US Israel vs Iran:✒️মধ্যপ্ৰাচ্যত উত্তেজনাপূৰ্ণ পৰিস্থিতিৰ মাজতে বিশ্বৰ অন্যতম ব্যস্ত বিমানবন্দৰৰ ওচৰত সংঘটিত হ’ল ড্ৰ’ন আক্রমণ। এই ঘটনাৰ পাছতে মুহূর্ততে বন্ধ কৰি দিয়া হয় বিমান চলাচল, যাৰ ফলত ডুবাই বিমানবন্দৰত সৃষ্টি হয় তীব্ৰ চাঞ্চল্য আৰু আতংক।
ঘটনাটো সংঘটিত হয় ডুবাই আন্তঃৰাষ্ট্ৰীয় বিমানবন্দৰ(Dubai International Airport)ৰ কাষত। তথ্য অনুসৰি, পুৱতি সময়ত এটা ড্ৰ’ন আক্রমণৰ ফলত বিমানবন্দৰৰ ওচৰত থকা এটা ইন্ধন সংৰক্ষণ টেংকত জুই লাগে।
জুই আৰু ধোঁৱা দেখা পোৱাৰ লগে লগে সুৰক্ষাৰ স্বাৰ্থত তৎক্ষণাৎ সকলো বিমান চলাচল সাময়িকভাৱে বন্ধ কৰি দিয়ে কৰ্তৃপক্ষই।
এই ঘটনাৰ ফলত বহু বিমান বাতিল হয় আৰু বহু বিমানক অন্য বিমানবন্দৰলৈ ঘূৰাই পঠোৱা হয়। বহু যাত্ৰীয়ে বিমানবন্দৰত দীৰ্ঘ সময় অপেক্ষা কৰিব লগা হয়, যাৰ ফলত সৃষ্টি হয় বিশৃংখল পৰিস্থিতি।
দমকল বাহিনী আৰু উদ্ধাৰকাৰী দল তৎক্ষণাৎ ঘটনাস্থলীত উপস্থিত হৈ জুই নিয়ন্ত্ৰণলৈ আনে। স্বস্তিৰ খবৰ এইটো যে ঘটনাটোত এতিয়ালৈকে কোনো লোক আহত হোৱা বা মৃত্যুৰ তথ্য পোৱা হোৱা নাই।
পাছত পৰিস্থিতি নিয়ন্ত্ৰণলৈ অহাৰ পাছত সীমিত পৰিসৰত পুনৰ বিমান চলাচল আৰম্ভ কৰা হয়। কৰ্তৃপক্ষই যাত্ৰীৰে নিজৰ নিজৰ বিমান সংস্থাৰ স’তে যোগাযোগ কৰি বিমানৰ আপডেট ল’বলৈ আহ্বান জনাইছে।
বিশেষজ্ঞসকলৰ মতে, মধ্যপ্ৰাচ্যত বৰ্তমান চলি থকা সংঘাতৰ ফলত অঞ্চলটোত সুৰক্ষা চিন্তা বৃদ্ধি পাইছে। এই ঘটনাই পুনৰবাৰ আন্তঃৰাষ্ট্ৰীয় বিমান চলাচলৰ ওপৰত সংঘাতৰ সম্ভাৱ্য প্ৰভাৱ স্পষ্ট কৰি তুলিছে।