Bikaji Foods Founder Shiv ratan Agarwal Passes Away:
দৈনিক অগ্ৰদূত ডিজিটেল ডেক্স:-দেশৰ প্ৰখ্যাত ভুজিয়া প্ৰস্তুতকৰণ প্ৰতিষ্ঠান ‘বিকাজী’ৰ প্রতিষ্ঠাপক শিৱ ৰতন আগৰৱালাৰৰ দেহাৱসান ৷ হৃদক্রিয়া বন্ধ হৈ শেষ নিশ্বাস ত্যাগ কৰে ‘ভুজিয়া কিং’ খ্যাত ‘বিকাজী’ৰ মুৰব্বী গৰাকীয়ে ৷মৃত্যুৰ সময়ত তেওঁৰ বয়স আছিল ৭৫ বছৰ। বৰ্তমান বিকাজী ফুডছ ভাৰতৰ সৰ্ববৃহৎ স্নেকছ ব্ৰেণ্ড। ভাৰতীয় বজাৰত এই ব্ৰেণ্ডৰ যথেষ্ট সমাদৰ আছে। শিৱৰতন আগৰৱালাৰ মৃত্যুৰ লগে লগে ভাৰতৰ এটা স্নেকছ ব্ৰেণ্ডৰ এক যুগৰ অন্ত পৰিল।
জানিব পৰা মতে নিজ বাসগৃহত হঠাৎ অসুস্থ হৈ পৰে শিৱৰতন আগৰৱাল। পৰিয়ালৰ লোকে তেওঁক ততাতৈয়াকৈ চেন্নাইৰ এখন ব্যক্তিগত চিকিৎসালয়লৈ ভৰ্তি কৰে। কিন্তু তেওঁক ৰক্ষা কৰিব পৰা নগ’ল। হাস্পাতালতে শেষ নিশ্বাস ত্যাগ কৰে।। শেহতীয়াকৈ তেওঁৰ পত্নীৰ বাইপাছ অস্ত্ৰোপচাৰ কৰা হৈছিল আৰু চিকিৎসকে তেওঁক জিৰণি ল’বলৈ পৰামৰ্শ দিছিল। এই সময়ত শিৱৰতন আগৰৱালাই চেন্নাইত থকাৰ সিদ্ধান্ত লয়।
উল্লেখ্য যে পৰম্পৰাগত ভাৰতীয় জলপানক বিশ্বব্যাপী ব্ৰেণ্ডলৈ ৰূপান্তৰিত কৰাত শিৱৰতন আগৰৱালাৰ ভূমিকা অনস্বীকাৰ্য। বিকাজীক দেশৰ ঘৰুৱা নামলৈ ৰূপান্তৰিত কৰাত তেওঁ গুৰুত্বপূৰ্ণ ভূমিকা পালন কৰিছিল। তেওঁৰ নেতৃত্বত কোম্পানীটোৱে ৰাজস্থানৰ আঞ্চলিক প্ৰতিষ্ঠানৰ পৰা ভূজিয়া, টেঙা জলপান, মিঠাই আৰু ৰেডি টু ইট সামগ্ৰীৰ বাবে পৰিচিত আন্তঃৰাষ্ট্ৰীয় স্বীকৃতিপ্ৰাপ্ত ব্ৰেণ্ডলৈ বৃদ্ধি পাইছে।
বৃহস্পতিবাৰে বিকাজী ফুডছ ইণ্টাৰনেশ্যনেলে এক বিবৃতিত কয়, “শিৱ ৰতন আগৰৱালে প্রস্তুতিৰ পৰাই কোম্পানীটোৰ চালিকা শক্তি আছিল আৰু ‘বিকাজী’ ব্ৰেণ্ডৰ ভেটি স্থাপন কৰিছিল। তেওঁ আধুনিক ব্যৱসায়িক পদ্ধতিৰ সৈতে প্ৰামাণিক ৰুচিৰ সংমিশ্ৰণেৰে পৰম্পৰাগত বিকানেৰী জলপান ব্যৱসায়ক আন্তৰ্জাতিক স্বীকৃতিপ্ৰাপ্ত বিকাজী ব্ৰেণ্ডলৈ ৰূপান্তৰিত কৰি কোম্পানীটোক সফলতা আৰু প্ৰগতিৰ পথত পৰিচালিত কৰাত গুৰুত্বপূৰ্ণ ভূমিকা পালন কৰিছে।” কৌশলগত বুদ্ধিমত্তা আৰু দক্ষতাৰে জটিল প্ৰত্যাহ্বানসমূহ মোকাবিলা কৰাৰ ক্ষমতাই আমাৰ কাৰ্য্যকলাপৰ বহনক্ষমতাক যথেষ্ট শক্তিশালী কৰিছে।” ‘হালদিৰাম’ আৰম্ভ হৈছিল ১৯৩৭ চনত, স্বাধীনতাৰ আগতে।
ৰাজস্থানৰ বিকানেৰ চহৰত এখন সৰু দোকান স্থাপন কৰা হৈছিল, যিখন জলপান অৰ্থাৎ নিমকিৰ বাবে বিখ্যাত হৈ পৰিছিল। দোকানীজনৰ নাম গংগাভিষণ আগৰৱালা। তেওঁৰ নাতি শিৱৰতন আগৰৱালা। ১৯৯৩ চনত ৰাজস্থানৰ বিকানেৰত ‘বিকাজী’ ব্ৰেণ্ড আৰম্ভ কৰি অতি কম সময়ৰ ভিতৰতে ভাৰতৰ অন্যতম বৃহৎ জলপান আৰু নামকিন প্ৰস্তুতকাৰী প্ৰতিষ্ঠান হিচাপে গঢ়ি তুলিছিল।