গ্ৰীষ্মৰ আৰম্ভণিতেই প্ৰকৃতিৰ ৰোষত কঁপিছে কেৰালা। নিয়ন্ত্ৰণহীন গৰমে ৰাজ্যবাসীৰ দৈনন্দিন জীৱনক ব্যাপকভাৱে প্ৰভাৱিত কৰিছে। তীব্ৰ তাপপ্ৰবাহ আৰু অস্বস্তিকৰ আর্দ্ৰতাৰ ফলত জনজীৱন দুৰ্বিষহ হৈ পৰিছে।
এই পৰিস্থিতিৰ প্ৰতি লক্ষ্য ৰাখি ক’ভিড সময়ৰ দৰে জনসাধাৰণক ‘সেল্ফ লকডাউন’ৰ দৰে সাৱধানতা অৱলম্বনৰ আহ্বান জনাইছে মুখ্যমন্ত্ৰী পিনাৰাই বিজয়নে।
মুখ্যমন্ত্ৰীয়ে জনাইছে যে পুৱা ১১ বজাৰ পৰা দুপৰীয়া তিনি বজালৈ অতি প্ৰয়োজনীয় কামৰ বাহিৰে ঘৰৰ পৰা বাহিৰলৈ ওলাব নালাগে। এই সময়ছোৱাত সূৰ্যৰ তীব্ৰ তাপৰ বাবে হিটষ্ট্ৰোকসহ গুৰুতৰ স্বাস্থ্যজনিত বিপদৰ সম্ভাৱনা বৃদ্ধি পায়।
বতৰ বিজ্ঞান বিভাগৰ তথ্য অনুসৰি পালাক্কাড, কোল্লাম আৰু ত্ৰিশূৰসহ কেবাখনো জিলাত ইতিমধ্যে তাপমাত্রা ৪০ ডিগ্ৰী চেলছিয়াছ অতিক্ৰম কৰিছে। তাপৰ লগতে উচ্চ আর্দ্ৰতাৰ বাবে সমগ্ৰ ৰাজ্যতে পৰিস্থিতি অধিক জটিল হৈ পৰিছে। আনুষ্ঠানিক সতর্কতা নথকা অঞ্চলসমূহতো তীব্ৰ গৰম অনুভূত হৈছে।
এই পৰিস্থিতিৰ প্ৰতি লক্ষ্য ৰাখি ৰাজ্য চৰকাৰে বিশেষ নিৰ্দেশনা জাৰি কৰিছে। বাহিৰৰ জনসমাগম, খেল, পেৰেড, আতচবাজি আদি সকলো অনুষ্ঠান নিষিদ্ধ কৰা হৈছে। লগতে অগ্নিকাণ্ডৰ আশংকা বৃদ্ধি পোৱাৰ সম্ভাৱনাৰ বাবে বিশেষ সতৰ্কতা অৱলম্বনৰ নিৰ্দেশ দিয়া হৈছে।
দিনমজুৰ শ্ৰেণীৰ লোকসকলৰ কামৰ সময়সূচীতো প্ৰয়োজন অনুসৰি পৰিৱৰ্তনৰ পৰামৰ্শ দিয়া হৈছে। লগতে চিকিৎসালয়, প্ৰাথমিক স্বাস্থ্যকেন্দ্ৰ আৰু এম্বুলেন্স সেৱাসমূহক সদা সতর্ক অৱস্থাত থাকিবলৈ নিৰ্দেশ দিয়া হৈছে।
মুখ্যমন্ত্ৰীয়ে নাগৰিকসকলক আহ্বান জনাইছে যে হিটষ্ট্ৰোকৰ লক্ষণ দেখা দিলে তৎক্ষণাত চিকিৎসকৰ সহায় ল’ব লাগে। অসুস্থ ব্যক্তিক ছাঁ পৰা ঠাইলৈ লৈ গৈ শৰীৰ ঠাণ্ডা কৰাৰ ব্যৱস্থা কৰিব লাগে।
ইয়াৰ উপৰিও তেওঁ জনসাধাৰণক পোহনীয়া আৰু পথভ্ৰষ্ট জন্তুসমূহৰ বাবে বাহিৰত পানীৰ ব্যৱস্থা আৰু ছাঁযুক্ত স্থান সৃষ্টিৰো আহ্বান জনাইছে, যাতে এই তীব্ৰ গৰমৰ পৰা জীৱ-জন্তুসমূহো সুৰক্ষিত থাকিব পাৰে।