Ishank sets world record for swimming in the sea:
দৈনিক অগ্ৰদূত ডিজিটেল ডেক্স:লক্ষণীয় কৃতিত্ব অৰ্জন ঝাৰখণ্ডৰ সাত বছৰীয়া এটি শিশুৰ ৷ সাঁতোৰি বিশ্ব অভিলেখ গঢ়িলে কণমানিটিয়ে । ২৯ কিলোমিটাৰ সাঁতুৰি সমুদ্ৰ পথ অতিক্ৰম কৰি শ্ৰীলংকাৰ পৰা ভাৰতত উপস্থিত হোৱা সাঁতোৰবিদ জনৰ নাম ইছাংক ৷ শ্ৰীলংকাৰ তালাইমন্নাৰৰ পৰা ভাৰতৰ ধনুষকোডীলৈ সাঁতোৰোতে ইছাংকে সময় লৈছিল প্ৰায় ৯ ঘণ্টা ৫০ মিনিট ৷ যাৰবাবে তেওঁ ইউনিভাৰ্চেল ৰেকৰ্ডছ ফ’ৰামৰ পৰা “দ্য ইংগেষ্ট এণ্ড ফাষ্টেষ্ট পালক ষ্ট্ৰেইট ছুইমাৰ”ৰ বিশ্ব অভিলেখৰ প্ৰমাণপত্ৰ লাভ কৰিবলৈ সক্ষম হয় ৷
ইয়াৰ পূৰ্বে এই অভিলেখ তামিলনাডুৰ জয় যশৱন্তৰ হাতত আছিল ৷যিয়ে ২০১৯ চনত ১০ বছৰ বয়সত ১০ ঘণ্টা ৩০ মিনিটত একে দূৰত্ব অতিক্ৰম কৰিছিল। কিন্ত প্ৰবল প্ৰচেষ্টাৰে ইছাংকে তামিলনাডুৰ জয় যশৱন্তৰ অভিলেখ ভংগ কৰি এক নতুন অভিলেখ স্থাপন কৰে।
উল্লেখ্য যে এই বিশ্বাভিলেখ অৰ্জন কৰিবলৈ ইছাংকে কঠোৰ পৰিশ্ৰম কৰিছিল। তেওঁ অবিৰতভাৱে সাঁতোৰৰ অনুশীলন কৰিছিল। খবৰ অনুসৰি, ঝাৰখণ্ডৰ ৰাজধানী ৰাঁচীৰ ধুৰৱা মথাউৰিত প্ৰতিদিনে ৪ৰ পৰা ৫ ঘণ্টা সাঁতুৰি ইছাংকে প্ৰস্তুতি চলাইছিল। তেওঁৰ প্ৰশিক্ষক অমন জয়ছৱাল আৰু বজৰংগ কুমাৰৰ পৰা শিকি এই কৃতিত্ব অৰ্জন কৰে। চেমনীয়া সাঁতোৰবিদ গৰাকীয়ে এতিয়া সৰ্বত্ৰে প্ৰশংসা লাভ কৰিছে।
আনহাতে ঝাৰখণ্ডৰ মুখ্যমন্ত্ৰী হেমন্ত সোৰেনে ইছাংককক অভিনন্দন জনায়। সোৰেনে তেওঁৰ ফেচবুক পোষ্টত অভিনন্দন জনাই উল্লেখ কৰে যে, “মাত্ৰ ৭ বছৰ বয়সতে ঝাৰখণ্ডৰ কণমানি ইছাংকে শ্ৰীলংকা আৰু ভাৰতৰ মাজৰ ২৯ কিলোমিটাৰ দৈৰ্ঘ্যৰ সমুদ্ৰ অতিক্ৰম কৰি এক ঐতিহাসিক মুহূৰ্ত অৰ্জন কৰিলে। ইছাংকৰ সফলতা অনুশাসন আৰু নিজৰ লক্ষ্যৰ প্ৰতি অদম্য সমৰ্পণৰ এক উল্লেখযোগ্য নিদৰ্শন। তেওঁ কেৱল লক্ষ্যৰ প্ৰতি সন্মান কঢ়িয়াই আনিছে।” ঝাৰখণ্ড সন্তান গৰাকীৰ এই ঐতিহাসিক কৃতিত্বৰ বাবে তেওঁৰ পৰিয়াল, আৰু প্ৰশিক্ষকসকলক বহুত অভিনন্দন, আৰু উজ্জ্বল ভৱিষ্যতৰ বাবে আন্তৰিক শুভেচ্ছা।