Nepal Home Minister Sudhan Gurung resigns:
দৈনিক অগ্ৰদূত ডিজিটেল ডেক্স:-চুবুৰীয়া ৰাষ্ট্ৰ নেপালত অঘটন ৷ মন্ত্ৰিত্ব লাভৰ ২৬ দিনতে দুর্নীতিৰ অভিযোগ উদ্থাপিত হোৱাৰ বাবেই পদত্যাগ কৰিলে হিমালয়ান ৰাষ্ট্ৰ খনৰ গৃহমন্ত্রী ছুডান গুৰুঙে ৷ ছুডান গুৰুঙৰ বিৰুদ্ধে বিতৰ্কিত ব্যৱসায়ী দীপক ভট্টৰ সৈতে ব্যৱসায়িক অংশীদাৰিত্ব আৰু ক্ষুদ্ৰ বীমা কোম্পানীত প্ৰশ্নবোধক বিনিয়োগৰ অভিযোগ উত্থাপিত হৈছিল।
উল্লেখ্য যে গৃহমন্ত্ৰীৰ দায়িত্ব লাভ কৰাৰ পিছৰে পৰা দুৰ্নীতিৰ বিৰুদ্ধে আগ্ৰাসী স্থিতি গ্ৰহণ কৰা গুৰুঙে নিজৰ ব্যক্তিগত বিনিয়োগক লৈ ব্যাপক সমালোচনাৰ সন্মুখীন হৈছিল। ব্যাপক প্ৰতিবাদৰ পিছত তেওঁ পদত্যাগ কৰিবলৈ বাধ্য হয় ।
স্মতৰ্ৱ্য যে গৃহমন্ত্ৰী ছুডান গুৰুঙৰ বিৰুদ্ধে অসমতাপূৰ্ণ সম্পত্তি ৰখা আৰু প্ৰশ্নবোধক বিত্তীয় লেনদেনত লিপ্ত হোৱাৰ অভিযোগ উত্থাপন হৈছে। বিতৰ্কিত ব্যৱসায়ৰ সৈতে জড়িত ব্যক্তিৰ সৈতে গুৰুঙৰ সংস্পৰ্শলৈ অহা বুলি বিৰোধী আৰু প্ৰতিবাদকাৰীৰ দাবী। নেপালী সংবাদ মাধ্যমেও এনে নথি-পত্ৰৰ উদ্ধৃতি দি তেওঁৰ পদত্যাগৰ আহ্বানত ইন্ধন যোগাইছিত। ৰাজনৈতিক দল আৰু সামাজিক সংগঠনসমূহেও এই বিষয়টোক লৈ সঘনাই প্ৰতিবাদ সাব্যস্ত কৰি আহিছিল বিগত এটা পষেকত।
আনহাতে পদত্যাগ ঘোষণা কৰি গুৰুঙে ফেচবুক পোষ্টত লিখিছে, “মই ছুডান গুৰুঙে চলিতবৰ্ষৰ ২৬ মাৰ্চৰ পৰাই গৃহমন্ত্ৰী হিচাপে নিজৰ কৰ্তব্য অতি আন্তৰিকতাৰে পালন কৰি আহিছো। শেহতীয়াকৈ মোৰ স্থিতি আৰু আনুষংগিক বিষয় সন্দৰ্ভত নাগৰিকে উত্থাপন কৰা প্ৰশ্ন, মন্তব্য, জনসাধাৰণৰ উদ্বেগক মই অতি গুৰুত্বসহকাৰে লৈছো।”
কোনো ক্ষমতা জনসাধাৰণৰ আস্থাতকৈ ডাঙৰ নহয়.কাৰ্যভাৰ গ্ৰহণ কৰাৰ আগতে জনসাধাৰণৰ আস্থা সৰ্বোচ্চ হ’ব লাগিব। তেওঁ কয়, “মোৰ বাবে যিকোনো পদতকৈ নৈতিকতা অধিক গুৰুত্বপূৰ্ণ, আৰু জনসাধাৰণৰ আস্থাতকৈ ডাঙৰ কোনো ক্ষমতা নাই। সুশাসন, স্বচ্ছতা আৰু জবাবদিহিতাৰ দাবী কৰা আজিৰ ‘জেনেৰেচন জেড’ আন্দোলনেও একেটা বাৰ্তা প্ৰেৰণ কৰিছে: জনজীৱন পৰিষ্কাৰ হ’ব লাগিব আৰু নেতৃত্ব জবাবদিহি হ’ব লাগিব।”
গুৰুঙে বহল ৰাজনৈতিক প্ৰেক্ষাপট আৰু দেশে বিগত সময়ত কৰা ত্যাগৰ কথাও উল্লেখ কৰি কয় যে প্ৰশ্ন উত্থাপন হ’লে জবাবদিহিতা প্ৰয়োজনীয়। গুৰুঙে কয় যে যেতিয়া মোৰ ৪৬ জন ভাই-ভনীৰ তেজ আৰু বলিদানৰ ওপৰত নিৰ্মিত চৰকাৰৰ বিৰুদ্ধে প্ৰশ্ন উত্থাপন হয়, তেতিয়া একমাত্ৰ উত্তৰ হ’ল নৈতিকতা।
মনকৰিবলগীয়া যে বলেন্দ্ৰ শ্বাহৰ নেতৃত্বত চলি থকা চৰকাৰখনত দ্বিতীয়টো মন্ত্ৰী পদৰ পদত্যাগৰ ঘটনা । ইয়াৰ পূৰ্বে ৯ এপ্ৰিলত প্ৰধানমন্ত্ৰী শ্বাহে শ্ৰম, নিয়োগ, আৰু সামাজিক সুৰক্ষা মন্ত্ৰী দীপক কুমাৰ শ্বাহক পদৰ পৰা অপসাৰণ কৰে। ৰাষ্ট্ৰীয় স্বতন্ত্ৰ পাৰ্টিয়ে তেওঁক “দলৰ আচৰণ বিধি আৰু অনুশাসন উলংঘা” কৰাৰ বাবে মন্ত্ৰীত্বৰ পৰা বৰ্খাস্ত কৰাৰ পৰামৰ্শ দিয়াৰ পিছত এই সিদ্ধান্ত লোৱা হৈছিল। দলৰ সভাপতি ৰবি লামিচানেৰ আনুষ্ঠানিক পত্ৰৰ পিছতে প্ৰধানমন্ত্ৰী শ্বাহে অপসাৰণ কৰে দীপক কুমাৰ শ্বাহক।