Indian Oil:✒️সম্প্রতি দেশত মজুত থকা খাৰুৱা তেলেৰে সংকটৰ সময়ত মাথোঁ নদিনহে দেশ চলিব। মধ্য প্রাচ্যৰ ভয়াৱহ যুদ্ধ তথা ইৰানে হৰমুজ প্রণালী বন্ধ কৰি দিয়াৰ ফলত খাৰুৱা তেলৰ নাটনি সৃষ্টিৰ আশংকা প্রকট হোৱাৰ সময়তে এই তথ্য পোহৰলৈ আহিছে।
এই তথ্য প্রকাশ কৰিছে স্বয়ং কেন্দ্রীয় পেট্র’লিয়াম মন্ত্রণালয়ে। এখন আৰটিআই আবেদনৰ ভিত্তিত পেট্র’লিয়াম মন্ত্রণালয়ে জনায় যে সম্প্রতি দেশত ৫৩.৩ লাখ মেট্রিক টন খাৰুৱা তেল মজুত আছে ।এই তৈল ভাণ্ডাৰ মজুত আছে।
অন্ধ্রপ্রদেশৰ বিশাখাপট্টনম, কৰ্ণাটকৰ মাংগালুৰু আৰু পাদুৰেত। অংকৰ হিচাপত বিপুল যেন অনুভৱ হ’লেও উক্ত তিনি ভাণ্ডাৰত মজুত থকা খাৰুৱা তেলেৰে দেশ মাথোঁ চাৰে নদিনহে চলিব।
লক্ষ্যণীয় যে ব্ৰিটিছৰ দিনৰ পৰা অসমত খাৰুৱা তেল উৎপাদন হৈ থাকিলেও অসমত খাৰুৱা তেলৰ মজুত ভাণ্ডাৰ নাই। আনহাতে, ৰাজ্যসভাত কেন্দ্ৰীয় চৰকাৰে প্ৰকাশ কৰা অনুসৰি দেশৰ খাৰুৱা তেলৰ ভাণ্ডাৰ সম্পূৰ্ণৰূপে ব্যৱহাৰ কৰা হোৱা নাই।
আমদানি আৰু চাহিদা অনুসৰি দেশত খাৰুৱা তেল মজুতৰ পৰিমাণৰ হ্রাস-বৃদ্ধি ঘটে বুলিও চৰকাৰে সদৰী কৰিছে। চৰকাৰী পক্ষই প্ৰকাশ কৰা অনুসৰি, সংকটৰ সময়ত পৰিস্থিতি মোকাবিলাৰ উদ্দেশ্যে কেন্দ্ৰীয় চৰকাৰে দেশত খাৰুৱা তেল মজুতৰ পৰিমাণ বৃদ্ধিৰ পৰিকল্পনা কৰিছে।
এই উদ্দেশ্যে ২০২১ত কেন্দ্রই দুটা তৈল ভাণ্ডাৰৰ অনুমোদন জনায়। ইয়াৰে এটা তৈল ভাণ্ডাৰ ওড়িছাৰ চান্দিখোল আৰু আনটো কৰ্ণাটকৰ পাদুৰত অৱস্থিত। ইয়াৰ পূৰ্বে ২০০৪ৰ সাত জানুৱাৰীৰ পৰা মাৰ্চৰ ভিতৰত কেন্দ্ৰীয় চৰকাৰে এটা ৰণনীতিগত তৈল ভাণ্ডাৰৰো অনুমোদন জনায়।
এই প্রকল্প ৰূপায়ণৰ বাবে উক্ত বছৰৰ জুনত ভাৰতীয় ৰণনীতিগত পেট্র’লিয়াম মজুত কেন্দ্ৰ তৈয়াৰ কৰা হয়। লক্ষ্যণীয়ভাৱে মধ্য প্রাচ্যৰ যুদ্ধৰ শীঘ্ৰে অন্ত পৰাৰ সম্ভাৱনায়ো দেখা দিয়া নাই। গতিকে চৌদিশে খাৰুৱা তেলৰ নাটনি ঘটাৰ আশংকা প্ৰবল হৈছে। অৱশ্যে এনে পৰিস্থিতিতে নৰেন্দ্ৰ মোদীয়ে অলপতে প্রকাশ কৰে যে বিগত ১১ বছৰত ভাৰতে তেল আমদানিলৈ বৈচিত্র আনে।
অৰ্থাৎ দেশে বিশ্বৰ ৪১ খন দেশৰ পৰা খাৰুৱা তেল ক্ৰয় কৰিবলৈ লৈছে। পূর্বে ভাৰতে তেল আমদানি কৰা দেশৰ সংখ্যা আছিল ২৭ খন।