ক্ৰমাৎ স্বাভাৱিক হ’বলৈ ধৰিছে চিৰাং জিলাৰ ৰুণীখাটাৰ পৰিস্থিতি।তৎসত্ত্বেও সমগ্র জিলাখনত শুকুৰবাৰৰ ঘটনাক লৈ প্রতিক্রিয়া অব্যাহত আছে। ইয়াৰ সমান্তৰালভাবে সদৌ অসম আদিবাসী ছাত্র সন্থা (আছা) য়ো ঘটনাটোক লৈ সৰৱ হৈ আছে।
এনে অৱস্থাতে একাংশই অভিযোগ উত্থাপন কৰিছে যে এই ঘটনাৰ অন্তৰালত ৰাজনৈতিক প্রতিহিংসা পূৰণৰ উদ্দেশ্য জড়িত আছে। আনহাতে, শুকুৰবাৰে বন বিভাগৰ বেদখল উচ্ছেদ অভিযানৰ সময়ত সংঘটিত হিংসাত্মক ঘটনা সংক্রান্তত আৰক্ষীয়ে নিশা ১৫ জন লোকক গ্রেপ্তাৰ কৰে।
অৱশ্যে এই লোককেইজনক জধে-মধে গ্রেপ্তাৰ কৰাৰ অভিযোগ উত্থাপন হৈছে। ধৃত লোককেইজনৰ একাংশৰ পৰিয়ালৰ লোকৰ দাবী অনুসৰি তেওঁলোকক কৰ্মৰত অৱস্থাৰ পৰা আৰক্ষীয়ে গ্রেপ্তাৰ কৰে।
ইয়াৰে দুজনে বাসুগাঁৱৰ পাৰ্লাৰত কাম কৰি থকা অৱস্থাত আৰক্ষীয়ে গ্রেপ্তাৰ কৰি আনে। পাৰ্লাৰৰ চিচি কেমেৰা পৰীক্ষা কৰিলেই সকলো স্পষ্ট হ’ব বুলিও লোক দুজনৰ পৰিয়ালৰ লোকে দাবী উত্থাপন কৰিছে। একেদৰে ধৃত আন কে’বাজনো পৰিয়ালৰ লোকেও দাবী কৰে যে আৰক্ষীয়ে গ্রেপ্তাৰ কৰা লোককেইজন নিৰীহ লোক।
ৰুণীখাটাত শুকুৰবাৰে কি ঘটনা সংঘটিত হ’ল সেই বিষয়েও তেওঁলোক অৱগত নহয় বুলি পৰিয়ালৰ লোকে দাবী কৰিছে। এনে অৱস্থাতে আজি আৰক্ষীয়ে আটাইকেইজনক আদালতত হাজিৰ কৰায়। আদালতে তেওঁলোকক ন্যায়িক জিম্মালৈ প্ৰেৰণ কৰে।
ইপিনে, স্থানীয় একাংশ লোকে অভিযোগ কৰা অনুসৰি এই ঘটনাৰ আঁৰত ৰাজনৈতিক প্রতিহিংসা জড়িত আছে। এইবাৰ বিধানসভা নির্বাচনত আদিবাসী ৰাইজে বিপিএফৰ বিৰুদ্ধে ভোটদান কৰাৰ তথ্য লাভ কৰি এনডিএ চৰকাৰৰ অধীনত থকা প্রশাসনে হাৰাশাস্তি কৰিছে নেকি বুলিও একাংশই প্রশ্ন উত্থাপন কৰিছে।
আৰক্ষীয়ে লক্ষ্য কৰি লোৱা একাংশ ইউপিপিএলৰ স’তে জড়িত বুলিও স্থানীয় একাংশ লোকে মন্তব্য কৰিছে।
ইপিনে, শুকুৰবাৰে এই হিংসাত্মক ঘটনাৰ সন্দর্ভত অধিক লোকক গ্ৰেপ্তাৰ কৰাৰ সম্ভাৱনা ব্যক্ত কৰিছে চিৰাঙৰ জ্যেষ্ঠ অধীক্ষক মোহনলাল মীনাই। ইয়াৰে কেইজনমানক চিনাক্ত কৰা হৈছে বুলিও মীনাই সদৰী কৰে। আনহাতে, যোৱা নিশা গ্ৰেপ্তাৰ কৰা ১৫ জনক আৰক্ষীয়ে জিলাখনৰ বিজনী, বাসুগাঁও, ছিদলী আৰু কাজলগাঁও থানাত ৰাখে।
