এক হৃদয় বিদাৰক ঘটনা
মঙ্গলদৈ লোকসভা সমষ্টিৰ প্ৰাৰ্থী সকলে আজি দৰং জিলা উপায়ুক্ত কায্যালয়ত মনোনয়ন পত্ৰ দিবলৈ অহাৰ সময়ত ১৫ নম্বৰ ৰাষ্ট্ৰীয় ঘাইপথত সংঘটিত হয় এক হৃদয় বিদাৰক ঘটনা । মনোনয়ন দাখিলৰ সময়ছোৱাত আৰক্ষীয়ে আইন শৃংখলা পৰিস্থিতি নিয়ন্ত্ৰণৰ বাবে ১৫ নং ৰাষ্ট্ৰীয় ঘাই পথৰ উপায়ুক্তৰ কাৰ্যালয়ৰ সন্মুখত প্ৰায় ৪০০ মিটাৰ পথত যান বাহনৰ চলাচল বন্ধ কৰি দিয়ে। ইয়াৰ ফলত ভীষণ সমস্যাৰ সন্মুখীন হয় সৰ্বসাধাৰণ ৰাইজ । ঘটনাৰ বিৱৰণী অনুসৰি ছিপাঝাৰৰ বাৰিয়াপাৰা গাঁৱৰ পাপৰী বৰুৱা নামৰ এগৰাকী মহিলাক পৰিয়ালৰ লোকে সংকটজনক অৱস্থাত ছিপাঝাৰৰ পৰা মঙ্গলদৈ অসামৰিক চিকিৎসালয়লৈ সৰু গাড়ীৰে লৈ অনাৰ সময়ত আৰক্ষীয়ে ৰোগী গৰাকী অনা গাড়ী খনো যাবলৈ বাধা প্ৰদান কৰাৰ পিছত বিপাঙত পৰি ৰোগী গৰাকীক স্বামী পৃথু বৰুৱাই কান্ধত তুলি মঙ্গলদৈ অসামৰিক চিকিৎসালয়লৈ নিব লগীয়া অৱস্থা হয়। এই ঘটনাই সমগ্র মঙলদৈ অঞ্চলত তীব্ৰ প্ৰতিক্ৰিয়াৰ সৃষ্টি কৰিছে । যান-বাহন নিয়ন্ত্ৰণ কৰাৰ নামত সৰ্ব সাধাৰণ ৰাইজৰ অসুবিধাৰ প্ৰতি তিলমানো গুৰুত্ব আৰোপ নকৰা আৰক্ষীয়ে সংকটজনক অৱস্থাৰ ৰোগীকো ৰেহাই নিদিয়া ঘটনাই ৰাইজৰ অধিকাৰ খৰ্ব কৰা বুলি সৰ্বত্ৰ চৰ্চা হৈছে ।
