Nagaon:
নির্বাচনী বতাহ অধিক উষ্ম কৰি বৃহস্পতিবাৰে সমাগত নিৰ্বাচনৰ ৰূপহীহাটৰ কংগ্ৰেছ প্রার্থী নুৰুল হুদাই মনোনয়নপত্র দাখিল কৰে। এইবাৰ ক্ৰমাগত তৃতীয়বাৰৰ বাবে সমষ্টিটোৰ পৰা প্রতিদ্বন্দ্বিতা কৰা হুদাক মনোনয়নপত্র দাখিলৰ সময়ত কংগ্রেছ সাংসদ ৰকিবুল হুছেইনসহ দলৰ কে’বাজনো জ্যেষ্ঠ নেতাই সংগ দিয়ে। উচ্ছবসিত সমর্থকসকলক লৈ হুদাই নগাঁৱৰ জিলা ৰিটার্নিং বিষয়াৰ ওচৰত মনোনয়নপত্র দাখিল কৰে। পাছত তেওঁ সাংবাদিকৰ আগত কয়, ‘সৃষ্টিকর্তা আৰু সমষ্টিৰ ৰাইজৰ আশীৰ্বাদ লৈ মই মনোনয়নপত্র দাখিল কৰিলো। এইবাৰ গৌৰৱ গগৈৰ নেতৃত্বত ৰাজ্যত কংগ্ৰেছৰ চৰকাৰ হ’ব।ৰূপহীহাটক নতুন ৰূপত সজাই তুলিম।’
আনহাতে, শেহতীয়াভাৱে বিজেপি গমন কৰা সাংসদ প্রদ্যুৎ বৰদলৈ কংগ্ৰেছৰ হাইপ্রফাইল নেতা নাছিল বুলি হুদাই কটাক্ষ কৰে। বৰদলৈৰ বিজেপি গমনে কংগ্ৰেছৰ কোনো ক্ষতি নকৰে বুলিও তেওঁ দাবী কৰে। হুদাই লগতে কয়, ‘এইবাৰ কংগ্ৰেছ নতুন ৰূপত শক্তিশালী হৈ উঠিছে। এআইইউডিএফৰ আমিনুল ইছলামে মোৰ সন্মুখত একো প্রত্যাহ্বান সৃষ্টি কৰিব নোৱাৰে। ৰাইজৰ আশীর্বাদ আমাৰ লগত আছে। আমি নিশ্চিতভারে জয়ী হ’ম। মই আগতকৈ অধিক ভোটৰ ব্যৱধানত জয়ী হ’ম।’
আনহাতে, ধুবুৰীৰ সাংসদ হুছেইনে কয়, ‘এইবাৰ ৰাজ্যত কংগ্রেছ নেতৃত্বাধীন মিত্ৰদলৰ চৰকাৰ হ’ব। বিজেপিৰ বিৰুদ্ধে ৰাইজৰ মাজত ঢৌ উঠিছে। সকলো মানুহে হিমন্ত বিশ্ব শৰ্মাৰ পতন বিচাৰিছে।’ হুছেইনে প্রকাশ কৰা অনুসৰি, তেওঁৰ পুত্ৰ তথা চামগুৰি সমষ্টিৰ কংগ্ৰেছ প্রার্থী তাঞ্জিল হুছেইনে অহা ২৩ মার্চত মনোনয়নপত্র দাখিল কৰিব।