এখন মৃতপ্রায় নৈক নতুন জীবন দান দি আর্জেন্টিনাৰ ছান লুইছত ১৮ হেজাৰ মিটাৰ দৈৰ্ঘ্যৰ নলা খনন সম্পন্ন হ’ল। ৰাজ্যখনৰ জলব্যৱস্থাপনা কর্তৃপক্ষৰ উদ্যোগত বহু হ্রদ, মাছকে ধৰি সমগ্র পৰিৱেশতন্ত্ৰক ৰক্ষাৰ উদ্দেশ্যে এই দীর্ঘ দূৰত্বৰ নলা খনন কৰা হয়। এই নলা সমগ্ৰ ৰাজ্যখনৰ মাজেৰে পাৰ হৈছে।
নলা খনন সম্পন্ন হোৱাৰ পাছত বিভিন্ন হ্রদ বা তেনে জল উৎস পুনৰ পানীৰে পৰিপূৰ্ণ হৈছে। এই খননৰ জৰিয়তে ৰিঅ’ ক’নলাৰা নৈৰ পথ ভেটি ধৰা পলস আৰু অলাগতিয়াল গছ-বন আঁতৰোৱা হয়। ফলত বাৰিষা নৈখন ওফন্দি উঠি ওচৰ-পাঁজৰৰ অঞ্চলো প্লাবিত কৰিব নোৱাৰা হৈছে।
ছান লুইছৰ জলব্যৱস্থাপনা কর্তৃপক্ষই এই অসাধ্য সাধন কৰে জনতাৰ সহযোগত বা ৰাজহুৱা-ব্যক্তিগত অংশীদাৰিত্বৰ জৰিয়তে। এই উদ্দেশ্যে চৰকাৰক সহায় কৰাৰ বাবে স্থানীয় খনি ব্যবসায়ীসকলে বিনামূল্যে নলা খনন কৰোৱায়।
এই নলা খননৰ সময়ত চৰকাৰী কাৰিকৰী অৰ্হতাসম্পন্ন কৰ্মচাৰীসকলে নিৰৱচ্ছিন্ন তদাৰকী আৰু নিৰীক্ষণৰ ব্যৱস্থা কৰে। তেওঁলোকে এই কাৰ্যৰ মান ৰক্ষাৰ দিশো লক্ষ্য কৰি থাকে। এনেদৰে ৰাজহুৱা-ব্যক্তিগত অংশীদাৰিত্বৰ ফলত এই অসাধ্য সাধন হোৱাত চৰকাৰৰ বিশেষ ধন ব্যয়ো নহ’ল।
অথচ এই খননৰ জৰিয়তে নৈখনৰ বহু অৱবাহিকাৰ পৰা দ্রুততৰে নৈৰ গতিপথত থকা পলস, বালিৰ দৰে আদি প্রতিবন্ধক স্তৰ আঁতৰোৱা হয়। এই খনন কার্যত জড়িতসকলে নৈৰ গতিপথত প্রতিবন্ধক হৈ থকা শিল, পলস আৰু অদৰকাৰী ঘাঁহ-বন আঁতৰ কৰে।
তদুপৰি খননকাৰীসকলে নৈৰ বুকু অধিক গভীৰ কৰাৰ লগতে পানীৰ সুঁতি পোনপটীয়া কৰে। নৈৰ বুকুৰ খননে এটা জটিল সমস্যা নিৰাময় কৰে। বিগত কিছু বছৰত বাৰিষা নৈৰ দুয়োপাৰে নতুন নতুন পলস, শিল-বালিৰ স্তৰ জমা হয়। ইয়ে পর্যায়ক্রমে নৈৰ জলপ্রবাহৰ গতি হ্রাস কৰে।
ফলত বাৰিষা দুয়োপাৰ বানত উপচি পৰে। নৈৰ গতি এনেদৰে ৰুদ্ধ হোৱাৰ ফলত ৰাজ্যখনৰ কে’বাটাও হ্রদো তৰাং হ’বলৈ ধৰে। নৈখনৰ গতিপথ পুনৰ মোকলোৱাৰ পাছত এই হ্রদসমূহো পানীৰে পৰিপূৰ্ণ হৈছে।
চৰকাৰে প্ৰকাশ কৰা অনুসৰি, লাফিনোৰ আৰু ল’জ টেজ’নেচ নগৰৰ ওচৰত খননকাৰীসকলে নৈখনৰ সুঁতি ৯,৩০০ মিটাৰ দৈর্ঘ্যৰ পৰিমাপত পদ্ধতিগত কৰি তোলে। দীর্ঘকাল ধৰি চোৱা-চিতাৰ অভাৱত নৈখনৰ বুকু অগভীৰ হৈ পৰে।
লক্ষ্যণীয়ভাবে নৈৰ গতিপথ খননৰ প্রতিটো স্থানতে নির্দিষ্ট একোটা কাৰিকৰী পৰীক্ষণৰ প্ৰয়োজন হয়। খনন আৰম্ভ কৰাৰ পূৰ্বে চৰকাৰী কাৰিকৰী বিভাগৰ লোকসকলে পলসৰ গভীৰতা, নৈৰ পানী প্রবাহৰ গাঁথনি আৰু নৈয়ে আগুৰি থকা ভূমিৰ মূল্যায়ন কৰে।
তেওঁলোকে কৰা তদাৰকীৰ জৰিয়তে এয়া নিশ্চিত কৰা হয় যে নৈখন পুনৰ প্ৰবাহিত হ’লে যাতে গৰা আৰু নামনি অঞ্চলৰ পৰিৱেশতন্ত্ৰত ব্যাঘাত নজন্মে। ৰিঅ’ ক’নলাৰা নৈক পুনৰ গতিপথ প্ৰদানৰ এই প্ৰচেষ্টা ৰূপায়ণৰ সময়ত প্রথমটো বৃহৎ প্রত্যাহ্বান আহে যোৱা চাৰি আৰু পাঁচ মাৰ্চত।
কাৰণ উক্ত দুদিনত সংশ্লিষ্ট অঞ্চলত ধাৰাসাৰ বৰষুণ হৈছিল। অৱশ্যে ইয়াক লৈ সংশ্লিষ্টসকল হতাশ নহ’ল। নৈখনৰ সুঁতি পুনৰ খননৰ জৰিয়তে তেওঁলোকে বান প্ৰতিৰোধ কৰিবলৈ সক্ষম হৈছিল। উল্লেখ্য যে এই ৰাজ্যত মার্চতে পূর্বে ভয়ংকৰ বানে দেখা দিছিল। নৈখনৰ সুঁতি পুনৰ মোকলোৱাৰ পাছত এনে বানৰ সমস্যাও দূৰ হৈছে।
লক্ষ্যণীয় যে শেহতীয়াভাবে বিশ্বৰ বহু দেশৰ চৰকাৰে নৈৰ বুকু খননৰ জৰিয়তে বান-খহনীয়া আদি সমস্যা নিৰাময়ৰ কথা কৈ আহিছে। অৱশ্যে এই ক্ষেত্ৰত কেৱল আর্জেন্টিনাৰ এই প্ৰদেশখনেহে সফলতা অর্জন কৰিছে।