Chhattisgarh::✒️চত্তীশগড়ৰ এটা শক্তিকেন্দ্রত অঘটন৷ মঙলবাৰে বিয়লি ছত্তীশগড়ৰ শক্তি জিলাৰ বেদান্ত গ্রুপৰ বিদ্যুৎ কেন্দ্ৰত বয়লাৰ বিস্ফোৰণ সংঘটিত হয়। দুৰ্ঘটনাত থিতাতে মৃত্যু হয় ৪ শ্ৰমিকৰ। আন আহত ১৮ জনক ৰায়গড়ৰ জিন্দাল ফৰ্টিছ হাস্পতাললৈ লৈ যোৱা হয়, য’ত ৮ জন শ্ৰমিকৰ মৃত্যু হয়। বাকী ১০ জনৰ অৱস্থা সংকটজনক। শ্ৰমিক সকলৰ অধিকাংশই অগ্নিদগ্ধ ৷
এই ঘটনা সংঘটিত হৈছে ডভৰা আৰক্ষী থানা এলেকাত। এই দুৰ্ঘটনাত ৩০ৰ পৰা ৪০জন শ্ৰমিক গুৰুতৰভাৱে অগ্নিদগ্ধ হয়। তিনিজন আহতক ৰায়গড়ৰ মেট্ৰ’ হাস্পতালত চিকিৎসাধীন হৈ আছে। দুই শ্ৰমিকক এপেক্স হাস্পতালত ভৰ্তি কৰা হৈছে। গুৰুতৰভাৱে আহত ৬ জনক বিলাসপুৰলৈ প্ৰেৰণ কৰা হৈছে।
দুৰ্ঘটনাৰ পিছতে শ্ৰমিকসকলৰ পৰিয়ালৰ লোকে উদ্যোগটোৰ বাহিৰত এক হুলস্থুলীয়া পৰিস্থিতিৰ সৃষ্টি কৰে। এই ঘটনাৰ বাবে কৰ্তৃপক্ষক দায়ী ক্ষতিপূৰণৰ দাবী জনায়। কিছু শ্ৰমিক সন্ধানহীন। পৰিয়ালৰ লোকে কয় যে বেদান্ত গ্ৰুপৰ কৰ্তৃপক্ষই কোনো তথ্য প্ৰদান কৰা নাই। আনহাতে ঘটনা সন্দৰ্ভত দণ্ডাধীশৰ তদন্তৰ নিৰ্দেশ দিছে জিলা আয়ুক্ত অমৃত বিকাশ টপনোৱে।
ইপিনে শোকাৱহ ঘটনাৰ ক্ষতিপূৰণৰ কথা ঘোষণা কৰিছে প্ৰধানমন্ত্ৰী কাৰ্যালয়ে। পিএমএনআৰএফে মৃতকৰ পৰিয়ালক ২ লাখআৰু আহতক ৫০ হাজাৰ প্ৰদান কৰিব। মুখ্যমন্ত্রী বিষ্ণুদেৱ ছাইয়ে এই ঘটনাক লৈ শোক প্রকাশ কৰি দায়ীসকলৰ বিৰুদ্ধে কঠোৰ ব্যৱস্থা গ্রহণ কৰা হ’ব বুলি উল্লেখ কৰে৷ লগতে ৰাজ্য চৰকাৰৰ তৰফৰ পৰা মৃতকৰ পৰিয়াললৈ ৫ লাখ আৰু আহতক ৫০ হাজাৰ দিয়াৰ কথাও ঘোষণা কৰে।