WB Election Results:
দৈনিক অগ্ৰদূত ডিজিটেল ডেক্স:পশ্চিমবংগক লৈ দেশজুৰি ব্যাপক চর্চা চলি থকাৰ মাজতে আজি পুৱাৰে পৰা আৰম্ভ হোৱা ভোট গণনাত বিজেপিৰ চুনামী ধুলিস্যাতৰ দিশে টিএমচি ৷ পশ্চিমবংগৰ মুখ্যমন্ত্ৰী মমতা বেনাৰ্জীৰ অগ্ৰগতি ভবানীপুৰ সমষ্টিত। বিজেপিৰ অঘোষিত মুখ্যমন্ত্ৰী পদৰ প্ৰাৰ্থী শুভেন্দু অধিকাৰী ভবানীপুৰত পিছ পৰি থকাৰ বিপৰীতেনন্দীগ্ৰাম সমষ্টিত বৃহৎ অগ্ৰগতি লাভ কৰিছে ৷ দিনৰ এঘাৰ বজালৈকে লাভ কৰা তথ্য অনুসৰি বিজেপিয়ে ১৮৩ আসনৰ অগ্ৰগতি লাভৰ বিপৰীতে ১০২ আসনত লাভ কৰিছে অগ্ৰগতি ৷
সমগ্র দেশবাসীৰ দৃষ্টি নিবন্ধ হৈ থকা ৰাজ্যখনৰ এইবাৰৰ নির্বাচনে প্রতিপন্ন কৰিলে মোদী-শ্বাহব অশ্বমেধ ঘোঁৰাৰ যাত্রা ৷দেশৰ সম্মুখত মধ্যপ্রাচ্যৰ যুদ্ধই সৃষ্টি কৰা সংকটলৈও পিঠি দি প্রধানমন্ত্রী নৰেন্দ্র মোদী আৰু কেন্দ্রীয় গৃহমন্ত্রী অমিত শ্বাহ সর্বশক্তি প্রয়োগৰে মমতাৰ বিৰুদ্ধে কাত নমাটোৱে ইতিমধ্যে সর্বত্রে চর্চা অর্জন কৰিছে। ‘বংগ দখল’ অভিযান সফল কৰাৰ অংকৰে মোদী-শ্বাহে ৰাজ্যখনলৈ প্রচাৰৰ বাবে অসম আৰু উত্তৰ প্ৰদেশৰ দুই মুখ্যমন্ত্রী ক্রমে ড° হিমন্ত বিশ্ব শর্মা আৰু যোগী আদিত্য নাথক প্ৰচাৰ অভিযানলৈ প্ৰেৰণ কৰে। আনহাতে, পশ্চিমবংগক কেন্দ্ৰ কৰি এইবাৰ দেশৰ নিৰ্বাচন আয়োগো তুমুল বিতৰ্কৰ আৱৰ্তত সোমাই পৰিছে। বিৰোধীৰ প্ৰচণ্ড প্ৰতিবাদৰ মাজতে নির্বাচন আয়োগে আঁকোৰগজালিৰে ভোটাৰ তালিকাৰ গভীৰ পুনৰীক্ষণ কৰি ৯২ লাখকৈ ভোটাৰৰ নাম কর্তন কৰে। তদুপৰি কাৰ্যতঃ বিজেপিৰ সহায়ক হোৱাকৈ ৰাজ্যখনলৈ নির্বাচন আয়োগে অভাৱনীয়ভাবে কেন্দ্রীয় সশস্ত্র বাহিনীসমূহৰ ২,১০০ কোম্পানী প্ৰেৰণ কৰে। এনেদৰে নিৰাপত্তাৰক্ষীয়ে ঘেৰি থকা অৱস্থাত ৰাজ্যখনত দুটা পর্যায়ত যোৱা ২৩ আৰু ২৯ এপ্ৰিলত ভোটগ্রহণ সম্পন্ন হয়। নির্বাচন আয়োগৰ এনে আয়োজনৰ পাছতো ফলতা সমষ্টিৰ ভোটগ্রহণ পুনৰ অহা ২১ মে’ত অনুষ্ঠিত হ’ব। গতিকে আজি ২৯৩টা সমষ্টিৰহে ভোট গণনা হয়।
