শিৱসাগৰত ফেচবুকত উৰা বাতৰি বিয়পোৱা যুৱকক আটক

কৰ’না ভাইৰাছৰ বাবে চিকিৎসালয়ৰ পৰিৱৰ্তে থানাত থাকিবলগীয়া হ’ল শিৱসাগৰৰ এজন যুৱক। শিৱসাগৰৰ অ’ এন জি চি কলনিৰ এগৰাকী ব্যক্তিক বহি দেশৰ পৰা অহা হেতুকে ঘৰৰ ভিতৰতে থাকি চৈধ্য দিন আইচলেশ্যনত থকাৰ নিৰ্দেশ প্ৰদান কৰা হৈছিল। যোৰহাট বিমান বন্দৰত স্বাস্থ্য পৰীক্ষাৰ পিছত যোৰহাট জিলাৰ উপায়ুক্তই কালি ১৪ দিন ঘৰতে আইচলেশ্যনত থকাৰ নিৰ্দেশ দিয়াৰ সন্দৰ্ভত বাতৰি প্ৰকাশ হোৱাৰ পিছতে শিৱসাগৰত এগৰাকী ব্যক্তি কৰ’না ভাইৰাছত আক্রান্ত হোৱা বুলি বিভিন্ন সামাজিক মাধ্যমত প্ৰচাৰ হয়।আৰু লগে লগেই আতংকিত হৈ পৰে সকলো। অৱশেষত শিৱসাগৰ আৰক্ষীয়ে এই অপ প্ৰচাৰৰ বিৰুদ্ধে তদন্ত কৰি সামাজিক মাধ্যম ফেচবুকত উৰা বাতৰি বিয়পোৱা এজন যুৱকক আটক কৰি থানাত আবদ্ধ কৰি ৰাখে। কৰ’না ভাইৰাছৰ সংক্ৰমনৰ সজাগতাৰ প্ৰতি লক্ষ্য ৰাখি শিৱসাগৰ জিলা প্ৰশাসনে নগৰৰ অ-স্বাস্থ্যকৰ আৰু অধিক জন সমাগম হোৱা দলমুখ চাৰিআলিৰ দুখন আৰু হাঁহচৰাৰ এখন হোটেল পৰৱৰ্তী জাননী নিদিয়া পর্যন্ত বন্ধ ৰখাৰ নিৰ্দেশ দিছে। ঐতিহাসিক শিৱদৌলত কৰ’না ভাইৰাছৰ সংক্ৰমণৰ প্ৰতি লক্ষ্য ৰাখি পূজা অৰ্চনা বন্ধ ৰখা হৈছে। আনহাতে জিলা প্ৰশাসনে এক বিবৃতিত উল্লেখ কৰিছে যে, নভেল কৰ’না ভাইৰাছ ৰোগৰ বিশ্বজুৰি সংক্ৰমনৰ প্ৰতি লক্ষ্য ৰাখি শিৱসাগৰ জিলাতো প্ৰশাসনে প্ৰয়োজনীয় সতৰ্কতামূলক ব্যৱস্থা সমূহ গ্ৰহণ কৰিছে। আজি পৰ্যন্ত শিৱসাগৰ জিলাত কোনো লোক নভেল কৰ’না ভাইৰাছৰ দ্বাৰা আক্ৰান্ত হোৱাৰ তথ্যজনিত প্ৰমাণ নাই। আছুতীয়া নিৰীক্ষণত ৰখা ব্যক্তি মানেই কৰ’না ভাইৰাছৰ দ্বাৰা আক্ৰান্ত হোৱা বুলি ভবাটো উচিত নহয়।
নিয়মীয়া ভাৱে বিভিন্ন ধৰণৰ সজাগতামূলক পদক্ষেপৰ জৰিয়তে ৰাইজক সতৰ্কতামূলক ব্যৱস্থাসমূহ যেনে কাহোঁতে বা হাঁচিয়াওতে মুখ আৰু নাক ঢাকি লবলৈ, সঘনাই চাবোন আৰু পানীৰে ধুই থাকিবলৈ আৰু কাঁহ, জ্বৰ আদিত ভুগা লোকৰ পৰা ১ মিটাৰ দূৰত্বত অৱস্থান কৰিবলৈ জনোৱা হৈছে। শিৱসাগৰ জিলা স্বাস্থ্য বিভাগেও এই ৰোগ প্ৰতিহত কৰিবৰ বাবে সকলো কাৰ্যকৰী ব্যৱস্থা গ্ৰহণ কৰিছে আৰু প্ৰশাসনৰ ফালৰ পৰা ৰাইজক কোনোধৰণৰ উৰাবাতৰিত আতংকিত নহ’বৰ বাবে আহ্বান জনাইছে। বৰ্তমান বিশ্বৰ লগতে ভাৰতবৰ্ষতো কৰ’না ভাইৰাছৰ সংক্ৰমনৰ সজাগতাৰ প্ৰতি লক্ষ্য ৰাখি কেন্দ্ৰীয় ও ৰাজ্য চৰকাৰৰ দ্বাৰা জাৰি হোৱা নিৰ্দেশনা সমূহৰ লগত সংগতি ৰাখি শিৱসাগৰ জিলাৰ জিলা দণ্ডাধীশ লক্ষীনন্দন গগৈয়ে যোৱা ২০ মাৰ্চত জাৰি কৰা এক আদেশযোগে ফৌজদাৰী কার্যবিধি আইনৰ ১৪৪ ধাৰাৰ অধীনত সমগ্র জিলাতে প্ৰযোজ্য হোৱাকৈ কেতবোৰ নিষেধাজ্ঞা আৰোপ কৰিছে। এই আদেশমৰ্মে যিকোনো ব্যক্তিগত বা ৰাজহুৱা স্থানত পাঁচজন বা ততোধিক লোকৰ সমাগমকে ধৰি যিকোনো সামাজিক মাধ্যমত কোভিড-১৯ ৰ বিষয়ে অপপ্ৰচাৰ চলাই সমাজত আতংক বিয়পোৱা ইত্যাদি নিষেধ কৰিছে। অন্যহাতে এই নিষেধাজ্ঞা ভংগ কৰিলে ভাৰতীয় দণ্ডবিধি আইনৰ ১৮৮ ধাৰাৰ অধীনত দণ্ডিত কৰা হ’ব বুলিও উল্লেখ কৰে। ইয়াৰ পৰিপ্ৰেক্ষিততে জিলা প্ৰশাসনৰ তৰফৰ পৰা কৰ’না ভাইৰাছৰ সংক্ৰমণ ৰোধৰ বাবে জাৰি কৰা নিষেধাজ্ঞা সমূহ মানি চলিবলৈ আৰু কোনো ধৰণে এই নীতি সমূহ উলংঘা নকৰিবলৈ আহ্বান জনাইছে।