কালি স্বাস্থ্য পৰীক্ষাৰ পাছত আবেলি চাৰি বজাত তেওঁলোকক এখন বাছত উঠাই কটকটীয়া নিৰাপত্তাৰ মাজেৰে আদালতলৈ আৰক্ষীয়ে লৈ যায়। আনহাতে যোৱা বৃহস্পতিবাৰে নিশা বন বিভাগৰ আক্ৰমণত আহত মহিলা আজিও কাজলগাঁওস্থিত জেএছবি অসামৰিক চিকিৎসালয়ত চিকিৎসাধীন হৈ আছে।
এই আহত মহিলাক চিকিৎসাৰ বাবে আৰক্ষীয়ে ভৰ্তি কৰায়। অৱশ্যে বন বিভাগে এনে ধৰণৰ ঘটনা সংঘটিত হোৱা নাই বুলি দাবী কৰিছে। তৎসত্ত্বেও প্রতিবাদকাৰীসকলে বাৰম্বাৰ দাবী কৰিছে যে প্ৰতিবাদৰ মূল কাৰণ আছিল আদিবাসী মহিলাক আক্রমণ আৰু শ্লীলতা হানি।
আনহাতে, কালি ৰুণীখাটা বনাঞ্চলিক বিষয়াৰ কাৰ্যালয়ত উপস্থিত হৈ পৰিস্থিতিৰ বুজ লয় বিটিচি মুৰব্বী হাগ্রামা মহিলাৰীয়ে। পাছত তেওঁ কালিৰ হিংসাত্মক ঘটনাৰ ঘটনাক গৰিহণা দিয়ে। সংবাদ মাধ্যমৰ আগত মহিলাৰীয়ে কয়, ‘এই ঘটনা দুই-এজন অপৰাধীয়ে কৰিছে। ইয়াৰ বাবে আদিবাসীসকলক দোষাৰোপ কৰি লাভ নাই। দোষীয়ে শাস্তি পাব। ঘটনা সংক্রান্তত আমি বন বিভাগৰ পৰা প্ৰতিবেদন লৈ অসম চৰকাৰক জনাম। গৃহ বিভাগ আমাৰ হাতত নাই। সেয়া ৰাজ্য চৰকাৰে চাব।’
বন বিভাগৰ বিৰুদ্ধে মহিলাক অশালীন আচৰণ কৰাৰ অভিযোগ আছে আৰু তেনে অৱস্থাত বন বিভাগ বা আৰক্ষীৰ তদন্ত কিমান নিৰপেক্ষ হ’ব বুলি সাংবাদিকে সোধা প্ৰশ্নৰ উত্তৰত বিটিচি মুৰব্বীজনে কয়, ‘আইনৰ ওস্তাদ হ’ব নালাগে। বন বিভাগৰ দায়িত্ব দিছে আমাক। আমি বন বিভাগৰ পৰা প্রতিবেদন ল’ব লাগিব। বাকী ৰাজ্য চৰকাৰে চাব। মই যিহেতু আইনৰ মাষ্টৰ নহয়। চৰকাৰী বস্তু নষ্ট কৰিছে। চৰকাৰে ইয়াৰ বিচাৰ কৰিব।’
কোন দোষী আৰু কোন নির্দোষী সেয়া তদন্তত সকলো ওলাই পৰিব বুলিও তেওঁ মন্তব্য কৰে। এই সম্পৰ্কত তেওঁ আৰু কয়, ‘আপুনি-মই এই বিষয়ে চিন্তা কৰি লাভ নাই। আইনৰ কাম আইনে কৰিব।’
