Congress -Raijor Dal:
দৈনিক অগ্ৰদূত ডিজিটেল ডেক্স:দিছপুৰৰ মচনদৰ পৰা বিজেপিক উৎখাত কৰাৰ লক্ষ্যৰে কংগ্ৰেছৰ নেতৃত্বত গঠন হোৱা উমৈহতীয়া মঞ্চৰ পৰা আসন বুজাপৰা ক্ষেত্ৰত সৃষ্টি হোৱা মতানৈক্যৰ বাবে ৰাইজৰ দল একাষৰীয়া হৈ পৰে ৷ যাৰবাবে ইতিমধ্যে কংগ্ৰেছ দুখন প্ৰাৰ্থী তালিকা ঘোষণা কৰাৰ বিপৰীতে মিত্ৰজোঁটৰ চিপিএম ,চিপিআইৰ এমএল আৰু এপিএইছএলচিয়েও ঘোষণা কৰিছে নিজ নিজ দলৰ প্ৰাৰ্থীৰ তালিকা ৷
একেদৰে কংগ্ৰেছ মিত্ৰজোঁটৰ কৰা কাৰ্যত একাষৰীয়া হোৱা অখিল গগৈৰ ৰাইজৰ দলেই দুখনকৈ প্ৰাৰ্থী তালিকা ঘোষণা কৰিছে ৷ অৱশ্যে কংগ্ৰেছ মিত্ৰজোঁটৰ অন্যতম অংশীদাৰী দল অসম জাতীয় পৰিষদে ঘোষণা কৰা নাই প্ৰাৰ্থী তালিকা ৷ দুই- এদিনৰ ভিতৰতে প্ৰাৰ্থী তালিকা ঘোষণা কৰাৰ সম্ভাৱনা আছে ।
কংগ্ৰেছে মিত্ৰতা হৈ নোথাৰ বাবে অখিল গগৈয়ে টাৰ্গেট কৰি লয় এপিচিচিৰ সভাপতি গৌৰৱ গগৈ আৰু সাংসদ ৰকিবুল হুছেইনক ৷ আনকি কংগ্ৰেছে- ৰাইজৰ দলৰ মাজত মিত্ৰতা গঢ়াৰ ক্ষেত্ৰত আশানুৰূপ উদ্যোগ লুৰিণজ্যোতি গগৈয়ে নোলোৱাৰো গুৰুতৰ অভিযোগ অখিল গগৈৰ ৷ আনহাতে এনে ঘটনাক্ৰমৰ মাজতে শেহতীয়াকৈ এক খবৰে পুনৰ আশাৰ ৰেঙনি কঢ়িয়াই আনিছে বুলি ৰাজনৈতিক মহলে মন্তব্য কৰিছে ৷ এক উচ্চস্তৰীয় খবৰ অনুসৰি কংগ্ৰেছ–ৰাইজৰ দলৰ মাজত মিত্ৰতাক লৈ পুনৰ আলোচনা চলাৰ খবৰ ।
এআইচিচিৰ এজন জ্যেষ্ঠ নেতাই উদ্যোগ লৈছে মিত্ৰতাৰ আলোচনাত । ধিং , দলগাওঁ সমষ্টিকলৈ সহমতত উপনীত হোৱা নাছিল কংগ্ৰেছ–ৰাইজৰ দলৰ নেতৃত্ব । এৰা–ধৰা নীতিৰে মিত্ৰতা কৰাৰ পক্ষত আগবাঢ়িছে দুয়োটা দলৰ নেতৃত্ব । শিৱসাগৰ , মৰিয়নি , তেজপুৰ , নাওবৈচা , ধিং , দলগাওঁ , জালুকবাৰীত বৰ্তমানলৈ প্ৰাৰ্থী ঘোষণা কৰা নাই কংগ্ৰেছ দলে । একেদৰে বৰচলা , যোৰহাট , দিছপুৰ, মন্দিয়াত এতিয়ালৈ প্ৰাৰ্থী ঘোষণা কৰা নাই ৰাইজৰ দলে ইতিমধ্যে আন সমষ্টিত দুখনকৈ প্ৰাৰ্থী তালিকা ঘোষণা কৰিছে দুয়োটা দলে ।
অৱশ্যে আলোচনা সফল হলে শীঘ্ৰে মিত্ৰতাৰ সিদ্ধান্তত উপনীত হব পাৰে কংগ্ৰেছ- ৰাইজৰ দল ৷ অন্যথা আনুষ্ঠানিক মিত্ৰতা নহলেও দুয়োটা দলৰে মাজত হব পাৰে ভিতৰুৱা বুজাবুজি । সমষ্টি বিশেষে এটা দলে আন এটা দলক কৰিব পাৰে সহায় । অৱশ্যে মাৰ্ঘেৰিটা সমষ্টিত দুয়োটা দলে সমানে যুজঁত নমাৰ সম্ভাৱনা ।
আনহাতে এই সন্দৰ্ভত ৰাইজৰ দলৰ মুৰব্বী অখিল গগৈয়ে কয়,কিছুমান মানুহে এতিয়াও মিছা প্ৰচাৰ কৰি আছে কংগ্ৰেছৰ সৈতে এতিয়াও মিত্ৰতাৰ আলোচনা চলি আছে বুলি৷ ১৩ মার্চ তাৰিখে কংগ্রেছে ধিং, নাওবৈচা, দলগাঁৱ, ৰঙানদী সমষ্টি নিদিওঁ বুলি কোৱাৰ পৰাই কংগ্ৰেছৰ সৈতে কোনো আলোচনা হোৱা নাই ৷