঁৱৰে চুলুং, গোলাঘাটৰ ৰঙামাটি, হোজাইৰ ডবকা আৰু বিশ্বনাথৰ ৰটোৱা। কৰৰ পৰিমাণ বৃদ্ধি সন্দৰ্ভত যি জাননী জাৰি কৰা হৈছে, সেই অনুসৰি চুলুং টোলগেটত লঘু বাণিজ্যিক বাহনৰ কৰৰ পৰিমাণ বর্তমান হ’ল দুশ টকা।
পহিলা এপ্ৰিলৰ পৰা এই পৰিমাণ বৃদ্ধি হ’ব ২০৫ টকালৈ। ইপিনে মদনপুৰত ডাবল এক্সেল বাছ ট্রাকৰ বৰ্তমান কৰৰ পৰিমাণ হ’ল ৪৪০ টকা। নতুন নিৰিখত সেই পৰিমাণ হ’ব ৪৭৫ টকা। ইয়াৰ উপৰি যান-বাহনৰ প্ৰকাৰ ভেদে নিৰিখৰ পৰিমাণ ১০ ৰ পৰা ত্রিশ টকা পর্যন্ত বৃদ্ধি হ’ব নতুন বিত্তীয় বৰ্ষৰ প্ৰথম দিনটোৰ পৰা।
অত্যাৱশ্যকীয় সামগ্রী, চিকিৎসা আদিৰ মূল্যবৃদ্ধিত দিশহাৰা জনতাক এনেদৰে টোলকৰ বৃদ্ধিৰে অধিক বোজা জাপি দিবলৈ লোৱা চৰকাৰী সিদ্ধান্তক বহুতে গৰিহণা দিছে। এই চৰকাৰী চানকঢ়া নীতিক লৈ অতিষ্ঠ আজি এজন ট্রাকচালকে ‘দৈনিক অগ্রদূত’ৰ আগত ক্ষোভবে কয়, ‘অসমৰ সমান টোল কৰ আমি ক’তো (আন ৰাজ্য) পোৱা নাই। এতিয়া টোল কৰ বাঢ়িব। ইয়াৰ লগে লগে আমাৰ ভাড়া বাঢ়িব। সমান্তৰালভাৱে বৃদ্ধি পাব বয়-বস্তুৰ দাম। এয়া সাধাৰণ জনতাৰ ওপৰত মাধমাৰ।’
উল্লেখ্য যে অহা পহিলা এপ্ৰিলৰ পৰা চৰকাৰে টোল কৰ পাঁচ শতাংশ বৃদ্ধিৰ সিদ্ধান্ত লৈ জাননী জাৰি কৰিছে। এই জাননীক লৈ প্রতিক্রিয়া প্রকাশ কৰি গুৰবিন্দৰ সিং নামৰ এই ট্রাক চালকজনে প্রচণ্ড ক্ষোভ প্রকাশ কৰে। ট্রাক চালকজনে এনেদৰে মনৰ ভাব প্রকাশ কৰে কলিয়াবৰৰ চুলুং দলাপানী টোলগেটত।
উল্লেখ্য যে দুমাহ পূর্বে মুকলি হোৱা এই টোলগেটতো আন বাজ্যৰ আন টোলগেটসমূহৰ লেখীয়াকৈ কৰ বৃদ্ধিৰ প্ৰস্তাৱ লোৱাক লৈ স্থানীয় ৰাইজে প্রচণ্ড ক্ষোভ প্রকাশ কৰিছে। কাৰণ এই কৰ জনতাই কষ্টোপার্জিত ধনৰ পৰাই দিব লাগিব।
উল্লেখ্য যে মহাবাহু ব্ৰহ্মপুত্ৰৰ ওপৰত কলিয়াবৰ আৰু শোণিতপুৰ সংযোগী কলিয়াভোমোৰা সেতুৰ সমান্তৰালকৈ দ্বিতীয়খন দলঙৰ নিৰ্মাণৰ কাম ইতিমধ্যে সম্পূর্ণ হৈছে। গেমন ইণ্ডিয়া লিমিটেড আৰু এছ পি সিংলা কনস্ট্রাকচন প্রাইভেট লিমিটেডে এই দলং নিৰ্মাণৰ কাম এবছৰ পূৰ্বে সম্পূৰ্ণ কৰে।
দলংখনৰ নিৰ্মাণ কাৰ্য আৰম্ভ হয় ২০২৪ৰ ২৯ নৱেম্বৰত। প্রায় তিনি কিলোমিটাৰ দৈৰ্ঘ্যৰ এই দলং নিৰ্মাণৰ বাবদ ছশ কোটি টকা ব্যয় হয়। এই দলং নিৰ্মাণৰ ব্যয় সংগ্ৰহৰ উদ্দেশ্যে চৰকাৰে টোল কৰ বৃদ্ধিৰ সিদ্ধান্ত লৈছে। এই চৰকাৰী সিদ্ধান্তৰ বিৰুদ্ধে সৰৱ হৈ উঠিছে বিভিন্ন দল-সংগঠনো।