উল্লেখ্য যে এইবাৰ অভিলেখ সৃষ্টি কৰি পশ্চিমবংগত ৯১ শতাংশ ভোটদান হয়। ভোটদানৰ এনে হাৰেও বিজেপি নে তৃণমূল কংগ্রেছ- কোনে শেষ হাঁহি মাৰিব তাক লৈ বিশ্লেষকসকলৰ মনত নিমিলা অংকৰ সৃষ্টি কৰাৰ মাজে অধিকাংশ নির্বাচনোত্তৰ সমীক্ষাই বিজেপিয়ে শেষ হাঁহি মাৰিব বুলি কৈছিল৷ সেইয়া যে সত্যত প্ৰমাণিত হোৱাটো একপ্ৰকাৰ নিশ্চিত হৈছে দ
উল্লেখ্য যে ২০১৬ৰ পৰাই মোদী-শ্বাহে ‘বংগ দখল’ৰ চেষ্টা চলাই আহিছে। তৎসত্ত্বেও বিগত ২০১৬ আৰু ২০২১ৰ বিধানসভা নির্বাচন দুটাত বিজেপি সফল নহ’ল। আনকি ২০১৯ৰ লোকসভা নির্বাচনত ৰাজ্যখনত বিজেপিয়ে ৪২ খন আসনৰ ১৮ খনত জয়লাভ কৰে যদিও যোৱাবাৰৰ লোকসভা নির্বাচনত দলে লাভ কৰা আসনৰ সংখ্যা ১২ খনলৈ হ্রাস পায়। তৎসত্ত্বেও বিজেপিয়ে ৰাজ্যখনত ২০২৪ৰ লোকসভা নির্বাচনত ৩৯.১০ শতাংশ ভোট লাভ কৰিবলৈ সক্ষম হয়। ইয়াকে সাৰথি কৰি দলে এইবাৰ নিৰ্বাচনী ৰণনীতি প্রস্তুত কৰে।
ইপিনে, একাংশ বিশ্লেষকে প্ৰকাশ কৰা অনুসৰি যদিহে এইবাৰ বিজেপিয়ে পশ্চিমবংগ দখল কৰিবলৈ সক্ষম হয়, তেন্তে স্বতন্ত্র নির্বাচন আয়োগ চৰকাৰৰ এক অংগত পৰিণত হোৱাটো প্রতিপন্ন কৰিব। উল্লেখ্য যে শেহতীয়াভারে হিন্দী বলয়ৰ ৰাজ্যসমূহৰ বিজেপিৰ ভেটি কিছু কঁপিছে। সেয়েহে আগন্তুক ২০২৯ৰ লোকসভা নির্বাচনত কেন্দ্ৰৰ ক্ষমতা হাতত ৰখাৰ উদ্দেশ্যে মোদী-শ্বাহে এইবাৰ পশ্চিমবংগ দখল কৰিবলৈ প্ৰাণপণ চেষ্টা চলোৱা বুলি চর্চা হৈছে। ইপিনে, কেতবোৰ সমীক্ষা মতে, মমতাৰ প্ৰতি ৰাজ্যখনৰ যুৱক-যুৱতী আৰু হিন্দু মহিলাসকলৰ বহুতৰ মোহভংগ ঘটিছে। যুৱক-যুৱতীসকলে চাকৰি আৰু মহিলাসকলে পৰিৱৰ্তনৰ আশাত বিজেপিক ভোট দিয়াৰ সম্ভাৱনা ব্যক্ত কৰিছে একাংশ বিশ্লেষকে। গতিকে ‘নবান্না’ (পশ্চিমবংগ চৰকাৰৰ সচিবালয়) ত এইবাৰ বিজেপিৰ পদার্পণ ঘটাৰো সম্ভাৱনা আছে। কাৰণ মমতাৰ মূল ভেটি হৈছে জাতি, ধর্ম নির্বিশেষে মহিলাসকল। সেয়া যিয়েই নহওক, এইবাৰ মমতাৰ পতন ঘটিলে দিল্লীৰ ৰাজনীতিতো পশ্চিমবংগৰ নাম সুকীয়াকৈ সংযোজন হ’ব পাৰে। কাৰণ বিগত ১৫ বছৰ পশ্চিমবংগ বিৰোধীৰ দখলত আছে। উল্লেখ্য যে এইবাৰ মোদী-শ্বাহে পশ্চিমবংগৰ পৰা বিদেশী বহিষ্কাৰ তুংগত তোলা, হিন্দু শৰণাৰ্থীক নাগৰিকত্ব প্রদান আদিৰো প্রতিশ্রুতি দিয়ে। গতিকে কাইলৈ ফলাফলে কেৱল পশ্চিমবংগতে নহয়, সমগ্র দেশতে এক সুদৃঢ় প্ৰসাৰী প্ৰভাৱ পেলোৱাৰ সম্ভাৱনা আছে।