নগাঁৱত অবৈধ গৰু সৰবৰাহ অব্যাহত: ৰাইজে অবৈধ গৰু সৰবৰাহকাৰী আৰু গৰু ভৰ্তি তিনি খন ট্ৰাক জব্দ কৰি গটালে আৰক্ষীক

নগাঁও:নগাঁও আৰক্ষীয়ে জিলা খনত অবৈধ গৰু সৰবৰাহৰ কোনো ছিণ্ডিকেট নাই বুলি দাবী কৰি অহাৰ সময়তে জিলা খনৰ বিভিন্ন প্ৰান্তত ট্ৰাকে ট্ৰাকে অবৈধ ভাৱে সৰবৰাহ কৰা গৰু আৰু জব্দ কৰি আহিছে।লগতে আৰক্ষীয়ে গ্ৰেপ্তাৰ কৰিছে বহু কেইজন অবৈধ গৰু সৰবৰাহকাৰীক।নগাঁও আৰক্ষীক একপ্ৰকাৰে অস্তিত্বহীন কৰি তুলি চোৰাং গৰু সৰবৰাহকাৰীৰ দলে প্ৰায়েই নিশা নগাঁৱৰ ৰাষ্ট্ৰীয় ঘাই পথৰে কে’বা খনো আৰক্ষী থানাৰ সন্মুখদিয়েই ট্ৰাকে ট্ৰাকে চোৰাং গৰু সৰবৰাহ কৰি থকা পৰিলক্ষিত হৈছে ।ইয়াৰ মাজতেই কালি নিশা নগাঁও চহৰৰ হয়বৰগাঁৱত স্থানীয় ৰাইজে তিনিখনকৈ চোৰাং গৰুভৰ্ত্তি ট্ৰাক ধৰি আৰক্ষীক গতাই দিয়ে । কালি নিশা অবৈধ সৰবৰাহকাৰী দলে জিলা খনৰ ৰূপহীৰ পৰা মেঘালয়লৈ বুলি তিনিখনকৈ ট্ৰাকৰে চোৰাং গৰু লৈ গৈ আছিল । কিন্তু এই বিষয়ে সম্ভেদ পাই নগাঁও চহৰৰ হয়বৰগাঁৱৰ একাংশ ৰাইজে মাধৱদেৱ পথত কৰায়ত্ত কৰে তিনিখনকৈ দহচকীয়া গৰুভৰ্ত্তি ট্ৰাক । য’ত আছিল ৯৮টা পশুধন(গৰু) । ৰাইজে ট্ৰাক কেইখনৰ লগতে অবৈধ গৰু সৰবৰাহৰ লগত জড়িত ৭ জনকৈ লোককো কৰায়ত্ত কৰি আৰক্ষীৰ হাতত গতাই দিয়ে । ৰাইজে কৰায়ত্ত কৰা ট্ৰাক কেইখনৰ নম্বৰ হৈছে এম এল ১১-৭৭২০,এন এল০২এল ৬৪০৭ আৰু এন এল০১ এম -৯৯১২।এই দহচকীয়া ট্ৰাক কেইখনৰ জৰিয়তেই পশুধনসমূহ সৰবৰাহকাৰী দলটোৱে মেঘালয় হৈ বাংলাদেশলৈ সৰবৰাহ কৰিবলৈ লৈ গৈছিল । ইতিমধ্যে নগাঁও আৰক্ষীয়ে ৰাইজে কৰায়ত্ত কৰি গতাই দিয়া ৭ জনকৈ লোকক আটক কৰাৰ লগতে গৰুভৰ্ত্তি ট্ৰাক তিনিখনো জব্দ কৰে ।আৰক্ষীয়ে ঘটনা সন্দৰ্ভত নগাঁও সদৰ আৰক্ষী থানাত ভাৰতীয় দণ্ড বিধিৰ ৩৭৯/৪১১/২৮৯/৩৪,আৰ/ডব্লিউ ধাৰা১১(১)(এ)(ডি)(ই)(এইচ)পশু সুৰক্ষা আইন১৯৬০ৰ অধীণত ২৮২৫/২০১৯ নম্বৰত গোচৰ পঞ্জীভূক্ত কৰি ৰাইজে কৰায়ত্ত কৰি গটাই দিয়া মেঘালয়ৰ নেৱলীন শ্বাইলা(৪১),পাইনহাম পায়টোহ(১৯),বনাটাই চাংঘা(১৯),নেপ টেৰিয়াং(১৮),লেড ফাৱা(২৫),ৰেলেং কী(২০)আৰু লেৱাতী ল(২০)ক গ্ৰেপ্তাৰ কৰি জেৰা অব্যাহত ৰাখিছে।ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।