মধ্যপ্ৰাচ্যত উত্তেজনাপূৰ্ণ পৰিস্থিতিৰ মাজত অৱশেষত স্বস্তিৰ নিশ্বাস ল’লে ইৰাণত আটক হৈ পৰা ভাৰতীয় শিক্ষাৰ্থীসকলে। যুদ্ধসদৃশ পৰিস্থিতিৰ বাবে কেবাদিন ধৰি অনিশ্চয়তাত থকা এই শিক্ষাৰ্থীসকলৰ প্ৰথম দল নিৰাপদে ভাৰতলৈ উভতি আহিছে। প্ৰায় ৭০ জন শিক্ষাৰ্থী লৈ বিমানখন সোমবাৰে নতুন দিল্লীত অৱতৰণ কৰে।
দেশলৈ উভতি অহা শিক্ষাৰ্থীসকল দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰ(Indira Gandhi International Airport)ত উপস্থিত হোৱাৰ লগে লগে বহুজনৰ চকুত আনন্দৰ চকুপানী দেখা যায়। বহুদিনৰ উৎকণ্ঠাৰ পাছত ঘৰলৈ উভতি অহাৰ অনুভূতিত শিক্ষাৰ্থীসকলৰ মাজত স্পষ্টকৈ স্বস্তি দেখা যায়।
তথ্য অনুসৰি, ইৰাণত যুদ্ধৰ পৰিস্থিতিৰ বাবে দেশখনৰ আকাশপথ সাময়িকভাৱে বন্ধ হৈ পৰিছিল। সেইবাবে শিক্ষাৰ্থীসকলক প্ৰথমে বাছৰ জৰিয়তে ইৰাণৰ পৰা সীমান্ত পাৰ কৰি আর্মেনিয়ালৈ লৈ যোৱা হয়। তাৰ পিছত আর্মেনিয়াৰ ৰাজধানী ইয়েৰেভান (Yerevan)ৰ পৰা বিশেষ বিমানৰ ব্যৱস্থা কৰি তেওঁলোকক দিল্লীলৈ অনা হয়।
তথ্য অনুসৰি,দেশলৈ উভতি অহা শিক্ষাৰ্থীসকলৰ অধিকাংশই জম্মু কাশ্মীৰ(Jammu and Kashmir) ৰ। তেওঁলোকে ইৰাণৰ বিভিন্ন বিশ্ববিদ্যালয়ত বিশেষকৈ চিকিৎসা বিদ্যা অধ্যয়ন কৰি আছিল। যুদ্ধজনিত উত্তেজনা বৃদ্ধি পোৱাৰ পিছতেই তেওঁলোকৰ মাজত ভয় আৰু অনিশ্চয়তাৰ পৰিৱেশ সৃষ্টি হৈছিল।
ভাৰত চৰকাৰে জনাইছে যে ইৰাণত এতিয়াও বহু ভাৰতীয় নাগৰিক আৰু শিক্ষাৰ্থী আছে। তেওঁলোকক সুৰক্ষিতভাৱে দেশলৈ উভতাই আনিবলৈ পৰ্যায়ক্রমে অভিযান অব্যাহত থাকিব।
ইতিমধ্যে আগন্তুক দিনত আৰু কেবাটাও বিমান ব্যৱস্থা কৰা হ’ব বুলি সূত্ৰে জানিবলৈ দিছে।
দেশলৈ উভতি অহা এই শিক্ষাৰ্থীসকলক নিজৰ নিজৰ ৰাজ্যলৈ পঠিয়াবলৈও ব্যৱস্থা কৰা হৈছে। চৰকাৰী সূত্ৰ অনুসাৰে, সকলো ভাৰতীয় নাগৰিকক সুৰক্ষিতভাৱে ঘৰলৈ উভতাই অনাটোৱেই এতিয়া চৰকাৰৰ প্ৰধান লক্ষ্য।
ইৰাণৰ সংঘাতময় পৰিস্থিতিৰ মাজত এই শিক্ষাৰ্থীসকলৰ নিৰাপদে ঘৰলৈ উভতি অহাটো বহু পৰিয়ালৰ বাবে যেন এক ডাঙৰ স্বস্তিৰ খবৰ হৈ পৰিছে।