Barpeta:
দৈনিক অগ্ৰদূত ডিজিটেল ডেক্স:–ৰাজ্যৰ বিধানসভা নিৰ্বাচনৰ দিন চমু চাপি অহাৰ লগে লগে অসমলৈ আগমন ঘটিছে হাই প্ৰফাইল তাৰকা প্ৰচাৰকৰ। এআইইউডিএফৰ প্ৰক্ষেপিত প্ৰাৰ্থীৰ হৈ জনসভাত অংশ লোৱাৰ উদ্দেশ্যৰে বুধবাৰে সন্ধিয়া গুৱাহাটীত উপস্থিত হোৱা এআইএমআইএমৰ মুৰব্বী তথা হাইদৰাবাদৰ সাংসদ আছাদুদ্দিন ওৱেছিয়ে বৃহস্পতিবাৰে বৰপেটাত এআইইউডিএফৰ এক বিশাল সভাত অংশ লৈ মুখ্যমন্ত্ৰী ড:হিমন্ত বিশ্বশৰ্মাৰ বিৰুদ্ধে সোচ্ছাৰ হৈ পৰে ৷ মুখ্যমন্ত্ৰীয়ে মিঞাৰ কামিহাড় ভাঙি দিয়া বুলি সভাই- সমিতিয়ে মন্তব্য দিয়াৰ সন্দৰ্ভত ওৱেছিয়ে মুখ্যমন্ত্ৰী গৰাকীক এক প্ৰকাৰ অপেন চেলেন্স দি কয়,মুছলমানৰ কামিহাড় ক’ত ভাঙিব ক’ব লাগিব হিমন্তই ৷অসমৰ মুছলমানক শেষ কৰাৰ পূৰ্বে মোক শেষ কৰক৷অসমৰ মুছলমানক গুলী কৰিব খোজাৰ আগতে ওৱেছিক গুলিয়াব লাগিব ৷অসমৰ মুছলমানক শেষ কৰাৰ পূৰ্বে মোক শেষ কৰক ৷ মুছলমানক সাহস দিবলৈ মই অসমলৈ আহিছো ৷কোনেও হিমন্ত বিশ্ব শর্মাক ভয় কৰাৰ দৰকাৰ নাই৷কোনেও জীয়াই নাথাকে, অন্যায় এদিন শেষ হ’ব ৷
উচ্ছেদৰ জৰিয়তে মছজিদ, দৰগাহ কাঢ়ি লোৱাৰ চেষ্টা বিজেপিৰ বুলি উল্লেখ কৰি হাইদৰাবাদৰ সাংসদ গৰাকীয়ে আৰু কয় যে,অসমত মুছলমানক ঘৰৰ পৰা উলিয়াই দিয়া হৈছে l এনকাউণ্টাৰৰ নামত অত্যাচাৰ চলোৱা হৈছে৷ বাংলাদেশীৰ নামত হাৰাশাস্তি কৰা হৈছে ৷মুছলমানক একত্রিত হ’বলৈ আহ্বান জনাই ওৱেছিৰ আহ্বান অসমত মুছলমান নেতাক শক্তিশালী কৰিব লাগিব ৷
আনহাতে কংগ্ৰেছক তীব্ৰ আক্ৰমণ কৰি ওৱেছিয়ে কয়,ৰাজ্য সুদীৰ্ঘ সময় কংগ্ৰেছ শাসন কৰাৰ পিছতো ধৰ্মীয় সংখ্যালঘু ৰাইজ অৱহেলিত হৈ থাকিল ৷ তেওঁলোকক ভোট বেংক ৰূপে ব্যৱহাৰ কৰি ৰাখিলে। এনেক্ষেত্ৰত সংখ্যালঘুৰ বলিষ্ঠ কণ্ঠ হিচাপে পৰিচিত এআইইউডিএফৰ পক্ষত অৱস্থান কৰক ৷কংগ্ৰেছ বিকল্প এআইইউডিএফ ৷ আগন্তুক নিৰ্বাচনত দিছপুৰৰ মচনদৰ পৰা বিজেপিক উৎখাত কৰাৰ স্বাৰ্থত সংখ্যালঘু ৰাইজে এআইইউডিএফৰ প্ৰাৰ্থীক ভোট দিয়ক ৷
উল্লেখ্য যে কে’বা সহস্ৰাধিক সংখ্যালঘু ৰাইজ উপস্থিত থকা সভাৰ পূৰ্বে হাইদৰাবাদৰ সাংসদ গৰাকীক গামোচা, জাপি আৰু শৰাইৰে আদৰণি জনাই বদৰুদ্দিন আজমলৰ পুত্ৰ তথা বিনাকান্দী সমষ্টিৰ প্ৰাক্তন বিধায়ক আবদুৰ ৰহিম আজমলে ৷