Strait of Hormuz:✒️পশ্চিম এছিয়াত চলি থকা উত্তেজনাৰ মাজতে বিশ্ব তেল যোগান ব্যৱস্থাৰ ওপৰত বৃহৎ আঘাতৰ আশংকা বৃদ্ধি পাইছে। আমেৰিকাৰ এক শক্তি সংস্থাই সতর্ক কৰি কৈছে যে, Strait of Hormuz বন্ধ বা আংশিক ব্যাহত হৈ থাকিলে এপ্ৰিল মাহত তেল যোগানৰ ব্যাঘাত দুগুণ বৃদ্ধি পাব পাৰে।
প্ৰাপ্ত তথ্য অনুসৰি, বিশ্বৰ অন্যতম গুৰুত্বপূৰ্ণ তেল পৰিবহন পথ হিচাপে পৰিচিত এই প্ৰণালীৰ জৰিয়তে দৈনিক বিপুল পৰিমাণে ক্ৰুড অইল আৰু গেছ সৰবৰাহ কৰা হয়। এই পথত বিঘ্ন ঘটিলে বিশ্ববজাৰত তৎক্ষণাত প্ৰভাৱ পৰাটো স্বাভাৱিক।
বিশেষজ্ঞসকলে উল্লেখ কৰিছে যে, এই প্ৰণালীটোৰ ওপৰত অধিক নিৰ্ভৰশীল দেশসমূহত তেল যোগান বিঘ্নিত হোৱাৰ সম্ভাৱনা অধিক। লগতে তেলৰ মূল্যত অস্থিৰতা আৰু হঠাৎ বৃদ্ধি দেখা যাব পাৰে বুলি আশংকা প্ৰকাশ কৰা হৈছে।
ইফালে, চলি থকা সংঘাতৰ ফলত ইতিমধ্যে উপসাগৰীয় সামুদ্রিক পথসমূহত সুৰক্ষা আৰু বাণিজ্যিক জাহাজ চলাচলৰ ওপৰত চাপ বৃদ্ধি পাইছে।এই পৰিস্থিতিত তেলবাহী জাহাজসমূহৰ চলাচল কমি যোৱাৰ সম্ভাৱনাও দেখা দিছে।
বিশ্ব শক্তি বজাৰ বিশ্লেষকসকলে কয় যে, যদি এই অৱস্থা দীঘলীয়া হয়, তেন্তে বিশ্ব অৰ্থনীতিৰ ওপৰত ইয়াৰ গভীৰ প্ৰভাৱ পৰিব পাৰে। বিশেষকৈ, তেল আমদানি নিৰ্ভৰ দেশসমূহৰ বাবে এইটো এক ডাঙৰ চেলেঞ্জ হিচাপে দেখা গৈছে।
বৰ্তমান এই সতর্কবাণীয়ে স্পষ্টকৈ দেখুৱাইছে যে, পশ্চিম এছিয়াৰ সংঘাত কেৱল আঞ্চলিক পৰ্যায়তে সীমাবদ্ধ নাথাকি বিশ্বজুৰি শক্তি সুৰক্ষা আৰু অৰ্থনৈতিক স্থিৰতাৰ ওপৰত প্ৰত্যক্ষ প্ৰভাৱ পেলাবলৈ আৰম্ভ কৰিছে।