বৰেণ্য অভিনেতা নিপন গোস্বামীক নগাঁৱৰ এ ডি পি কলেজৰ হীৰক জয়ন্তী বৰ্ষৰ বিশেষ সন্মান

নগাঁও: অসমীয়া বোলছবি জগতৰ বৰেণ্য অভিনেতা নিপন গোস্বামীক আজি নগাঁৱৰ ঐতিহ্যমণ্ডিত আনন্দৰাম ঢেকিয়াল ফুকন মহাবিদ্যালয়ৰ হীৰক জয়ন্তী বৰ্ষৰ বিশেষ সন্মান প্ৰদান কৰা হয় । মহাবিদ্যালয় নৱনিৰ্মিত প্ৰেক্ষাগৃহত আয়োজিত এক গাম্ভীৰ্যপূৰ্ণ অনুষ্ঠানত অধ্যক্ষ ড° সুৰজিৎ কুমাৰ ভাগৱতীয়ে মহাবিদ্যালয় পৰিয়ালৰ হৈ বৰেণ্য শিল্পী গৰাকীক গামোচা, শৰাই, হীৰক জয়ন্তী স্মাৰক, মহাবিদ্যালয়ৰ পৰা প্ৰকাশিত গ্ৰন্থৰ টোপোলা আদিৰে এই সন্মান প্ৰদান কৰে। মহাবিদ্যালয়ৰ ছাত্র-ছাত্ৰী, অধ্যাপক-অধ্যাপিকা, কৰ্মচাৰী উপস্থিতিত হীৰক জয়ন্তী সন্মান গ্ৰহণ কৰি চিৰসেউজ অভিনেতা গৰাকীয়ে কয়,”এই ঐতিহ্যমণ্ডিত ধুনীয়া মহাবিদ্যালয় খনৰ পৰিৱেশে মোক পুনৰ যৌৱন কাললৈ লৈ গল । মই অভিভূত হৈছো মোক এইখন মহাবিদ্যালয়ে এনে সন্মান প্ৰদান কৰাৰ বাবে মই ধন্য হৈছো ।” ছাত্র ছাত্ৰী সকলক উদ্দেশ্য কৰি শিল্পী গৰাকীয়ে লগতে আৰু কয়,” আজি মই অভিনেতা হিচাপে প্ৰতিষ্ঠিত হব পাৰিছো শৈশৱত মোৰ মনলৈ অহা দৃঢ়তা আৰু জেদৰ বাবে । শৈশৱত মোৰ জীৱনৰ প্ৰথম নাটক লাচিত বৰফুকনত অভিনেতা হিচাপে মই বিফল হৈছিলো । কিন্তু সেই বিফলতাই মোৰ জীৱনৰ গতি নিৰ্ধাৰণ কৰিলে ।” সেয়ে ছাত্র ছাত্ৰী সকলে প্ৰতিটো কাম অতি নিষ্ঠা ,দৃঢ়তা আৰু সফল হমেই বুলি কৰিব লাগে বুলি তেওঁ মন্তব্য কৰে। অনুষ্ঠানত আদৰণি ভাষণ প্ৰদান কৰে অধ্যক্ষ ড° সুৰজিৎ কুমাৰ ভাগৱতীয়ে ।
হেমেন কুমাৰ দাস, নগাঁও