তীব্ৰ সামৰিক সংঘাতৰ মাজতে হঠাৎ যুদ্ধবিৰতি ঘোষণা কৰিলে আমেৰিকাৰ ৰাষ্ট্ৰপতি ড’নাল্ড ট্ৰাম্পে। প্ৰায় ৪০ দিন ধৰি চলি থকা যুদ্ধৰ অন্তত দুয়ো দেশে বৰ্তমান দুসপ্তাহৰ বাবে যুদ্ধবিৰতিৰ পথত আগবাঢ়িছে।
ইৰাণে দাবী কৰিছে যে, এই যুদ্ধত জয় শেষত তেওঁলোকৰেই হৈছে। অৱশ্যে যুদ্ধবিৰতিৰ ক্ষেত্ৰত আমেৰিকাৰ আগত ১০ দফা চর্ত আগবঢ়াইছে ইৰাণে। ড’নাল্ড ট্ৰাম্পে জনাইছে যে, এই চর্তসমূহ লৈ আলোচনা চলি আছে আৰু এই আলোচনা ফলপ্ৰসূ হ’ব বুলি তেওঁ আশা প্ৰকাশ কৰিছে।
উল্লেখযোগ্য যে, ইৰাণক আগতে দিয়া সময়সীমা শেষ হোৱাৰ আগতেই ড’নাল্ড ট্ৰাম্পে(Donald Trump) ঘোষণা কৰে যে, দুয়ো দেশেই যুদ্ধবিৰতিত সন্মত হৈছে। নিজৰ সামাজিক মাধ্যমত তেওঁ কয় যে, ইৰাণে হৰমুজ প্ৰণালী মুকলি কৰিবলৈ সাজু হৈছে আৰু আমেৰিকাও দুসপ্তাহৰ বাবে আক্ৰমণ বন্ধ ৰাখিব। তেওঁ এই সিদ্ধান্তক “দুয়োপক্ষীয় যুদ্ধবিৰতি” বুলি উল্লেখ কৰে।
এই সিদ্ধান্তৰ পাছত তেওঁ ব্যাখ্যা দিয়ে যে, ইৰাণৰ ফালৰ পৰা ১০ দফা প্ৰস্তাৱ আহিছে আৰু আলোচনাৰ জৰিয়তে সেইবোৰ আগবঢ়োৱা হ’ব। তেওঁ এইটোও দাবী কৰে যে, সেই চর্তসমূহৰ অধিকাংশতেই দুয়ো পক্ষ সন্মত হোৱাৰ দিশে আগবাঢ়িছে।
বিভিন্ন সংবাদমাধ্যমৰ তথ্য অনুসৰি, পাকিস্তানৰ জৰিয়তে এই ১০ দফা প্ৰস্তাৱ আমেৰিকাৰ ওচৰলৈ প্ৰেৰণ কৰা হৈছে। ইয়াৰ ভিতৰত গুৰুত্বপূৰ্ণ কিছুমান চর্ত হ’ল—হৰমুজ প্ৰণালী মুকলি কৰা হ’ব যদিও ইয়াৰ নিয়ন্ত্ৰণ ইৰাণৰ হাততেই থাকিব; ইৰাণ আৰু তাৰ মিত্ৰ গোটসমূহৰ বিৰুদ্ধে আক্ৰমণ সম্পূৰ্ণ বন্ধ কৰিব লাগিব; উপসাগৰীয় অঞ্চলত থকা আমেৰিকাৰ সামৰিক ঘাঁটিসমূহ খালী কৰিব লাগিব।
ইয়াৰ উপৰি, যুদ্ধৰ ফলত হোৱা ক্ষতিৰ ক্ষতিপূৰণ দিয়াৰ দাবীও জনাইছে ইৰাণে। ৰাষ্ট্ৰসংঘৰ নিৰাপত্তা পৰিষদত ইৰাণৰ বিৰুদ্ধে গ্ৰহণ কৰা প্ৰস্তাৱসমূহ বাতিল কৰাৰ লগতে ভৱিষ্যতে আক্ৰমণ নকৰাৰ নিশ্চয়তা বিচাৰিছে। লগতে তেওঁলোকৰ সমৃদ্ধ ইউৰেনিয়াম কাৰ্যসূচীত হস্তক্ষেপ নকৰিবলৈ স্পষ্টকৈ কৈছে।
ইৰাণে আৰু দাবী কৰিছে যে, আন্তঃৰাষ্ট্ৰীয় পৰমাণু শক্তি সংস্থাৰ (IAEA) সিদ্ধান্তসমূহ বাতিল কৰাৰ লগতে ইৰাণৰ ওপৰত থকা নিষেধাজ্ঞাসমূহ ক্ৰমাৎ উঠাই ল’ব লাগিব।
উল্লেখযোগ্য যে, ২৮ ফেব্ৰুৱাৰীত ইজৰাইল Israel-এ হঠাৎ ইৰাণত আক্ৰমণ চলায়, পাছত এই সংঘাতত যোগ দিয়ে আমেৰিকাও। তাৰ প্ৰতিক্ৰিয়াত ইৰাণে প্ৰতিআক্রমণ আৰম্ভ কৰে আৰু তাৰ পাছৰ পৰাই ধাৰাবাহিক যুদ্ধ চলি আহিছে।
যুদ্ধ আৰম্ভ হোৱাৰ পাছতেই Strait of Hormuz বন্ধ কৰাৰ ঘোষণা কৰিছিল তেহৰানে, যাৰ ফলত বিশ্বজুৰি ইন্ধন সংকটৰ আশংকা সৃষ্টি হৈছিল। অৱশ্যে আলোচনাৰ পাছত ভাৰতসহ কেবাখনো দেশৰ পণ্যবাহী জাহাজক পাৰ হ’বলৈ অনুমতি দিয়া হৈছিল, যদিও আমেৰিকা আৰু তাৰ মিত্ৰ দেশসমূহৰ বাবে এই পথ বন্ধেই থাকিব বুলি ইৰাণে স্পষ্ট কৰিছিল।
ইয়াৰ মাজতে ড’নাল্ড ট্ৰাম্পে (Donald Trump) ৪৮ ঘণ্টাৰ সময়সীমা নিৰ্ধাৰণ কৰি আগজাননী দিছিল যে, ইৰাণে যদি হৰমুজ মুকলি নকৰে তেন্তে কঠোৰ ব্যৱস্থা গ্ৰহণ কৰা হ’ব। কিন্তু সেই সময়সীমা শেষ হোৱাৰ আগতেই তেওঁ যুদ্ধবিৰতি ঘোষণা কৰে।
বৰ্তমান দুসপ্তাহৰ বাবে এই যুদ্ধবিৰতি কাৰ্যকৰী কৰা হৈছে আৰু এই সময়ছোৱাত আলোচনাৰ জৰিয়তে স্থায়ী সমাধান বিচাৰাৰ প্ৰচেষ্টা চলিব বুলি আশা কৰা হৈছে।