Amiya Kr bhuyan:ৰাজ্যিক বিজেপিৰ উপ- সভাপতি লাভৰ পিছতে নিৰ্দলীয়ৰূপে মনোনয়ন দাখিলৰ ঘোষণা প্ৰত্যাহাৰ বিধায়ক অমিয় ভূঞাৰ

Amiya Kr bhuyan:

দৈনিক অগ্ৰদূত ডিজিটেল ডেক্স: বিজেপিৰ একাংশ প্রার্থিত্ব বঞ্চিত নেতাৰ লুটিবাগৰ মৰা চৰিত্ৰত বিভ্রান্ত হৈছে দলৰ তৃণমূল নেতা-কর্মী। বিজেপিৰ ৮৮ জনীয়া তালিকা প্রকাশৰ পাছত টিকট বঞ্চিতসকলৰ বহুকেইজনে ক্ষোভ উজাৰি দলত্যাগ কৰাৰ লগতে নির্দলীয়ৰূপে প্রতিদ্বন্দ্বিতা কৰাৰ হুংকাৰ দিয়ে যদিও পৰিশেষত মূলতঃ মুখ্যমন্ত্রী ড: হিমন্ত বিশ্ব শৰ্মাৰ ঘোষণা অনুসৰিয়ে দলৰ উপ-সভাপতিৰ দায়িত্ব লাভ কৰাৰ পাছতে সুৰ সলনি হয় ভূঞাৰ।

পুৱা লম্ফ-জম্ফ কৰাৰ পাছত নিশা ৰাজ্যিক বিজেপিৰ সভাপতি দিলীপ শইকীয়া স্বাক্ষৰিত জাননীত কোৱা হয় যে তাৎক্ষণিকভাৱে বলবৎ হোৱাকৈ তেওঁক অসম ৰাজ্যিক বিজেপিৰ উপ-সভাপতিৰূপে নিযুক্তি প্ৰদান কৰা হ’ল। পুৱাৰ ভাগত সামাজিক মাধ্যমযোগে দলৰ সকলো পদবীৰ পৰা অব্যাহতি লোৱা বুলি ঘোষণা কৰা বিধায়কজনে নিশালৈ বিপৰীতমুখী ভাষ্য প্রদান কৰে। মুখ্যমন্ত্রী শর্মাই সামাজিক মাধ্যমৰ জৰিয়তে প্ৰকাশ কৰা ভাষ্যৰ ভিত্তিতে বিধায়কজনৰ সুৰ সলনি হোৱা বুলি তুমুল চৰ্চা আৰম্ভ হৈছে। মুখ্যমন্ত্রীয়ে নিশা সংবাদ মাধ্যমক কয় যে দলৰ ৰাজ্যিক সভাপতি দিলীপ শইকীয়াই ভূঞাক বিজেপিৰ ৰাষ্ট্ৰীয় সমিতিৰ উপ-সভাপতিৰ দায়িত্বত অন্তর্ভুক্ত কৰাব। পৰৱৰ্তী সময়ত বিজেপিৰ দল আৰু চৰকাৰৰ কামতো জড়িত কৰিম বুলি মুখ্যমন্ত্রীয়ে প্রতিশ্রুতি দিয়ে।

ইয়াৰ পাছতে ভূঞাই ‘দৈনিক অগ্রদূত’ৰ আগত কয় যে তেওঁ দলৰ এজন শৃংখলিত সৈনিক। এই মর্মে মুখ্যমন্ত্রী আৰু দলৰ সভাপতিয়ে কিবা এটা কথা ক’লে তাক অমান্য কৰাটো অসুবিধাজনক বিষয়। তদুপৰি এইদৰেও কয় যে তেওঁ পদত্যাগ কৰা নাই, অব্যাহতিহে লৈছে। ভূঞাই কয়, ‘পুনৰ তৃতীয়বাৰৰ বাবে মুখ্যমন্ত্রী হিমন্ত বিশ্ব শৰ্মাৰ নেতৃত্বত বিজেপি চৰকাৰ বিচাৰিছো আৰু বিজেপি চৰকাৰ আমি গঠন কৰিম।

উল্লেখ্য যে ভূঞাৰ এই ভাষ্যই তীব্ৰ সম্ভাৱনা প্ৰকাশ কৰিলে যে তেওঁ সোমবাৰে নির্দলীয়ৰূপে মনোনয়ন দাখিল কৰিবলগীয়া কাৰ্যসূচী বাতিল কৰে ৷ দেওবাৰৰ দিনটোৰ ভিতৰতে লুটিবাগৰ মাৰি বিধায়কজনে দলীয় উচ্চ বিষয়বাব লাভৰ সপোনত মগ্ন হোৱা বুলিও তেওঁৰ সমষ্টিতে চর্চা হৈছে।

মনকৰিবলগীয়া যে দেওবাৰৰ দিনৰ ভাগত বিহপুৰীয়াৰ বিদায়ী বিধায়ক ভূঞাই দলীয় প্রার্থিত্বৰ পৰা বঞ্চিত হোৱাত মুখ্যমন্ত্ৰীৰ বিৰুদ্ধে মুকলিকৈ ক্ষোভ প্রকাশ কৰি কয় যে তেওঁ অৱশেষত দল ত্যাগ কৰি নির্দলীয়ৰূপে প্রতিদ্বন্দ্বিতা কৰাৰ প্ৰস্তুতি চলাইছে। দুই হাত যোৰ কৰি তেওঁ কয় যে সোমবাৰে সমষ্টিটোৰ নিৰ্দলীয় প্রার্থীৰূপে মনোনয়ন দাখিল কৰিব। অৱশ্যে সদায়ে বিজেপিৰ স’তে থাকিব বুলিও ভূঞাই জানিবলৈ দিছে। ভূঞাই আৰু কয়, ‘সোমবাৰে মই পুৱা ন বজাত জিলা আয়ুক্ত কার্যালয়ত মনোনয়নপত্র দাখিল কৰিম। সেয়েহে সমষ্টিবাসী ৰাইজৰ উপস্থিতি তথা সহযোগিতা কামনা কৰিছো।

উল্লেখ্য যে ন-বিজেপি ভূপেন বৰাক টিকট দিয়াৰ পাছতে তেওঁ এই সিদ্ধান্ত লয় আৰু কয় যে হোৱাটছএপযোগে দলীয় নেতৃত্বক তেওঁ পদত্যাগপত্ৰ প্ৰেৰণ কৰিব। অৱশ্যে এই পদত্যাগৰ বিষয়টো ভূঞাৰ নাটক নেকি বুলিও দিনজোৰা চৰ্চা অব্যাহত থাকে। তেওঁ কয়, ‘এই মুহূৰ্তত মই দলৰ প্ৰাথমিক সদস্য পদৰ পৰা অব্যাহতি লৈছো। তাৰ বাবে মই চিঠি প্ৰেৰণ কৰিম। সকলো পদৰ পৰা অব্যাহতি বিচাৰি মই ৰাজ্যিক সভাপতিলৈ হোৱাটছএপ প্ৰেৰণ কৰিম। দলৰ ভেটি সুদৃঢ় কৰাৰ বাবে নিষ্ঠাৰে কাম কৰিছিলো। মই প্রার্থিত্ব লাভ নকৰাৰ পাছতো সকলো প্রার্থীকে শুভেচ্ছা দিছিলো।’ তাৰ পাছতো পৰৱৰ্তী সময়ত তেওঁৰ দায়িত্ব কি হ’ব এই বিষয়ে দলৰ নেতৃত্বই জনোৱা নাই বুলিও তেওঁ কয়।