তামিলনাড়ুৰ ভালপাৰাই–পোল্লাচি পাহাৰীয়া পথত শুকুৰবাৰে সংঘটিত এক ভয়ংকৰ দুৰ্ঘটনাত পৰ্যটকভৰ্তি এখন ভেন খাদত পৰি কমেও ন জন লোকৰ মৃত্যু হয়। ঘটনাটোত চালকসহ চাৰি জন গুৰুতৰভাৱে আহত হয়।
আৰক্ষীৰ তথ্য অনুসৰি, ভ্ৰমণ সমাপ্ত কৰি উভতি অহা সময়তে ভেনখন হঠাৎ নিয়ন্ত্ৰণ হেৰুৱাই খাদত পৰে। ভেনখনত চালকসহ মুঠ ১৩ জন যাত্ৰী আছিল, যিসকল কেৰালাৰ মানিপ্পুৰম অঞ্চলৰ বাসিন্দা ।
ঘটনাস্থলীতেই আঠ জনৰ মৃত্যু হয়, যাৰ ভিতৰত সাত গৰাকী মহিলা আৰু এজন পুৰুষ আছিল। পাছত আহতসকলক চিকিৎসালয়লৈ নিয়াৰ পাছত আন এজন যাত্ৰীৰ মৃত্যু হয়, ফলত মৃতৰ সংখ্যা ন লৈ বৃদ্ধি পায়। আহতসকলক নিকটৱৰ্তী চিকিৎসালয়ত ভৰ্তি কৰা হৈছে।
হপ্ৰাথমিক অনুসন্ধানত দুৰ্ঘটনাৰ সঠিক কাৰণ স্পষ্ট হোৱা নাই। যান্ত্ৰিক ত্ৰুটি নে চালকৰ অসাৱধানতা—উভয় দিশত তদন্ত চলি আছে। দুৰ্ঘটনাত ভেনখন সম্পূৰ্ণৰূপে ক্ষতিগ্ৰস্ত হয়।
এই ঘটনাত শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে। তেওঁ নিহতসকলৰ পৰিয়াললৈ গভীৰ সমবেদনা জ্ঞাপন কৰাৰ লগতে আহতসকলৰ দ্ৰুত আৰোগ্য কামনা কৰে।
প্ৰশাসনে জনাইছে যে মৃতসকলৰ অধিকাংশই কেরালাৰ মালাপ্পুৰম জিলাৰ শিক্ষক আছিল আৰু ছুটি কটাবলৈ তামিলনাড়ুত আহিছিল। ঘটনাই সমগ্ৰ অঞ্চলত শোকৰ পৰিৱেশ সৃষ্টি কৰিছে।