জীয়াভৰলী নদীৰ মকুৱা ঘাটৰ নাওঁ দূৰ্ঘটনাত অৰ্দ্ধ শতাধিকৰ কথমপি প্ৰাণ ৰক্ষা:এজন সন্ধানহীন

অধিক বোজা কঢ়িওৱা বাৱেই দূৰ্ঘটনাত পতিত ভটভটী নাওঁ

অগ্ৰদূতবাৰ্তা, নদুৱাৰ,১৭অক্টোৱৰঃনদুৱাৰৰ অন্তৰ্গত জীয়াভৰলী নদীৰ মকুৱা চাপৰি ঘাটত আজি দূপৰীয়া এখন নাও ডুবি এজন ব্যক্তিৰ সন্ধানহীন হোৱাৰ লগতে কেইবাজনো লোকৰ কথমপি প্ৰাণ ৰক্ষা পৰে ৷ উক্ত নাও দূৰ্ঘটনাত আঠখনকৈ মটৰ চাইকেল সহ কুৰিখনৰো অধিক চাইকেল নদীৰ গৰ্ভত লীন যায় ৷ ঘটনাৰ বিৱৰণী অনুযায়ী মকুৱা ঘাটৰ পৰা আজি দিনৰ ১১মান বজাত এখন ভটভটী নাওত অতি কমেও ৫০জন লোক লৈ তেজপুৰৰ পাচঁমাইললৈ যাত্ৰা আৰম্ভ কৰাৰ কিছু সময়ৰ পাচতে নদীৰ সোতঁত ভটভটী নাওখনে নিয়ন্ত্ৰণ হেৰুৱাই পানীত ডুৱ যায় ৷ সেই সময়ত নাওখনত সাঁতুৰিব পৰা লোক সকলে পানীত পৰিযোৱা সকলক উদ্ধাৰ কৰি পাৰলৈ আনে যদিও তাইজত আলি(৫০) নামৰ লোকজন সন্ধানহীন হয় ৷ পাচত এচ ডি আৰ এফ বাহিনীৰ জোৱানে জীয়াভৰলী নদীত অভিযান চলাই যদিও তাইজত আলিৰ কোনো সন্ধান লাভ নকৰিলে ৷ নাও দূৰ্ঘটনাত সন্ধানহীনহোৱা তাইজত আলিৰ ঘৰ মহাভৈৰব আৰক্ষী থানাৰ অন্তৰ্গত টেঙাবস্তিৰ বুলি জানিবপৰা গৈছে ৷ দূৰ্ঘটনাটোত গুৰুত্বৰভাৱে আহত দুগৰাকী বৃদ্ধক তেজপুৰ অসামৰিক চিকিৎসালয়লৈ প্ৰেৰণ কৰাৰ লগতে এটি শিশু উত্তৰ জামুগুৰি ত্ৰিশখন বিচনাযুক্ত চিকিৎসালয়ত ভৰ্তি কৰায় ৷ ভটভটী নাওখনত আঠ গৰাকী মহিলাৰ লগতে সাতটি শিশু আছিল যদিও কথমপি আটাইকেইগৰাকীৰে প্ৰাণ ৰক্ষা পৰে ৷ ইতিমধ্যে এচ ডি আৰ এফ জোৱানে অভিযান চলায় এখন মটৰ চাইকেল সহ চাৰিখন চাইকেল উদ্ধাৰ কৰে ৷ অধিক বোজা কঢ়িয়াই নিয়াবাৱেই ভটভটী নাওখন নদীৰ সোঁতত ভাৰসাম্য হেৰুৱাই ডুব যোৱা বুলি স্থানীয় ৰাইজে মন্তৱ্য কৰে ৷ দৈনিক এইদৰে মকুৱা ঘাটৰ পৰা পাঁচমাইললৈ ভটভটী নাওত বিপদ সংকুল যাতায়ত কৰি থকা বুলি জানিব পৰা গৈছে ৷ মনকৰিবলগীয়া বিষয় যে চৰকাৰী ভাৱে অনুমোদন নোহোৱাকৈয়ে মকুৱা ঘাটৰ পৰা পাচঁমাইললৈ ভটভটী নাও সমুহ পাৰকৰি এটা চক্ৰই দীৰ্ঘদিনধৰি এক ৰমৰমীয়া ব্যৱসায় চলায় আহিছে ৷ প্ৰশাসনৰ অনুমোদন নোহোৱাকৈ তথা অবৈধ ভাৱে এনেদৰে ভটভটী নাও জীয়াভৰলী নদীত চলোৱা কাৰ্য বন্ধ কৰাৰ লগতে এই ক্ষেত্ৰত বিহিত ব্যৱস্থা গ্ৰহনৰো দাৱী জনাইছে স্থানীয় সচেতন ৰাইজে ৷