নগাঁৱৰ এ আই ইউ ডি এফৰ সভা  ৰক্তাক্ত

নগাঁও: আজি নগাঁও চহৰৰ মুক্তি যুঁজাৰু ভৱনত আয়োজিত এ আই ইউ ডি এফ দলৰ এখন সভা ৰণাংগণত পৰিণত হয়।দলীয় নেতা-কৰ্মীৰ মাজত হোৱা প্ৰচণ্ড মাৰপিটত ৰক্তাক্ত হৈ পৰে সভাস্থলী। এই আক্ৰমণ-প্ৰত্যাক্ৰমণত দলটোৰ দুটা ফৈদৰ কমেও ৭জনকৈ কৰ্মী আহত হয়। উল্লেখ্য যে,আজি নগাঁও চহৰৰ মুক্তি যুজাৰু ভৱনত এ আই ইউ ডি এফ দলৰ নগাঁও জিলা সমিতিৰ বিষয়ববীয়াৰ সকলৰ এখন সভা অনুষ্ঠিত হয়। সভা চলি থকাৰ মাজতে কেতবোৰ বিষয়ক লৈ এ আই ইউ ডি এফৰ একাংশ নেতা- কৰ্মীয়ে সভাস্থলী উত্তপ্ত কৰি তোলে। দলটোৰ এক সুত্ৰৰ পৰা জানিব পৰা মতে, দলীয় পতাকা উত্তোলন আৰু যোৱা বিধান সভা নিৰ্বাচনত ৰূপহীহাট সমষ্টিত এ আই ইউ ডি এফৰ পৰা প্ৰতিদ্বন্দিতা কৰি পৰাজিত হোৱা নুৰুল আমিন চৌধুৰী নামৰ নেতা জনক আজিৰ সভালৈ নিমন্ত্ৰণ নজনোৱাক কেন্দ্ৰ কৰি সভা স্থলীত থকা দলটোৰ নেতা-কৰ্মী সকল দুটা ভাগত বিভক্ত হৈ তমুল বাক বিতণ্ডাৰ সৃষ্টি কৰে। পৰিস্থিতি এনে পৰ্যায় পায়গৈ যে দুয়োটা পক্ষ‌ই ইটোৱে আনটোক আক্ৰমণৰ লক্ষ্য কৰি লয়। দুয়োটা পক্ষৰ একাংশ নেতা-কৰ্মীয়ে সভাকক্ষৰ চকী দাঙি লৈ পৰস্পৰে পৰস্পৰকআক্ৰমণ কৰাত দুয়ো পক্ষৰ সাতজনকৈ কৰ্মী আহত হ’ব লগা হয়। যাৰ ফলত সভাস্থলী তেজেৰে ৰাঙলি হৈ পৰে। বিসম্বাদী এটা গোটে অভিযোগ কৰা মতে, ধিং সমষ্টিৰ বিধায়ক আমিনুল ইছলাম আৰু এগৰাকী কেন্দ্ৰীয় সদস্যৰ উচতনিতেই তেওঁ লোকৰ একাংশ সমৰ্থকে সৈতে নুৰুল আমিন চৌধুৰীৰ সমৰ্থক হবিবুৰ ৰহমান আৰু মোবাৰক আলীক আক্ৰমণ কৰে। ফলত দুয়োজন আঘাত প্ৰাপ্ত হয়। ইপিনে, বিধায়ক আমিনুল ইছলামৰ সমৰ্থকে অভিযোগ কৰা অনুসৰি, হবিবুৰ ৰহমান আৰু মোবাৰক আলীৰ নেতৃত্বত একাংশ সমৰ্থকে বিধায়ক আমিনুল ইছলাম আৰু তেওঁৰ সমৰ্থক সকলক আক্ৰমণ কৰে। ফলত এই আক্ৰমণত দলটোৰ কেন্দ্ৰীয় সমিতিৰ সদস্য মতিউৰ ৰহমান, ইছৰাফিল আলী, মাজাহাৰুল ইছলাম, আব্দুল মতিন আৰু নজৰুল ইছলাম আহত হয়। ইয়াৰে মতিউৰ ৰহমান গুৰুতৰ ভাবে আহত হয়। অৱশ্যে বিধায়ক আমিনুল ইছলাম ঘটনাস্থলীৰ পৰা পলায়ন কৰি আত্মৰক্ষা কৰে। ইপিনে, দুয়োপক্ষৰ আক্ৰমণ -প্ৰত্যাক্ৰমনত পৰিস্থিতি জটিল ৰূপ ধাৰণ কৰে। পিছত ঘটনাস্থলীত আৰক্ষীৰ দল উপস্থিত হৈ লাঠিচালনা কৰি পৰিস্থিতি নিয়ন্ত্ৰণ কৰিব লগা হয়। দেশৰ স্বাধীনতা সংগ্ৰামীৰ স্মৃতি বহন কৰা মুক্তি যুজাৰু ভৱনত অনুষ্ঠিত এআইইউডিএফৰ সভা ৰণ ক্ষেত্ৰলৈ পৰ্যবসিত হোৱাত নগাঁৱত তীব্ৰ প্ৰতিক্ৰিয়াৰ সৃষ্টি কৰিছে। ঘটনা সন্দৰ্ভত ধিঙৰ বিধায়ক আমিনুল ইছলামে কয়, আজিৰ সভাত উপস্থিত থকা বিজেপিৰ এজেন্টৰূপী এআইইউডিএফ কৰ্মীৰ বাবেই এই অবাঞ্চিত ঘটনা হ’বলৈ পালে। আন একাংশ কৰ্মীৰ মতে, নুৰুল আমিন চৌধুৰীক সভালৈ আমন্ত্ৰণ নজনোৱাৰ বাবেই আজিৰ সভাখনত হুলস্থুলীয়া পৰিৱেশৰ সৃষ্টি কৰি দলটোৰ ভাৱমুৰ্ত্তী নষ্ট কৰাৰ অপচেষ্টা চলায়। উল্লেখ্য যে নুৰুল আমিন চৌধুৰীয়ে সদ্য সমাপ্ত লোক সভা নিৰ্বাচনৰ সময়ত অগপত যোগদান কৰিছিল আৰু শেহতীয়াকৈ ভাবে বিজেপিৰ লগত ঘনিষ্ঠ সম্পৰ্ক ৰাখিছে। ইতিমধ্যে সমগ্ৰ ঘটনা সন্দৰ্ভত দুয়োটা পক্ষ‌ই নগাঁও সদৰ থানাত পৰস্পৰে পৰস্পৰৰ বিৰুদ্ধে এজাহাৰ দাখিল কৰি দোষীৰ বিৰুদ্ধে ব্যৱস্থা লবলৈ দাবী জনাইছে।