Subansiri Lower Hydroelectric Project:✒️দেশদেশৰ বিদ্যুৎ তথা শক্তি খণ্ডৰ বিকাশৰ নামত অসমক কেন্দ্ৰীয় চৰকাৰে শিখণ্ডীৰ দৰে ব্যৱহাৰ কৰিছে। সেইবাবে অসমৰ মূৰৰ ওপৰত অৰুণাচলৰ ভূমিত এটাৰ পাছত আনটো বৃহৎ নদীবান্ধৰ জলবোমা নির্মাণৰবাবে তৎপৰ হৈ উঠিছে।
ইয়াৰ বিনিময়ত অসমক কিন্তু এক ইউনিট বিদ্যুতো ভাৰত চৰকাৰৰ শক্তি মন্ত্রণালয়ে বিনামূলীয়াকৈ দিয়াৰ কথা বিবেচনা কৰা নাই। বৰঞ্চ অসমে অধিক দামতহে প্রতি ইউনিট বিদ্যুৎ ক্রয় কৰিবলৈ বাধ্য হোৱাৰ কৌশলী নীতিহে মন্ত্রণালয়ে গ্রহণ কৰিছে।
ইয়াকে লৈ অসমবাসী যাতে ক্ষুব্ধ হৈ নুঠে, তাৰ বাবে আভুৱা ভাঁৰা কৌশল নিৰূপণ কৰিছে বান্ধ নির্মাণৰ দায়িত্বত থকা কেন্দ্ৰৰ ৰাজহুৱা খণ্ডৰ প্রতিষ্ঠান এনএইছপিচিয়ে। অসমৰ বান সমস্যা নিয়ন্ত্রণ কৰাই অৰুণাচলত নিৰ্মাণ কৰি থকা প্ৰতিটো বৃহৎ বৃহৎ জলবিদ্যুৎ প্রকল্পৰ মূল লক্ষ্য বুলি এনএইছপিচিয়ে এক আৱেগিক বাকধাৰা প্ৰচাৰৰ চেষ্টা কৰি আহিছে।
একে কৌশল গ্রহণ কৰা হৈছে শেহতীয়াকৈ কেন্দ্রীয় কেবিনেটে অনুমোদন দিয়া কামালা জলবিদ্যুৎ প্রকল্প আৰু কালাই-দ্বিতীয় জলবিদ্যুৎ প্রকল্পৰ ক্ষেত্ৰতো। ইয়াৰ ভিতৰত সৰ্বাধিক স্পৰ্শকাতৰ হৈছে কামালা বৃহৎ জলবিদ্যুৎ প্রকল্পটো। কাৰণ এই প্রকল্পটো নামনি সোৱণশিৰি জিলাৰ সোৱণশিৰি নদীক কেন্দ্ৰ কৰিয়েই নিৰ্মাণ কৰা হ’ব।
অসমৰ গেৰুকামুখৰ নামনি সোৱণশিৰিত নির্মীয়মাণ তথা আংশিকভাবে কার্যক্ষম হৈ উঠা বহু বিতর্কিত দুহেজাৰ মেগাৱাট শক্তিসম্পন্ন বৃহৎ জলবিদ্যুৎ প্রকল্পটোক লৈ ৰাজ্যখনত যি বৃহৎ প্রতিবাদ গঢ়ি উঠিছিল, সেই প্রতিবাদে এনএইছপিচিক বৃহৎ লোকচানৰ গৰাহলৈ ঠেলি দিয়ে।
সেই একেখন নদীৰে উপনৈ কামালাত এইবাৰ নিৰ্মাণ কৰা হ’ব ১,৭২০ মেগাৱাট শক্তিসম্পন্ন একে নামৰ জলবিদ্যুৎ প্রকল্পটো। ইয়াৰ বাবে প্ৰস্তাৱিত ব্যয়ৰ পৰিমাণ হ’ল ২৬,০৬৯.৫ কোটি টকা। আনহাতে, লোহিত নদীত নিৰ্মাণ কৰা হ’ব ১২ শ মেগাবাট শক্তিসম্পন্ন কালাই দ্বিতীয় প্রকল্প।
এইটো প্রকল্পৰ বাবে ব্যয় ধার্য কৰা হৈছে ১৪,১০৫.৮৩ কোটি টকা। এনেদৰে একেলগে অনুমোদন দিয়া দুয়োটা প্রকল্পৰ বাবে মুঠ ব্যয় ধার্য কৰা হৈছে ৪০ হেজাৰ কোটিৰো অধিক টকা। গতিকে ইমান বৃহৎ বিনিয়োগ যাতে সুকলমে সম্পন্ন হয় তাৰ বাবে সম্পূর্ণ সতর্কতা অৱলম্বন কৰিছে কেন্দ্ৰীয় চৰকাৰ আৰু এনএইছপিচিয়ে।
তাৰ কাৰণে বান্ধাৰা সৃষ্টিৰ বিষয় এইবাৰো অসমৰ বান নিয়ন্ত্ৰণৰ বুলি বাছি লোৱা হৈছে। বান হ’ল অসমৰ জ্বলন্ত এক সমস্যা। এই সমস্যাৰ লগত মানুহৰ জীৱন মৰণ জড়িত হৈ আছে। তেনে ক্ষেত্রত বান সমস্যা নিয়ন্ত্ৰণৰ বিষয়টোক আৱেগিক বিষয়ৰূপে লৈ সোৱণশিৰিৰ উপ-নৈখনত কামালা বৃহৎ জলবিদ্যুৎ প্রকল্প নিৰ্মাণৰ কাম হাতত লোৱা হৈছে।
শক্তি বিভাগৰ উচ্চ স্তৰীয় সূত্রই সদৰী কৰা অনুসৰি, চাৰে সাত বছৰত প্ৰকল্পটোৰ নিৰ্মাণ কাৰ্য সম্পূৰ্ণ কৰাৰ লক্ষ্য লোৱা হৈছে। যিহেতু অসমত গঢ়ি উঠা প্ৰৱল প্রতিবাদৰ বাবে গেৰুকামুখৰ নদীবান্ধটোৰ প্ৰস্তাৱিত নির্মাণ ব্যয় কে’বাগুণ বৃদ্ধি হোৱাত লোকচানৰ মাত্রা অভাৱনীয় পৰিমাণত বৃদ্ধি হয়, সেয়েহে কামালাৰ ক্ষেত্ৰত তেনে পৰিস্থিতিৰ উদ্ভৱ নহ’বলৈ সকলো ধৰণৰ ব্যৱস্থা গ্রহণ কৰিবলৈ এনএইছপিচি সাজু আছে বুলি সূত্রটোৱে সদৰী কৰে আৰু এই কথা এতিয়া বিভাগতে চৰ্চাৰ বিষয় হৈ পৰিছে।
আনহাতে, নতুন দুয়োটা প্রকল্পক লৈ অৰুণাচলতো বিৰোধৰ সৃষ্টি হৈছে। কাৰণ প্রকল্প ৰূপায়ণৰ বাবদ বহু লোকক স্থানান্তৰ কৰাটো নিশ্চিত হৈছে। তদুপৰি বৃহৎ পৰিমাণৰ বনভূমিও ধ্বংস কৰা হ’ব। ইয়াকে কেন্দ্ৰ কৰি ৰাইজৰ মাজত তীব্র প্রতিক্ৰিয়াৰ সৃষ্টি হৈছে।