এই ঘটনাৰ স’তে ৰাজনীতিও জড়িত থাকিব পাৰে বুলি তেওঁ ইংগিত দিয়ে। এই সম্পর্কত তেওঁ কয়, ‘আজিৰ দিনত এইটো নতুন কথা নহয়। এনে ধৰণৰ ঘটনাৰ লগত ৰাজনৈতিক কাৰণ থাকেই। বনাঞ্চল ৰক্ষাৰ বাবেহে বন বিভাগে কাম কৰে। আমি ইয়াত সহযোগিতা কৰিব লাগে।’
ইপিনে, চিৰাঙৰ বন সংমণ্ডল বিষয়া কুঞ্জন বসুমতাৰীয়ে কয় যে কালিৰ হিংসাত্মক ঘটনাৰ ফলত বন কাৰ্যালয়ৰ যি ক্ষতি হ’ল সেয়া সামান্য; কিন্তু চিৰাঙৰ সংৰক্ষিত বনাঞ্চলৰ যি ক্ষতি বেদখলকাৰীসকলে কৰিছে সেয়া অপূৰণীয়। নিতৌ ন ন অঞ্চলত বনাঞ্চল ধ্বংস হৈ আছে বুলিও তেওঁ অভিযোগ উত্থাপন কৰে।
আনহাতে, আছাৰ চিৰাং জিলা সমিতিৰ সাধাৰণ সম্পাদক ৰাইচেন টুডুক আটক কৰাৰ কাৰ্যক সংগঠনটোরে তীব্র ভাষাৰে গৰিহণা দি শীঘ্রে নেতাজনক মুক্তি দিবলৈ দাবী উত্থাপন কৰিছে। এই দাবী উত্থাপন কৰি আছাৰ সভাপতি গডউইন হেমৰম আৰু সাধাৰণ সম্পাদক অমৰজ্যোতি ছুৰিনে এক বিবৃতিত কয়, ‘আমাৰ চিৰাং জিলাৰ সমিতিয়ে কেন্দ্রীয় সমিতিক অৱগত কৰা অনুসৰি যোৱা ১৬ এপ্রিলত বন বিভাগে আটক কৰা আদিবাসী লোকসকলক মুকলি কৰি অনাৰ স্বাৰ্থত ৰাইচেন টুডুৰ নেতৃত্বত জিলা সমিতিৰ বিষয়ববীয়াসকল বন বিভাগৰ লগত আলোচনাত মিলিত হয়। সন্ধিয়ালৈ তেওঁলোকে আটকাধীন ব্যক্তিসকলক মোকলাই আনে। টুডুৰ আটকক কোনোপধ্যে মানি লোৱা নহ’ব।’
লগতে আছাই শুকুৰবাৰে আদিবাসী মহিলাসকলৰ শ্লীলতা হানিৰ অভিযোগৰ এক ন্যায়িক তদন্তও দাবী উত্থাপন কৰিছে। ঘটনাটোক নিন্দা কৰি আছা নেতৃত্বই লগতে কয়, ‘আমি প্রকৃত দোষীক কৰায়ত্ত কৰি উচিত শাস্তি বিহাৰ দাবী জনাইছো। ইয়াৰ বাবে প্রয়োজনীয় সকলো সহযোগিতা আছাই প্রশাসনক আগবঢ়াব। ‘
উল্লেখ্য যে অভিযোগ অনুসৰি শুকুৰবাৰে পুৱাৰ পৰা প্ৰতিবাদী জনতাই কণীখাটাত বন বিভাগৰ ছখন বাহন আৰু ছটা বন্দুক জ্বলাই দিয়ে। সম্প্রতি অঞ্চলটোত বাহৰ পাতি পৰিস্থিতি তদাৰক কৰি আছে বিটিচিৰ আৰক্ষী মহাপৰিদৰ্শক বিবেকৰাজ সিঙে। অঞ্চলটোত নিয়মিতভাৱে আৰক্ষী, ৰেপিড একচন ফ’ৰ্চ আৰু চিআৰপিয়ে টহল দি আছে। এনে পৰিস্থিতিত এক চেপা উত্তেজনাও বিৰাজ কৰি আছে।