পশ্চিম এছিয়াত চলি থকা সংঘাতৰ মাজতে সামাজিক মাধ্যমত বিভ্ৰান্তিকৰ তথ্য প্ৰচাৰ কৰাৰ অভিযোগত ১৯ জন ভাৰতীয় নাগৰিকৰ বিৰুদ্ধে কঠোৰ ব্যৱস্থা গ্ৰহণ কৰিছে সংযুক্ত আৰব আমিৰা(United Arab Emirates)ৰ কৰ্তৃপক্ষই।
এই ঘটনাই বিদেশত বসবাস কৰা ভাৰতীয়সকলৰ মাজতো যথেষ্ট চাঞ্চল্য সৃষ্টি কৰিছে।
তথ্য অনুসৰি, ইউএইত মুঠ ৩৫ জন লোকক গ্ৰেপ্তাৰ কৰা হৈছে, যাৰ ভিতৰত ১৯ জন ভাৰতীয়। তেওঁলোকৰ ওপৰত অভিযোগ হৈছে যে পশ্চিম এছিয়াত চলি থকা সংঘাতক লৈ সামাজিক মাধ্যমত ভুৱা বা বিকৃত ভিডিঅ’ আৰু তথ্য প্ৰচাৰ কৰিছিল।
এইবোৰৰ ভিতৰত কিছুমান AI-generated বা সম্পাদিত ভিডিঅ’ আছিল যিয়ে জনসাধাৰণৰ মাজত বিভ্ৰান্তি আৰু আতংক সৃষ্টি কৰিব পাৰে বুলি অভিযোগ কৰিছে ইউএইৰ কৰ্তৃপক্ষই।
ইউএইৰ এটৰ্ণি জেনেৰেল হামাদ ছাইফ আল ছামছি(Hamad Saif Al Shamsi)য়ে জনাইছে যে ডিজিটেল প্লাটফৰ্মসমূহ কঠোৰভাৱে নিৰীক্ষণ কৰাৰ পাছত এই ব্যৱস্থা গ্ৰহণ কৰা হৈছে। তদন্তত প্ৰকাশ পায় যে অভিযুক্তসকলে তিনিটা ভিন্ন ধৰণৰ পোষ্ট কৰিছিল—কিছুমানে ক্ষেপণাস্ত্ৰ বা সামৰিক কাৰ্যকলাপৰ ভিডিঅ’ শ্বেয়াৰ কৰিছিল, কিছুমানে কৃত্ৰিম বা AI-তৈয়াৰ ভিডিঅ’ প্ৰচাৰ কৰিছিল আৰু আন কিছুমানে সংঘাতৰ বিষয়ে বিভ্ৰান্তিকৰ তথ্য প্ৰচাৰ কৰিছিল।
কর্তৃপক্ষৰ মতে এই ধৰণৰ পোষ্টে দেশৰ সুৰক্ষা ব্যৱস্থা আৰু জনসাধাৰণৰ শান্তি বিঘ্নিত কৰিব পাৰে। সেইবাবে অভিযুক্তসকলৰ বিৰুদ্ধে তীব্ৰ আইনী ব্যৱস্থা লোৱা হৈছে আৰু তেওঁলোকক দ্রুত বিচাৰৰ বাবে আদালতলৈ প্ৰেৰণ কৰা হৈছে।
আইন অনুসৰি দোষী সাব্যস্ত হ’লে কমেও এক বছৰৰ জেল আৰু এক লাখ দিৰহামৰ অধিক জৰিমনা হ’ব পাৰে।
উল্লেখযোগ্য যে পশ্চিম এছিয়াত চলি থকা সংঘাতৰ বাবে অঞ্চলটোত উত্তেজনা বৃদ্ধি পাইছে। এই পৰিস্থিতিত ইউএই চৰকাৰে আগতেই বাসিন্দাসকলক আক্রমণ বা সামৰিক ঘটনাৰ ভিডিঅ’ তোলা আৰু শ্বেয়াৰ নকৰিবলৈ সতর্ক কৰিছিল। তথাপিও কিছুমান লোকে নিয়ম অমান্য কৰাৰ বাবে এতিয়া এই কঠোৰ পদক্ষেপ লোৱা হৈছে।
এই ঘটনাই সামাজিক মাধ্যমত ভুৱা তথ্য প্ৰচাৰৰ বিপদ আৰু বিদেশত আইন মানি চলাৰ প্ৰয়োজনীয়তাৰ বিষয়টো পুনৰ স্পষ্ট কৰি তুলিছে।
